ރާއްޖޭގެ އެންމެ އުންމީދީ ޓޭބަލް ޓެނިސް ކުޅުންތެރިޔާ، އުމައިރު މުހައްމަދު މުއިއްޒު، 2024 ވަނަ އަހަރުގެ ގައުމީ ކުޅިވަރު އެވޯޑްސްގައި އަހަރުގެ އެންމެ މޮޅު އެންމެ މޮޅު ޒުވާން ތިންވަނަ އެތްލީޓުގެ މަގާމު ކާމިޔާބުކޮށްފިއެވެ. އުމައިރު މި މަގާމު ހާސިލްކުރީ ވޭތުވެދިޔަ ސީޒަނުގައި ގައުމީ ފެންވަރުގެ ގިނަ ކާމިޔާބީތަކެއް ހޯދުމަށްފަހުގައެވެ.

އުމައިރު ވަނީ 62 ވަނަ ގައުމީ ޓޭބަލް ޓެނިސް މުބާރާތާއި 30 ވަނަ ޓޭބަލް ޓެނިސް އެސޯސިއޭޝަން ޗެމްޕިއަންޝިޕްގައި ވާދަކޮށް ގިނަ މެޑަލްތަކެއް ހާސިލްކޮށްފައެވެ. ނަމަވެސް، މި އެވޯޑަށް އުމައިރު ނޮމިނޭޓްވުމާ ގުޅިގެން ސޯޝަލް މީޑިއާގައި އޭނާއަށް ބޮޑެތި ފާޑުކިޔުންތަކާއި ބުލީކުރުންތައް ވަނީ އަމާޒުވެފައެވެ. މި ފާޑުކިޔުންތައް ބޮޑަށް އަމާޒުވެފައިވަނީ އޭނާގެ ކުޅިވަރުގެ ހުނަރަށްވުރެ ބޮޑަށް އޭނާގެ އާއިލީ ފަސްމަންޒަރާ ގުޅުވައިގެންނެވެ.

މިކަމާ ގުޅިގެން ސްޕޯޓްސް ކޮމިޝަނަރު މުހައްމަދު ތޮލާލް އެކްސްގައި ކުރެއްވި ޕޯސްޓެއްގައި ވިދާޅުވީ؛

”ކުޅިވަރުގަ ވާނުވާ ނޭނގި ނަމަވެސް، ކަންކަމުގެ ޙަޤީޤަތް އޮޅުވާލުމުގެ ބޭނުމުގައި އަރަމުން އަންނަ ޒުވާން ކުޅުންތެރިންނަށް ގަނާކޮށް، ފުރާއްސާރަކޮށް، ހަޖޫ ޖެހުމުގެ ސަބަބުން އެ ހަލާކުކޮށްލެވެނީ ޤައުމުގެ ކުޅިވަރުގެ މުސްތަޤްބަލް“ ކަމަށެވެ.

އަދި ކުޅުންތެރިން ބަލައިގަންނަންވާނީ އެމީހުންގެ އާއިލާއަށް ބަލައިގެން ނޫން ކަމަށާއި، ހަމައެކަނި ހުނަރަށް ބަލައިގެން ކަމަށް އޭނާ ވިދާޅުވިއެވެ.

”ވަކި މީހެއްގެ ދަރިއަކަށްވުން، ވަކި ޢާއިލާއަކަށް ނިސްބަތްވުން އެއީ އެ ކުޅުންތެރިއެއްގެ ޙައްޤަކުން މަހްރޫމްވާންޖެހޭ ސަބަބެއް ނޫން. އެ ކުއްޖެއްގެ ހުނަރުން އެ ކުއްޖަކު ހޯދާ ކާމިޔާބީއަކީ އެ ކުއްޖެއްގެވެސް އަދި ޤައުމުގެވެސް ކާމިޔާބީއެއް. އޭގެ ފައިދާވެސް މުސްތަޤްބަލްގައި ކުރާނީ ޤައުމަށް. ކުޅުންތެރިން ހޯދާ ކާމިޔާބީގައި އެ ކުޅުންތެރިންނަށް ހިތްވަރުދީ ކުރިއަށް ދިއުމުގެ މަގު ދައްކައިދިނުމަކީ ކުޅިވަރުގެ މުސްތަޤްބަލް އުޖާލާ ކުރުމަށް އެޅޭ ވަރަށް ހަރުދަނާ ފިޔަވަޅަކަށްވާނެ.“ ތޮލާލް

ޓޭބަލް ޓެނިސް އެސޯސިއޭޝަނުން ބުނެފައިވަނީ އުމައިރު ނޮމިނޭޓް ކުރީ 2024 ވަނަ އަހަރު އޭނާ ހޯދާފައިވާ ނަތީޖާތަކަށް ބަލައިގެން ކަމަށެވެ.

އުމައިރަށް ވަނީ މީގެ ކުރިންވެސް ހަނގާކުރުމާ ކުރިމަތިލާން ޖެހިފައެވެ. އެކަމާ ގުޅިގެން މީގެ ކުރިން ފަސްޓް ލޭޑީވެސް ވަނީ ކަންބޮޑުވުން ފާޅުކުރައްވާފައެވެ. އެކަމަނާ ވިދާޅުވީ ސިޔާސީ ބޭނުމަށްޓަކައި ދޮގު ވާހަކަ ފަތުރައިގެން ކުޑަކުދިންނަށް އަމާޒުކޮށްދޭ ހަމަލާތަކުގެ ސަބަބުން އެކުދިންގެ ތައުލީމާއި ރައްކާތެރިކަމަށް ނޭދެވޭ އަސަރު ކުރާނެ ކަމަށެވެ.

މި އަހަރުގެ އެވޯޑް ހަފްލާގައި އެންމެ މޮޅު އަންހެން ކުޅުންތެރިޔާގެ މަގާމު ފާތިމަތު ދީމާ އަލީ ދިފާއުކުރިއިރު، އެންމެ މޮޅު ފިރިހެން ކުޅުންތެރިޔަކަށް ހޮވުނީ މޫސާ މުންސިފް އަހުމަދެވެ. މީގެ އިތުރުން ނޮން-އޮލިމްޕިކް ކުޅިވަރުތަކުން އެންމެ މޮޅު ކުޅުންތެރިންގެ މަގާމު ހޯދީ ބޮޑީބިލްޑަރު އަޒްނީން ރަޝީދާއި ނެޓްބޯޅަ ކުޅުންތެރިޔާ އީމާ އަބްދުއްސައްތާރެވެ.

މޯލްޑިވްސް ސްޕޯޓްސް އެވޯޑްސްއަކީ ރާއްޖޭގެ ކުޅިވަރުގެ ދާއިރާގައި ފާހަގަކޮށްލެވޭ ކާމިޔާބީތައް ހޯދާ ކުޅުންތެރިންނާއި، ކޯޗުން އަދި އޮފިޝަލުންގެ އަގުވަޒަންކުރުމަށް ބާއްވާ އެންމެ ޝަރަފުވެރި ހަފްލާއެވެ.