ރާއްޖޭގެ ބޯޑަރަށާއި މުޖުތަމަޢަށް އަންނަ ނުރައްކާތައް ދެނެގަތުމަށްޓަކައި ކުރީބައިގައި ތައްޔާރަށް ތިބުމަށް ދާޚިލީ ސަލާމަތާއި ފަންނިއްޔަތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
ބައިނަލްއަޤްވާމީ ކަސްޓަމްސް ދުވަސް ފާހަގަކުރުމަށްޓަކައި އިސްކަންދަރު ކޮށީގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ ކަސްޓަމްސް އިން އަބަދުވެސް މަސައްކަތް ކުރަންވާނީ ބޯޑަރުގެ ސަލާމަތާއި ރައްކާތެރިކަން ފޫއަޅުވާލަން މަސައްކަތް ކުރާ މީހުން ދުރާލާ ދެނެގަތުމަށް ކަމަށެވެ.
ރާއްޖެއަށް މުދާ އެތެރެކުރާ ފަރާތްތަކުން މުދާ ގެނައުމުގައި ގެންގުޅޭ އުސޫލުތަކާއި ޑޭޓާ އެނެލައިޒްކޮށް ރިސްކް ދެނެގަންނަން ޖެހޭ ކަމަށް ވެސް ވަޒީރު ވިދާޅުވިއެވެ.
ޓެކްނޮލޮޖީ ގޮތުން ކުރިއަރަމުން އަންނަ އިރު އެއާ އެއްހަމައެއްގައި ފައިތިލަ ސާބިތުކުރުމަކީވެސް މުހިންމު ކަމެއްކަމަށް އެމަނިކުފާނު ވިދާޅުވިއެވެ.
ހަމައެއާއެކުގަ ކަސްޓަމްސްގެ މުވައްޒަފުންނަށްދެވޭ ތަމްރީނަކީ އެތަނުން ބޭނުންކުރާ އެންމެ ފަހުގެ ވަސީލަތްތަކާއި އެކަށީގެންވާ އެންމެ ފަހުގެ ތަމްރީންތަކަށް ވާންޖެހޭ ކަމަށް ވެސް ވިދާޅުވިއެވެ. ”މުދާ ގެންނަ ފަރާތްތައް އަދި ބޯޑަރު ފޫއަޅުވާލަން މަސައްކަތް ކުރާ ފަރާތްތައް ވިސްނާނީ ޒަމާނީ ޓެކްނޮލޮޖީގެ އެހީގައި ގާނޫނަށް ގެންނަ ބަދަލުތައްވެސް އެނގިގެން ބޯޑަރު ފޫއަޅުވާލަން. އަޅުގަނޑުމެން ވާންވާނީ އެއަށްވުރެ ސްމާޓް ބަޔަކަށް. އެހެން ވެގެން ނޫނީ މި ކާވްގެ މައްޗަކަށް ނޭރޭނެ. އަބަދުވެސް މަސައްކަތް ކުރަންވާނީ ކާވްގެ މަތީގަ ތިބެން،“
ވަޒީރު ވިދާޅުވީ މުޅި އަހަރުގެ ތެރޭގައި ނަތީޖާ ނެރޭ މުއައްސަސާއަކަށް ކަސްޓަމްސް ވުމަށްޓަކައިވެސް ބުރަ މަސައްކަތްތަކެއް ކުރަން ޖެހޭ ކަމަށެވެ.
ފާއިތުވި އަހަރަކީ ނަތީޖާ ނެރުނު އަހަރެއްކަން ފާހަގަކުރައްވާ ވަޒީރު ވަނީ އެ ނަތީޖާއާ މެދު ފަޚުރުވެރިވެވަޑައިގަންނަވާ ކަމަށް ވިދާޅުވެފައެވެ.
