އޮކްޓޯބަރ އެކަކުން ތިނަކަށް އެމްޑީޕީގެ ކޮންގްރެސްގައި އޮންލައިންކޮށް ރަޖިސްޓްރީވާން ހުޅުވާލި މުއްދަތު ހަމަވިއިރު ރަޖިސްޓްރީ ނުވެވުނު މީހުންނަށް އިތުރު ފުރުޞަތު ދިނުމަށް އެމްޑީޕީން ނިންމައިފިއެވެ.
އެމްޑީޕީގެ ކޮންގްރެސްގެ ބައިވެރީން އޮންލައިންކޮށް ރަޖިސްޓަރީ ކުރުމުގެ ސުންގަޑީގެ ގޮތުގައި ކަނޑައަޅާފައި އޮތީ ސެޕްޓެމްބަރު 25 އާ ހަމައަށެވެ. "އެހެންނަމަވެސް، ކޮންގްރެސްގައި ބައިވެރިވުމުގެ ޙައްޤު ލިބިފައިވާ ފަރާތްތަކުގެ ތެރެއިން އެތާރީޚާ ހަމައަށް ރަޖިސްޓަރީ ނުވުމުގެ ސަބަބުން ކޮންގްރެސްގައި ބައިވެރިވުމުގެ ފުރުސަތު ގެއްލިފައިވާ ފަރާތްތަކަށް ރަޖިސްޓަރީވުމުގެ ފުރުސަތު،" ދިނުމަށް އެޕާޓީން ވަނީ ނިންމައިފައެވެ.
އެމްޑީޕީން ބުނެފައިވަނީ ޕާޓީގެ މަޤްޞަދަކީ ކޮންގްރެސްގައި ބައިވެރިވުމުގެ ހައްޤު ލިބިފައިވާ ވީހާވެސް ގިނަ ފަރާތްތަކަށް ކޮންގްރެސްގައި ބައިވެރިވުމުގެ ފުރުސަތު ދިނުން ކަމަށެވެ. އެހެން ކަމުން ސުންގަޑި ހަމަވިއިރު ރަޖިސްޓަރީ ނުވެވުނު މަންދޫބުން އޮކްޓޯބަރ ތިނެއްވާ ހޮނިހިރު ދުވަހު ހެނދުނު 8:00 އިން 8:30 އަށް ކޮންގްރެސް ބޭއްވުމަށް ހަމަޖެހިފައިވާ މާލަމަށް ވަޑައިގަތުމުން ރަޖިސްޓަރީކޮށްދިނުމުގެ އިންތިޒާމް ހަމަޖެހިފައި ހުންނާނޭ ކަމަށް އެމްޑީޕީން ވަނީ ބުނެފައެވެ.
