ހަނގުރާމަތަކާއި އަނިޔާވެރިކަމަކީ ދިވެހީން ޤަބޫލުކުރާ ހަމަތަކެއް ނޫން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރާއްޖޭގެ މިނިވަންދުވަސް ފާހަގަކުރުމަށް މިއަދު ބޭއްވި ރަސްމީޖަލްސާގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ ހަނގުރާމައާއި އަނިޔާވެރިކަމުގެ ބަދަލުގައި އަބަދުވެސް ދިވެހީން އިސްކުރާނީ ސުލްޙަ ކަމަށާއި އެހެން ކަމުން ސުލްޙަވެރިކަމާއެކު ކަންކަން ޙައްލުކުރުމަށް އެމަނިކުފާނު ގޮވާލެއްވިއެވެ. ރައީސް ވިދާޅުވީ ޚިޔާލުތަފާތުވުންތައް މެދުވެރިވީނަމަވެސް، ކަނޑިބަޑިން އެކަމަކަށް ހޯދޭނެ ޙައްލެއް ނޯންނާނެ ކަމަށެވެ. މި ސަރުކާރުގެ ޚާރިޖީ ސިޔާސަތު ބައްޓަންވެފައިވަނީ މި އަސާސްގެ މައްޗަށް ކަމަށް އެމަނިކުފާނު ވިދާޅުވިއެވެ.
