އުތުރު ޚަލީޖު އަރަބި ކަނޑުގައި ޤާނޫނާ ޚިލާފަށް ތެޔޮ އުފުލުމުގައި ހަރަކާތްތެރިވި ހަތަރު އުޅަނދަކަށް އީރާނުގެ ރިލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ކަނޑުގެ ސިފައިން އެއްފަހަރާ ހަމަލާދީފިއެވެ. މި ހަމަލާގައި އެ އުޅަނދުފަހަރުގައި އަލިފާން ރޯވެ ގެއްލުންތައް ލިބިފައިވާ ކަމަށް އައި.އާރު.ޖީ.ސީ އިން ވަނީ ބުނެފައެވެ. އީރާނުން ތުހުމަތުކުރާ ގޮތުގައި މިއީ އެމެރިކާގެ އަމަލެކެވެ.
މީގެ އިތުރުން ހުރްމުޒް ކަނޑުއޮޅީގެ ހުޅަނގު ފަރާތުގައި އިތުރު ތިން ބޯޓެއް ވަނީ މައިންގައި ޖެހި އެކްސެޑެންޓްވެފައި ކަމަށް ވެސް އީރާނުން ވަނީ ބުނެފައެވެ.
އެމެރިކާގެ އަސްކަރިއްޔާއިން މިފަދަ ކަންކަން ތަކުރާރުކޮށް ހިންގަމުންދާނަމަ، ސަރަޙައްދުގައި ހުރި އެމެރިކާގެ އަސްކަރީ މަރުކަޒުތަކަށް ވަރުގަދައަށް ހަމަލާދޭން ޖެހިދާނޭ ކަމުގެ އިންޒާރުވެސް އީރާނުން ވަނީ އެމެރިކާއަށް ދީފައެވެ.
