މިއަހަރު ޖަނަވަރީ ސައުވީސް ވަނަ ދުވަހުގެ ނިޔަލަށް މަސްދޯނިފަހަރުން މިފްކޯ އަށް މަސްކިރުވާފައިވާ ދޯނިފަހަރަށް 1.3 މިލިއަނަށްވުރެ ގިނަ ރުފިޔާ ދޫކޮށްފި ކަމަށް މަސްވެރިކަމާ ބެހޭ މުޒާރާއިން ވިދާޅުވެއްޖެއެވެ.

މީގެ ތެރޭގައި މިފްކޯއަށް ކިރުވާ ކަންނެލީގެ ފައިސާ ވެސް ހިމެނޭ ކަމަށް ވިދާޅުވެފައިވެއެވެ. މިފައިސާ ޖަމާކޮށްފައިވަނީ 26 ޖަނަވަރީ 2026 ވަނަ ދުވަހުއެވެ. ކަޅުބިލަމަހާއި ކަންނެލި މަސްދޯނިތައް ހިމެނޭހެން ޖުމްލަ 56 ދޯންޏަކުން ކިރުވި މަހަށް 1،361،613.62 ރުފިޔާ ވަނީ ދޫކޮށްފައި ކަމަށް ވިދާޅުވެފައިވެއެވެ.

މިފްކޯއިން ފައިސާ ދޫކުރި ގޮތުގެ ތަފްސީލަށް ބަލާއިރު، 30 މަސްދޯންޏަކުން ކިރުވި ކަޅުބިލަ މަހަށްވާ 1،170،125.62 ރުފިޔާ ވަނީ ދޫކޮށްފައެވެ. އަދި 16 ދޯންޏަކުން ކިރުވި ކަންނެލި (10 ކިލޯއިން މަތި) މަހަށްވާ 147،585 ރުފިޔާ އާއި 10 ދޯންޏަކުން ކިރުވި ކަންނެލި ( 15ކިލޯއިން މަތި) މަހަށްވާ 43،630.00 ރުފިޔާ ދޫކޮށްފައިވާ ކަމަށް ވެސް ވިދާޅުވެފައިވެއެވެ.

މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދޫކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނުހަނު އިސްކަމެއް ދެއްވައިގެން ކުރިއަށްގެންދަވާ މުހިންމު ސިޔާސަތެކެވެ. މީގެއިތުރަށް މަސްވެރިން ބާނާ މަހަށް ހަމަ އަގު ހޯދައިދިނުމާއި، ފައިސާ ދޫކުރުމުގެ އިންތިޒާމުތައް ހަރުދަނާކޮށް ހަލުވިކުރުމަކީވެސް ސަރުކާރުގެ މުހިންމު ސިޔާސަތެކެވެ.