އިންޑިއާގެ ނަން ބަދަލު ކުރަންވީ: އިލްތިޖާ މުފްތީ

ބަންގްލަދޭޝް މީހެއް ކަމަށް ޝައްކު ކޮށްގެން ހަރުކަށި ހިންދީން އޮޑިޝާގައި ވެސްޓް ބެންގޯލްގެ މުސްލިމަކު ކަރުއަޅާލި ހާދިސާ އާ ގުޅުވައިގެން ކަޝްމީރުގެ ސިޔާސީ ލީޑަރަކު ވަނީ އިންޑިއާގެ ނަން ބަދަލު ކުރުމަށް ގޮވާލާފައެވެ. ކަޝްމީރުގެ ލީޑަރު މަހުބޫބާ މުފްތީގެ ދަރިފުޅު އިލްތިޖާ މުފްތީ ވިދާޅުވަނީ އިންޑިއާއަށް ކިޔަންވީ ހިންދުސްތާނެއް ނޫން ކަމަށެވެ. އިންޑިއާއަށް ކިޔަންވީ މީހުން ކަރުއަޅާ ލިންޗިސްތާން ކަމަށެވެ. "އިންޑިއާއެއް ނޫން ނުވަތަ ހިންދުސްތާނެއް ނޫން. ކިޔަންވީ ނަމަކީ ލިންޗިސްޓާން،" އޮޑިޝާގައި ކަރުއަޅާލި މީހާގެ ފޮޓޯއަކާ އެކު އިލްތިޖާ މުފްތީ ކުރެއްވި ޓްވީޓެއްގައި ވިދާޅުވި އެވެ.