އެމްޑީޕީގެ ކޮންގްރެސްގެ ތެރެއިން ބޭއްވީ އިންވެސްޓްމަންޓް ފޯރަމެއް ނޫންކަމަށާއި އެއީ ސިޔާސީ "އެގްޒިބިޝަން" އެއް ކަމަށް ވިދާޅުވެ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު މުޙައްމަދު ޝާހިދު ފާޑުވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި އޭނާ ވިދާޅުވެފައިވަނީ އެމްޑީޕީ ކޮންގްރެސް އިން ފެނިގެން ދިޔައީ "ރައީސް ނަޝީދުގެ ރިޔާސީ ކެމްޕޭނަށް ދައްކުވާ ހުވަފެނީ "މެނިފެސްޓޯ" "ޑްރާމާ" އެއް ކަމަށެވެ. "ރައްޔިތުންނަށް އަބަދުވެސް ދައްކާނީ ކުލަކުލައިގެ ޕްރޮޕޯސަލް، ލިބޭނީ ސިފަ ނުވާ ބިލާހެއް،" އޭނާ ވިދާޅުވެފައިވެއެވެ.
މިފަހަރުވެސް އިންވެސްޓްމަންޓް ފޯރަމެކޭ ކިޔާފައި ކައުންސިލަރުން ލައްވައި ޕްރެޒެންޓޭޝަން ދެއްކީ އަމިއްލަ ޕާޓީގެ އެކްޓިވިސްޓުންނަށް ކަމަށް ޝާހިދު ވިދާޅުވެފައިވެއެވެ. އޭނާ ވަނީ އިންވެސްޓަރުން ކޮބައިތޯ ވިދާޅުވެ ސުވާލު ވެސް ކުރައްވައިފައެވެ. "އިންވެސްޓަރުން ތިބީ ކޮން ތަނެއްގައި؟ މިއީ "އިންވެސްޓްމަންޓް ފޯރަމް" އެއް ނޫން. މިއީ ހަމައެކަނި ސިޔާސީ "އެގްޒިބިޝަން" އެއް،"
އެމްޑީޕީން އުޅެނީ މި ސަރުކާރުން ގެނެސްފައިވާ "ބިޔަ އިންވެސްޓްމަންޓްތައް" ހަޖަމް ނުކުރެވިގެން ކަމަށް ވެސް އޭނާ ވިދާޅުވެފައިވެއެވެ. އެމްޑީޕީގެ ކޮންގްރެސްގައި ހުށަހަޅާފައިވަނީ ހުވަފެނީ ޕްރޮޕޯސަލްތަކެއް ކަމަށް ވެސް އޭނާ ވަނީ ވިދާޅުވެފައެވެ. އެއީ "ސަރުކާރުން ގެނެސްފައިވާ ބޮޑެތި އިންވެސްޓްމަންޓްތަކުގެ ކުލަ ކަނޑުވާލުމަށް ކުޅުއްވާ ކުޅިގަނޑެއް! މިފަދަ ޑްރާމާތަކުގެ ހަގީގަތް މިއަދު ރައްޔިތުން ދަނޭ،" އޭނާ ވިދާޅުވެފައިވެއެވެ.
