މަޝްވަރާގެ މޭޒަށް ހާޒިރުވުމަށް ސާކުގެ ގައުމުތަކަށް ރައީސް ޑރ. މުޙައްމަދު މުޢިއްޒު ގޮވާލައްވައިފިއެވެ.
ރާއްޖޭގެ 61 ވަނަ މިނިވަންދުވަހުގެ ރަސްމީޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ޚިޔާލު ތަފާތުވުންތަކަކީ މަޝްވަރާކުރެވިގެން ހައްލު ހޯދޭނެ ކަމެއްކަމުގައި އެމަނިކުފާނުގެ ސަރުކާރުން ޤަބޫލުކުރައްވާ ކަމުގައެވެ. އެހެންކަމުން ސާކްގެ ބައްދަލުވުންތައް އަލުން ފަށައިގަތުމަށްޓަކައި، ސަރަޙައްދީ ސުލްޙަ އިސްކޮށް، މަޝްވަރާގެ މޭޒަށް މެންބަރު ޤައުމުތަކުން ހާޒިރުވުމަށް އެމަނިކުފާނު ވަނީ ގޮވާލައްވާފައެވެ. މިކަމުގައި ދިވެހިރާއްޖެއިން އިސްވެ ހަރަކާތްތެރިވުމަށް ތައްޔާރަށް އޮތްކަމަށް ވެސް ވިދާޅުވިއެވެ.
ސާކްގެ އިތުރުންވެސް އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ)އާއި ކޮމަންވެލްތު ފަދަ ބައިނަލްއަޤުވާމީ ޖަމުޢިއްޔާ އަދި ޖަމާޢަތްތަކުގައި ދިވެހިރާއްޖެއިން އަދާކުރާ އިސްދައުރު، އެމަނިކުފާނު ވަނީ ފާހަގަކުރައްވާފައެވެ.
މި ޖަލްސާގައިވެސް އެމަނިކުފާނު ވިދާޅުވީ ކުރީގެ ސަރުކާރުން ދޫކޮށްލާފައިވާ ދިވެހިރާއްޖޭގެ ޙައްޤު ސަރަޙައްދު ހޯއްދެއްވުމަށް މަސައްކަތްޕުޅުކުރައްވަމުން ގެންދަވާނޭ ކަމުގެ ޔަޤީންކަން ރައްޔިތުންނަށް ދެއްވާ ކަށެވެ. ދިވެހިރާއްޖޭގެ ސަރަޙައްދީ މިނިވަންކަން ހިމާޔަތްކުރުމަށްޓަކައި ޤާނޫނީ އިމުގެ ތެރެއިންވެސް އިސްލާޙްތައް ގެނެސްދެއްވާކަމަށް އެމަނިކުފާނު ވަނީ ވިދާޅުވެފައެވެ.
