ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާގެ ކޯލް ސެންޓަރގެ ޚިދުމަތް ރަސްމީކޮށް ފަށްޓަވައިފި ކަމަށް އެ ވުޒާރާއިން ވިދާޅުވެއްޖެއެވެ.
އެ ވުޒާރާގެ ކޯލް ސެންޓަރގެ ނަންބަރަކީ 3347300 އެވެ. ސަރުކާރު ބަންދު ނޫން ކޮންމެ ދުވަހެއްގެ ހެނދުނު 8:00 އިން މެންދުރު 14:00 އަށް މިނަންބަރަށް ގުޅާ ޚިދުމަތް ހޯދޭނޭ ކަމަށް އެ ވުޒާރާއިން ވަނީ ހާމަކުރައްވައިފައެވެ. އޭގެ އިތުރުން ބަންދުގަޑިތަކުގައިވެސް ޚިދުމަތް ލިބޭނޭ ކަމަށް ވަނީ ވިދާޅުވެއްފައެވެ.
ކޯލް ސެންޓަރުގައި ގާއިމް ކޮށްފައިވަނީ ޒަމާނީ ކޯލް މެނޭޖްމަންޓް ސިސްޓަމެއް ކަމަށާއި އެ ސިސްޓަމުގައި ކޮންމެ ކޯލެއް ލޮގްކުރެވިގެން ދާނޭ ކަމަށް ވެސް އެ ވުޒާރާއިން ވަނީ ވިދާޅުވެފައެވެ.
ކޯލް ސެންޓަރގެ ޚިދުމަތް ރަސްމީކޮށް ފަށްޓަވައިދެއްވީ އެ ވުޒާރާގެ ވަޒީރު ޢަބްދުﷲ ރާފިޢު އެވެ.
މި ޚިދުމަތް ގާއިމްކުރުމާއެކު އެ ވުޒާރާގެ ޚިދުމަތްތައް ހޯއްދަވާ ފަރާތްތަކަށް ލުއިފަސޭހަ ވެގެންދާނޭ ކަމަށް ވެސް ވަނީ ވިދާޅުވެފައެވެ. މިގޮތުން އެފަރާތެއް ބޭނުންވާ ޑިޕާޓްމަންޓަކާ ސީދާ ގުޅައި ބޭނުންވާ މަޢުލޫމާތު ސާފުކުރުމަށް މަގުފަހިވެގެން ދާނޭ ކަމަށް ވެސް ވަނީ ވިދާޅުވެފައެވެ.
