ބަންގްލަދޭޝް ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ. އެމް.ޑީ. ނަޒްމުލް އިސްލާމާއި، ކޮމިޝަނަރ އޮފް ޕޮލިސް އަޙްމަދު މުޙައްމަދުގެ މި މަޝްވަރާތައް ކުރެއްވީ ދިވެހި ފުލުހުންގެ ޚިދުމަތުގެ މައި އިދާރާގައި މިއަދު ބޭއްވި ބައްދަލުކުރެއްވުމުގައެވެ. މި ބައްދަލުވުމުގައި ދިވެހިރާއްޖެއާއި ބަންގްލަދޭޝްއާ ދެމެދު އޮތް ޒަމާންވީ ގާތް ގުޅުމާއި އެއްގައުމުން އަނެއް ގައުމަށް ކަންކަމުގައި ދެމުންގެންދާ އެއްބާރުލުން ކޮމިޝަނަރ ފާހަގަކުރެއްވިއެވެ.
މީގެއިތުރުން، ދެ ގައުމުގެ ފުލުހުންގެ މުއައްސަސާގެ ދެމެދުގައި އޮތް ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާ ކުރެއްވިއެވެ. ޚާއްސަކޮށް ބަންގްލަދޭޝް މެދުވެރިކޮށް ދިވެހި ފުލުހުންނަށް ފަންނީ ތަމްރީނާއި ގާބިލުކަން އިތުރުކުރުމުގެ ފުރުސަތުތައް ފަހިކުރުމާ ގުޅޭގޮތުން ދެ ބޭފުޅު ވަނީ މަޝްވަރާކުރައްވާފައެވެ.
