މި އިސްލާހު ހުށަހެޅުއްވީ އެމްޑީޕީގެ ލާމަރުކަޒީ ކޮމިޓީގެ ޗެއަރޕާސަން ޢަލީ ނިޔާޒެވެ.
މި އިސްލާހު ހުށަހަޅުއްވަމުން އޭނާ ވިދާޅުވީ "ގްރާންޓުގެ ގޮތުގައި ދައުލަތުން މިހާރުދެނީ ފަސް ޕަސެންޓް. އަޅުގަނޑު މިހުށަހަޅަނީ އެ އަދަދު ފަނަރަ އިންސައްތައަށް އިތުރު ކުރަން. ބައެއް ބޭފުޅުން ހިތަށް އަރާފާނެ ކީއްވެތޯ އަޅުގަނޑު ފަނަރަ މިޖެހީ ކީއްވެތޯ ވިހި ނުހަނީ، ކީއްވެތޯ ތިރީސް ނުޖަހަނީ، ކީއްވެތޯ ފަންސާސް ނުޖަހަނީ،"
އަލީ ނިޔާޒު ވިދާޅުވީ ދައުލަތުން މިހާރުދޭ ފަސް ޕަސެންޓު ގްރާންޓުން އިދާރީގޮތުން ވެސް ކައުންސިލްތައް ހިންގޭވަރު ނުވާކަމަށް ދިރާސާތަކުން ދައްކާ ކަމަށެވެ. ކުރިން 2019 ވަނައަހަރު އެލްޖީއޭގެ ދިރާސާއާ އެއްގޮތަށް 2.5 އިންސައްތަ ގްރާންޓުގެ ގޮތުގައި ދައުލަތުގެ ބަޖެޓުން ފައިސާ ދިނީމާ އިދާރީގޮތުން ކައުންސިލްތައް ހިންގޭ ކަމަށް އޭނާ ވިދާޅުވިއެވެ. އެހެންނަމަވެސް މުސާރައަށް ގެނައި ބަދަލުތަކާއެކު މުސާރައާއި އެހެންކަންކަން ބްލޮކް ގްރާންޓުގެ ތެރެއިން ހަމަޖައްސަންވީމާ ކައުންސިލް ތަކަށް ނުފުދޭ ކަމަށް ވިދާޅުވިއެވެ. "އެހެންވީމާ އަޅުގަނޑު މި ހުށަހަޅަނީ އެ ފަސްއިންސައްތަ ފަނަރަ އިންސައްތައަށް ބޮޑުކޮށްދޭށޭ،"
ޢަލީ ނިޔާޒު ވިދާޅުވީ ބްލޮކްގްރާންޓްގެ ދިވެހިމާނައަކީ "ވަރަށް ހެއްވާ މާނައެއް" ކަމަށެވެ. އެއީ ހިލޭ އެހީ ކަމަށާއި، ދައުލަތުން ކައުންސިލްތައް ހިނގުމަށް ފައިސާ މިދެނީ ހިލޭއެހީގެ ގޮތުގައި ކަމަށް އޭނާ ވިދާޅުވިއެވެ. "އެހެންވެއްޖެއްޔާ ހިލޭ އެހީގެ ގޮތުގައި ރައީސް އޮފީސް ވެސް ހިންގަން ދައުލަތުން ލާރިދެނީ. މިނިސްޓްރީތައް ވެސް ހިންގަންލާރިދެނީ. އެހެންވީމާ އެއަށްވެސް އަޅުގަނޑު ދެކޭގޮތުގައި މިތަނުގެ ތެރޭގައި (އެމްޑީޕީ ކޮންގްރެސް) މަޝްވަރާ ކުރެވިގެން ރަނގަޅު ބަހެއް ނުވަތަ ރަނގަޅު ޓާމެއް އެބަ ބޭނުންކުރަންޖެހޭ. ހިލޭ އެހީއެއްނޫން ކައުންސިލްތައް ހިންގަން ދޭންޖެހޭނީ. ދައުލަތުގެ އެހެންކަންކަން ހިންގާ ކަމަށްވާނަމަ ދައުލަތުގެ ބްރާންޗެއްގެ ގޮތުގައި މިއޮންނަ ކައުންސިލްތަކަށް ވެސް ހީލޭއެހީއެއްނޫން ދޭންޖެހެނީ ހަމަ ބަޖެޓު ސަޕޯޓެއް ދޭންޖެހެނީ،" އޭނާ ވިދާޅުވިއެވެ.
ޢަލީ ނިޔާޒު ވިދާޅުވީ މީގެ އިތުރުން ސެކްޓޯރަލް ގްރާންޓް ދޭންޖެހޭނޭ ކަމަށް ގާނޫނޫގައި މިހާރުވެސް ލިޔެފައި އޮންނަ ކަމަށެވެ. އެހެންނަމަވެސް ސަރުކާރުތަކުން އެކަމަށް ޝައުގުވެރިކަމެއް ނުހުންނަ ކަމަށް ވިދާޅުވިއެވެ. "ސެކްޓަރތައް ތަރައްގީ ކުރުމަށްޓަކައި މިނިސްޓްރީތައް އަމިއްލައަށް އެކަންކުރަނީ. އޭގެ ބަދަލުގައި އަޅުގަނޑު މި ހުށަހަޅަނީ ކައުންސިލްތަކާ ހަވާލުކުރާށޭ އިމްޕްލިމެންޓް ކުރަން. ކައުންސިލްތަކާ ހަވާލު ކުރާށޭ ޕްރޮޕޯސަލްތައް ހުށަހަޅަން،" އޭނާ ވިދާޅުވިއެވެ.
މިސާލެއްގެ ގޮތުގައި އޭނާ ވިދާޅުވީ ރިނިއުބަލްއެނަރޖީސެކްޓަރ ތަރައްގީ ކުރަން ބޭނުން ކަމަށްވާނަމަ އެކަމަށް އޮންނަ ބަޖެޓް އެ ޕްރޮޕޯސަލަކާ އެއްގޮތަށް ކައުންސިލަށް ދިނުމަށެވެ. އަދި އެ މަސައްކަތެއް ކައުންސިލުން ކުރުވުމަށް ވެސް އޭނާ ވިދާޅުވިއެވެ. އެކަން ކައުންސިލްތަކާ ހަވާލުކޮށްފައި އެކަން ހިންގާގޮތް ރަނގަޅުތޯ ބަލަން ސަރުކާރު ތަކުން ތިބެންވީ ކަމަށް ޢަލީ ވިދާޅުވިއެވެ.
