އެމްޑީޕީ އެތެރެގައި ޚިޔާލު ތަފާތުވާ މީހުންނަކީ ދުޝަމަނުނެއް ނޫން ކަމަށް ކުރީގެ ރައީސް އިބްރާހީމް މުޙައްމަދު ޞާލިހު ވިދާޅުވެއްޖެއެވެ. ރޭ ބޭއްވި އެމްޑީޕީގެ ފަސްވަނަ ގައުމީ ކޮންގްރެސް ހުޅުވުމުގެ ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ "މިއަދު މިޕާޓީ ތެރޭގައި އެންމެ ބޮޑަށް ހިނގާ ކަމަކީ ދެހާސް އަށާވީސް ވަނަ އަހަރުގެ ރިޔާސީ ޓިކެޓު ހޯދުމުގެ ވާދަވެރިކަން. އަޅުގަނޑު ގަބޫލުކުރާ ގޮތުގައި އިންޓަރނަލް އިންތިޚާބުތަކުގައި ވާދަވެރިކަން އޮންނަންވާނެ. އެއް ކެންޑިޑޭޓެއްގެ ސިޔާސަތުތަކާއި އަނެއް ކެންޑިޑޭޓެއްގެ ސިޔާސަތުތައް ތަފާތުވެދާނެ. އަދި ވާދަކުރާ ކެންޑިޑޭޓުންނަށް އާންމު މެންބަރުންކުރާ ތާއީދުވެސް ތަފާތުވެދާނެ،" ކަމަށެވެ. އެހެންނަމަވެސް އެ ވާދަވެރިކަން ނިމުމުން އަލުން އެކުގައި ކުރިއަށް ދިއުމުގެ ހިތްވަރު ކޮންމެ މީހެއްގެވެސް ހުންނަންވާނޭ ކަމަށް ވިދާޅުވިއެވެ.
އެ އެންމެންނަކީ ވެސް އެއީ އެ ސިޔާސީ އާއިލާގެ މީހުން ކަމަށާއި، އެއީ ސިޔާސީ ދިގު ދަތުރު އެކުގައި ކުރި އެކުވެރިން ކަމަށްވެސް ވިދާޅުވިއެވެ. އެހެންކަމުން އެތައް އަހަރެއް ވަންދެން އޮތް ގުޅުންތައް "ވަގުތީ ސިޔާސީ ޚިޔާލު ތަފާތުވުމަކުން ފަނޑުވެގެން ދިޔަނުދިނުމަށް އަޅުގަނޑުމެން ވިސްނުން ގެންގުޅެންވާނެ. އަޅުގަނޑުމެންގެ ތެރޭގައި އޮތް ކޮންމެ ސިޔާސީ ޚިޔާލު ތަފާތުވުމަކުން އާންމު ރައްޔިތުންގެ މަސްލަހަތަށްވުރެ ބޮޑަށް އަޅުގަނޑުމެންގެ ސަމާލުކަން އަތުލައިގެންނުވާނެ،" އެމަނިކުފާނު ވިދާޅުވިއެވެ.
ރޭގެ ޖަލްސާގައި އެމަނިކުފާނު ވިދާޅުވީ "އަޅުގަނޑުމެން މިތަނަށް އެއްވެ މިތިބީ ހަމައެކަނި ސިޔާސީ ޕާޓީއެއްގެ މެންބަރުންގެ ގޮތަކުން ނޫން. އަޅުގަނޑުމެން މިތަނަށް އެއްވެ މިތިބީ އެކުގައި ދިގު ދަތުރެއްކުރި އެއްބަޔެއްގެ ގޮތުގައި. އެ ދަތުރުގައި އުފާވެރި އެތައް ކާމިޔާބީތަކެއް އަޅުގަނޑުމެންނަށް ލިބުނު. އަދި ދަތި އުނދަގޫ ދުވަސްތަކާ ނާކާމިޔާބީތައްވެސް ލިބުނު. އެ ލިބުނު ކާމިޔާބީތައް އަޅުގަނޑުމެން އެންމެން އެކުގާ ފާހަގަކުރިން. އެ ލިބުނު
ނާކާމިޔާބީތައް އަޅުގަނޑުމެން އެކުގާ ތަހައްމަލުކުރިން،"
އެހެންނަމަވެސް ދިގު މިދަތުރުގައި އެއްކަމެއް ދުލެއް ނުކުރައްވައި އެންމެވެސް ހިފެހެއްޓެވި ކަމަށާއި އެއީ
ދިވެހި ރައްޔިތުން ޑިމޮކްރަސީއާއި، އިންސާފާއި،
އިއްޒަތާއި، އަމިއްލަ މުސްތަގުބަލު ކަނޑައެޅުމުގެ މިނިވަންކަން ކަމަށް ވިދާޅުވިއެވެ. މިއީ ހަމަހަމަ ކަމާއެކު ކޮންމެ މީހަކަށްވެސް ލިބިގެންވާނޭ ކަންކަން ކަމަށް ވެސް އެމަނިކުފާނު ވިދާޅުވިއެވެ.
