މި އެއްބަސްވުމުގައި ސޮއިކުރުމުގެ ރަސްމިއްޔާތު އޮތީ މިއަދު ހެނދުނު 11:30 ގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގައެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ، ޑރ. ޢަބްދުﷲ ނަޒީރެވެ. ނޯވަސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ މެނޭޖިން ޑިރެކްޓަރ މުޙައްމަދު ޖައިލަމް ރަފީޤެވެ. މި ރަސްމިއްޔާތުގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ އިސް ބައެއް ބޭފުޅުންނާއި ނޯވަސް ޕްރައިވެޓް ލިމިޓެޑްގެ އިސް ބޭފުޅުން ބައިވެރިވެވަޑައިގެންނެވިއެވެ.
މި ފަހުމުނާމާގެ މައިގަނޑު މަޤްޞަދަކީ ވަރަ އެކްސްޕޯގެ މެއިން އަދި ޒޯން އަރކްވޭސް ހެދުމާއި، ސައިޓް ޕްލޭން ހެދުމާއި، ޕޯސްޓަރ، ބެނަރ އަދި ބެޖު ފަދަ ޑިޒައިނާ ގުޅުންހުރި އެންމެހައި ކަންކަމުގައި އެހީތެރިކަމާއި އެއްބާރުލުން ފޯރުކޮށްދިނުން ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވެފައިވެއެވެ.
"ވަރަ އެކްސްޕޯ 2026" ބޭއްވުމަށް ހަމަޖެހިފައިވަނީ 2026 ވަނަ އަހަރުގެ ނޮވެންބަރު މަހުގެ 26 އިން ފެށިގެން 28 ގެ ނިޔަލަށެވެ. މި ހަރަކާތް ކުރިއަށް ގެންދާނީ ހުޅުމާލޭގެ ސެންޓްރަލް ޕާކުގައެވެ.
މިއީ ދައުލަތުގެ ގިނަ މުއައްސަސާތަކަކާއި އަމިއްލަ ވިޔަފާރިތަކުން ބައިވެރިވެގެން ބާއްވާ އެކްސްޕޯއެކެވެ. މަޤްސަދަކީ ރާއްޖޭގައި ހުރި ވަޒީފާގެ ފުރުސަތުތަކާއި، އެކި ދާއިރާތަކުން ބޭނުންވާ ހުނަރުތަކާއި، އުފެއްދުންތެރިކަން ދައްކައިލުން ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވެފައިވެއެވެ. މި އެކްސްޕޯގެ ސަބަބުން ވަޒީފާ ދޭ ފަރާތްތަކާއި ވަޒީފާ ބޭނުންވާ ފަރާތްތަކާ ސީދާ ބައްދަލުވެ، މަސައްކަތުގެ މާހައުލާ ގުޅޭ މަޢުލޫމާތު ބަދަލުކުރުމުގެ ފުރުސަތު ލިބިގެންދާނޭ ކަމަށް ވެސް އެ ވުޒާރާއިން ވަނީ ވިދާޅުވެފައެވެ.
