އެމްޑީޕީގެ ފަސްވަނަ ގައުމީ ކޮންގްރެސްގެ އިފްތިތާހީ ޖަލްސާގައި ވާހަކަފުޅު ދައްކަވަމުން އެމަނިކުފާނު މިރޭ ވިދާޅުވީ އެ އިތުބާރު ހޯދުމުގެ މަސައްކަތް ކުރަންވާނީ ޕާޓީގެ އެންމެ އެތެރެއިން ކަމަށެވެ. އެމަނިކުފާނު ވިދާޅުވީ އިތުބާރު ހޯދޭނީ ޢަމަލުން ކަމަށާއި އެއަށްވުރެ ކުރީން ހެދިފައިވާ ގޯސްތައް ދެނެގަނެ އެކަންކަން ހައްލު ކުރަންޖެހޭ ކަމަށް ވެސް ވިދާޅުވިއެވެ.
މިރޭގެ ޖަލްސާގައި އެމަނިކުފާނު ވަނީ ކުރިންވެސް ވިދާޅުވާ ބަސްފުޅެއް ތަކުރާރު ކުރައްވައިފައެވެ. އެމަނިކުފާނު ވިދާޅުވީ ޕާޓީގެ އެއްވެސް މެންބަރަކު ޕާޓީއަށްވުރެ ބޮޑުނުވާނޭ ކަމަށެވެ. އެއްވެސް ޕާޓީއެއް ގައުމަށްވުރެ ބޮޑުނުވާނޭ ކަމަށެވެ. އަދި ޒަމާންތަކެއް ވަންދެން އޮތް ގުޅުމެއް ސިޔާސީ ޚިޔާލު ތަފާތުވުންތަކެއްގެ ސަބަބުން ފަނޑުވެގެންދިޔަ ދީގެންނުވާނޭ ކަމަށް ވެސް އެމަނިކުފާނު ވިދާޅުވިއެވެ.
ކުރިއަށްއޮތް ރިޔާސީ އިންތިޚާބުގައި އެމްޑީޕީގެ ރިޔާސީ ޓިކެޓަށް ވާދަކުރައްވާ ބޭފުޅުންގެ މެދުގައިވެސް މިވަގުތު ކިތަންމެ ބޮޑު ސިޔާސީ ވާދަވެރިކަމެއް އޮތަސް އެކަން ނިމުމުން އެކުގައި ކުރިއަށް ދިއުމުގެ ހިތްވަރާއި އަޒުމް ހުންނަންވާނޭ ކަމަށް ވެސް ވިދާޅުވިިއެވެ.