”ރާއްޖޭގެ ބޯޑަރުގެ ސަލާމަތާއި އަދި ޖުމްލަކޮށް ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ކަސްޓަމްސްގެ މުވައްޒަފުން ރެއާއި ދުވާލު ވަރަށް ބުރަކޮށް އަދި ބައެއް ފަހަރު ވަރަށް ނުރައްކާތެރި ހާލަތްތަކުގަ ތިޔަ ކުރައްވަމުންގެންދަވާ އަގު ހުރި މިންނެތް ޚިދުމަތަށްޓަކައި ރައީސްގެ ނަންފުޅުގަ އާއި މިނިސްޓްރީގެ ހުރިހާ މުވައްޒަފުންގެ ނަމުގަ ޝުކުރު އަދާކުރަން،“
އިންޓަރނޭޝަނަލް ކަސްޓަމްސް ޑޭގެ ޝިޢާރާ ގުޅޭގޮތުން ވާހަކަ ދައްކަވަމުން ވަޒީރު ވިދާޅުވީ ކަސްޓަމްސްގެ މި އަހަރުގެ ތީމަކީ ސަރުކާރުން ކަސްޓަމްސްގެ ފަރާތުން އެދޭ ކަންތައްތައް ވަރަށް ރަނގަޅަށް ސިފަވާ ތީމެއް ކަމަށެވެ.
ކުރީ ޒަމާނުއްސުރެ ކަސްޓަމްސް އަކީ ރެވިނިއު ކަލެކްޝަން އޭޖެންސީއެއްގެ ގޮތުގައި އޮތް އޮތުން ބަދަލުވެ މަޑުމަޑުން ޓްރޭޑް ފެސިލިޓޭޝަންގެ ތެރެއަށް އިތުރަށް ވަދެ އަދި މިހާރު މުޅި ދުނިޔޭގައިވެސް ކަސްޓަމްސްގެ ދައުރު ވަރަށް ބޮޑަށް ފުޅާވެ، ޤާނޫނު ތަންފީޒުވުމާއި ސަލާމަތާއި ރައްކާތެރިކަން ކަށަވަރު ކުރުމުގެ ދާއިރާއިން ވަރަށް ރަނގަޅަށް ހައިލައިޓްކޮށްދޭ. މިއަހަރުގެ ތީމުން މިގޮވާލަނީ މުޖުތަމަޢުގެ ސަލާމަތާއި ރައްކާތެރިކަމަށްޓަަކައި ޕްރޯއެކްޓިވްކޮށް ކަންކަން ދިމާވުމުގެ ކުރިން މަސައްކަތް ކުރުމަށް ކޮމިޓްވުމަށް މި ތީމުން ގޮވާލާ. ވަޒީރު
އެކިއެކި ދާއިރާތަކުން ސެޓްފިކެޓް ހާސިލް ކުރެއްވި ފަރާތްތަކަށާއި އަދި ވަކިން ޚާއްސަކޮށް ކަސްޓަމްސްއަށް ދިގު މުއްދަތެއްގައި ޚިދުމަތް ކުރައްވާ ރަން ބެޖު ލިބިވަޑައިގެންނެވި ފަރާތްތަކުގެ އިތުރުން ކޮމިޝަނަރުގެ އެވޯޑު ހާސިލްކުރެއްވި ފަރާތްތަކަށް ވަޒީރު ވަނީ މަރުހަބާ ދަންނަވާފައެވެ.
މިއަދު ހެނދުނު އިސްކަންދަރު ކޮށީގައި ބޭއްވި މި ރަސްމިއްޔާތުގައި ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ، ޑެޕިއުޓީ ކޮމިޝަނަރ އޮފް ކަސްޓަމްސް އިބްރާހީމް މަފާޒް، ޑެޕިއުޓީ ކޮމިޝަނަރު މަހްމޫދު ރިޔާޒުގެ އިތުރުން ކަސްޓަމްސްގެ އިސްވެރިންނާއި ހޯމް ޓީމުގެ އިސްވެރިންވެސް ބައިވެރިވެވަޑައިގެންނެވިއެވެ.
ކަސްޓަމްސް ދުވަހުގެ މި އަހަރުގެ ޝިޢާރަކީ ’ކަސްޓަމްސް ޕްރޮޓެކްޓިންގ ސޮސައިޓީ ތްރޫ ވިޖިލެންސް އެންޑް ކޮމިޓްމެންޓް‘ އެވެ.
