ލޯކަލް ކައުންސިލް އިންތިޚާބުގެ ޕްރައިމަރީއާ ދިމާކޮށް ގިނަ އަދަދެއްގެ މީހުން ޕީއެންސީއަށް ސޮއިކޮށްފައިވާ ކަމަށް އެޕާޓީގެ ޕީޖީ ގްރޫޕުގެ ލީޑރު އަދި ކައުންސިލް އިންތިކާބުގެ ކެންޕޭން މެނޭޖަރު އިބްރާހީމް ފަލާހު ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން މިއަދު އޭނާ ވިދާޅުވީ އަލަށް ގުޅުނު މެންބަރުންނާއެކު އެޕާޓީގެ މެންބަރުންގެ އަދަދު ހަތްދިހަ ފަސް ހާހަށްވުރެ އިތުރުވާނޭ ކަމަށް ލަފާކުރެވޭ ކަމަށެވެ. އެޕާޓީގެ ދަފްތަރުގައި މިހާރު ހަތްދިހަހާސް މެންބަރުން އެބަތިބި ކަމަށް އޭނާ ވިދާޅުވިއެވެ.
މިހާރުވެސް އެޕާޓީއަށް ސޮއިކުރާ މީހުންގެ އަދަދު ވަރަށްގިނަ ކަމަށާއި މިހާތަނަށް ލިބިފައިވާ މެންބަރޝިޕް ފޯމުތައް ވަރަށް އަވަހަށް އިލެކްޝަންސް ކޮމިޝަނަށް ފޮނުވާނޭ ކަމަށް ވެސް އޭނާ ވިދާޅުވިއެވެ.
