ޕްރޮޖެކްޓުތައް ހިންގުމުގެ ހުނަރާއި ގާބިލުކަމާއި އީޖާދީ ވިސްނުން ކައުންސިލްތަކުގައި އެބަހުރިކަން އެމްޑީޕީގެ ކޮންގްރެސް ތެރެއިން ބޭއްވި އިންވެސްޓްމަންޓް ފޯރަމުން ފެނިގެން ހިނގައްޖެ ކަމަށް ކުރީގެ އިކޮނޮމިކް މިނިސްޓަރ އަދި އެމްޑީޕީގެ ކުރީގެ ޗެއަރޕާސަން ފައްޔާޒު އިސްމާޢީލް ވިދާޅުވެއްޖެއެވެ.
"ރަށްވެހި ތައްގީ" ފޯރަމުން ފެނިގެންދިޔައީ ޕްރޮޖެކްޓުތައް ހިންގުމުގެ ހުނަރާއި ގާބިލުކަން އަދި އީޖާދީ ވިސްނުން ކައުންސިލްތަކުގައި ހުރިކަން،" ފައްޔާޒު ވިދާޅުވިއެވެ.
އޭނާ ވިދާޅުވީ އިންވެސްޓް ކުރުމުގެ ފުރުސަތުތަކެއް ރަށްރަށުގައި އެބަހުރި ކަމަށެވެ. އެހެންކަމުން ކައުންސިލްތަކަށް ފަހިކޮށްދޭންވީ އިންވެސްޓްމަންޓުގެ ފުރުސަތުތައް ކަމަށް ވިދާޅުވިއެވެ.
އެމްޑީޕީއަކީ ކައުންސިލްތަކަށް ބާރުދިނުމާއި އަމިއްލަ ވިޔަފާރި ކުރިއެރުވުމުގެ ސިޔާތު ތަންފީޒު ކުރަމުން އަންނަ ޕާޓީއެއް ކަމަށް ވެސް ފައްޔާޒު ވިދާޅުވިއެވެ. "އަޅުގަނޑުމެންނަކީ އަބަދުވެސް ކައުންސިލްތަކަށް ބާރު ދޫކޮށްލުމާއި އަމިއްލަ ވިޔަފާރީ ކުރިއެރުވުމުގެ ސިޔާސަތު ތަންފީޒުކުރަމުން އަންނަ ޕާޓީ،" ފައްޔާޒު އެކްސްގައި ވިދާޅުވެފައިވެއެވެ.
ކައުންސިލްތަކަށް ކުޑަކުޑަ ފަންނީ އެހީތެރިކަމެއް ފޯރުކޮށްދީގެން ރަށްރަށުގެ ތަރައްގީއަށް ކައުންސިލްތައް މެދުވެރިކޮށް ބޮޑު ބަދަލެއް ގެނެވެން އެބައޮތް ކަމަސް ވެސް އޭނާ ވިދާޅުވިއެވެ. "އެމްޑީޕީން ކައުންސިލްތަކަށް އެ އެހީތެރިކަން ފޯރުކޮށްދޭނެ،" އޭނާ ވިދާޅުވެފައިވެއެވެ.
