މިއީ "ބިލްޑިންގ ކްލައިމެޓް ރެޒިލިއަންޓް ސޭފަރ އައިލެންޑްސް އިން ދަ މޯލްޑިވްސް ޕްރޮޖެކްޓް"ގެ ދަށުން ކުރިއަށް ގެންދިޔަ ހަރަކާތެއް ކަމަށްވެސް އެމިނިސްޓްރީން ވިދާޅުވިއެވެ.
މި ޙަރަކާތުގައި ގަމުގެ ޢާންމު ރައްޔިތުންނާއި، މަދަނީ ޖަމްޢިއްޔާތަކުގެ އިތުރުން ކަމާބެހޭ މުއައްސަސާތަކުގެ މަންދޫބުން ވަނީ ޢަމަލީ ގޮތުން ބައިވެރިވެފައެވެ. އެންމެހައި ފަރާތްތައް ގުޅިގެން ކުރިއަށްގެންދިޔަ މި ޙަރަކާތުގެ މައިގަނޑު މަޤްޞަދަކީ ރަށުގެ އަތިރިމަތީ ސަރަޙައްދު ސާފުކޮށް، ތިމާވެށި ރައްކާތެރިކުރުމުގެ ރޫޙު އާލާކުރުން ކަމަށް ވެސް އެމިނިސްޓްރީން ވިދާޅުވިއެވެ. އަދި އަތިރިމައްޗާއި ގޮނޑުދޮށުގެ ނާޒުކު ވެށި ޙިމާޔަތްކުރުމުގެ މުހިންމުކަމާމެދު ޢާންމުން ހޭލުންތެރިކުރުވުމަކީވެސް މި ޙަރަކާތުގެ މުހިންމު ބޭނުމެއް ކަމަށް ވިދާޅުވެފައިވެއެވެ.
މި ޙަރަކާތުގެ ތެރެއިން ވަނީ، ސާފުތާހިރު، ޞިއްޙަތަށް ފައިދާހުރި އަދި މޫސުމީ ގެއްލުންތަކުން އަރައިގަނެވޭނެ ފަދަ ވަރުގަދަ ގޮނޑުދޮށްތަކެއް ބިނާކުރުމަށްޓަކައި މުޖުތަމަޢުގެ ބައިވެރިވުމާއި، އެންމެން ގުޅިގެން މަސައްކަތްކުރުމުގެ މުހިންމުކަން ވަރަށް ބޮޑަށް ހާމަވެގެން ގޮސްފައެވެ.
މިފަދަ ޙަރަކާތްތަކުގެ ސަބަބުން ރަށްރަށުގެ ވެށި ރައްކާތެރިކޮށް ދެމެހެއްޓުމަށް ރައްޔިތުން ކުރަމުންދާ މަސައްކަތްތަކަށް އިތުރު ހިތްވަރެއް ލިބިގެންދާނެ ކަމަށް މި ޙަރަކާތް އިންތިޒާމުކުރި ފަރާތްތަކުން މަޢުލޫމާތު ދެއެވެ.
