އެމަނިކުފާނު މިހެން ވިދާޅުވީ ރޭ ބޭއްވެވި "އަހާ" ފޯރަމުގައެވެ. ހުޅުމާލޭގައި މިހާރު އޮތް ސިންތެޓިކް ޓްރެކަކީ ބައިނަލްއަގްވާމީ ސްޓޭންޑަޑްތަކަށް ހެދިފައިވާ ޓްރެކެއް ނޫނެވެ. އޭގެ ސަބަބުން އެތުލީޓުން ރެކޯޑެއް ހެދިކަމުގައިވިޔަސް ރެކޯޑެއް ކަމަށް ނުބެލެވެއެވެ. ވޯލްޑް އެތުލެޓިކްސްގެ އުސޫލު އޮންނަ ގޮތުން ރެކޯޑް ގުނަނީ ހަމައެކަނި ވޯލްޑް އެތުލެޓިކްސް އެސޯސިއޭޝަން ގަބޫލުކުރާ ފެންވަރުގެ ޓްރެކްގައި ހަދާ ރެކޯޑްތައް ކަމަށް ވަޒީރު ވިދާޅުވިއެވެ.
މިވަގުތު މާލެ ސަރަހައްދުގައި އޮތީ ދެ ޓްރެކް ކަމަށާއި އެއީ ދެ ވައްތަރުގެ ދެ ޓްރެކް ކަމަށް ވަޒީރު ރާފިއު ވިދާޅުވިއެވެ. އެއީ މާފަންނު ސްޓޭޑިއަމްގައި އޮތް "ސްޕްރޭ ފޯމް" ވައްތަރުގެ ޓްރެކާއި، ހުޅުމާލޭގައި މިހާރު އަޅާފައިވާ އޮތް "ސޭންޑްވިޗް" ވައްތަރުގެ ޓްރެކެވެ.
" އަޅުގަނޑުމެން ޓްރެކް ހަދަން މި ޖެހެނީ ވޯލްޑް އެތުލެޓިކްސް ގަބޫލުކުރާ ފެންވަރަށް. އަޅުގަނޑުމެންގެ އެތުލީޓުން ނެރޭ ނަތީޖާ ގަބޫލުކުރާ ފެންވަރަށް. ދެން އެގޮތުގެ މަތިން އަޅުގަނޑުމެން ސިންތެޓިކްގެ މެޓީރިއަލް އެއްކޮށް ބަދަލުކޮށް އިރާދަކުރެއްވިއްޔާ މުޅި އެއްކޮށް ބޭސް ނަގާ އަލުން ޓްރެކެއް އަޅަން މި ޖެހެނީ. އަދި އެމަސައްކަތް އަންނަ މަހުގެ އެއްވަނަ ދުވަހު ފެށިގެން ދާނެ. އަދި އުއްމީދަކީ އަންނަ އަހަރުގެ ޖެނުއަރީ މަހުގެ ނިޔަލަށް އެ މަސައްކަތް މުޅިން ނިންމާލުން،" ވަޒީރު ވިދާޅުވިއެވެ.
އެމަނިކުފާނު ވިދާޅުވީ، ހުޅުމާލޭ ސިންތެޓިކް ޓްރެކް ބަދަލުކުރުމަށް ބޭނުންވާ ތަކެތި މިހާރު އޯޑަރު ކޮށްފައިވާ ކަމަށެވެ. އަދި އެ ތަނުގެ ހުރިހާ ތަފުސީލީ ކުރެހުންތަކެއްގެ މަސައްކަތް ވެސް ނިމިފައިވާ ކަމަށެވެ.
