ފަސް ސަތޭކަ މިލިއަން ޑޮލަރުގެ ސުކޫކު، އަންނަ އޭޕްރިލް އަށްވަނަ ދުވަހު ދެއްކެވުމަށް ސަރުކާރުން ނިންމަވާފައިވިޔަސް، އެ ސުކޫކު މިއަދު ދައްކަންޖެހުނަސް ދެއްކޭނޭ މިންވަރަށް ފައިސާ އެބަހުރި ކަމަށް ރައީސް ޑރ. މުޙައްމަދު މުޢިއްޒު ވިދާޅުވެެއްޖެއެވެ. ރައީސް ވިދާޅުވީ ރާއްޖޭގެ ގްރޮސް ރިޒަރވް މިހާރު ހުރީ ރިޔާސީ ބަޔާނުގައި ފާހަގަކުރެއްވި މިންވަރަށްވުރެވެސް މަތީގައި ކަމަށެވެ.
ނޫސްވެރިންނާ ބައްދަލު ކުރައްވައި އެމަނިފާނު މިއަދު ވިދާޅުވީ މި ފައިސާ ދެއްކެވުމަށްޓަކައި 650 މިލިއަން ޑޮލަރަށްވުރެ ބޮޑުއަދަދެއް މިހާރުވެސް ރައްކާކުރެވިފައިވާ ކަމަށެވެ. 500 މިލިއަން ޑޮލަރުގެ ސުކޫކު ދެއްކެވުމުންވެސް، 150 މިލިއަން ޑޮލަރަށްވުރެ ބޮޑުއަދަދެއް ބާކީ ހުންނާނެ ކަމުގައި ރައީސް ވިދާޅުވިއެވެ. މިގޮތުން ސޮވްރިން ޑިވަލޮޕްމަންޓް ފަންޑް (އެސް.ޑީ.އެފް) ގައި، 320 މިލިއަން ޑޮލަރަށްވުރެ ގިނައިން މިހާރުވެސް އެބަހުރިކަމަށާއި، ޔޫޒަބަލް ރިޒާވްގެ ގޮތުގައި 330 މިލިއަން ޑޮލަރަށްވުރެ ބޮޑުއަދަދެއް އެބަހުރިކަމުގައި އެމަނިކުފާނު ވިދާޅުވިއެވެ.
ރައީސް ވިދާޅުވީ ދިވެހިރާއްޖޭގެ ތާރީޚުގައިވެސް ގްރޮސް ރިޒާވް ގޮސްފައިނުވާހާ މަތީ މިންވަރަކަށް އެ ޢަދަދު ގެންދެވިފައިވާކަމުގައެވެ. ރިޔާސީ ބަޔާނުގައި ދެންނެވި ގްރޮސް ރިވާޒްގެ މިންވަރަކީވެސް ރެކޯޑެއްކަން ފާހަގަކުރައްވަމުން އެމަނިކުފާނު ވިދާޅުވީ، ދިވެހިރާއްޖޭގެ ގްރޮސް ރިޒާވް މިހާރު އެ ރެކޯޑަށްވުރެވެސް މައްޗަށް ގެންދެވިފައިވާކަމުގައެވެ. އެގޮތުން 1.27 ބިލިއަން ޑޮލަރަށް މި ޢަދަދު މިހާރު އަރާފައިވާކަމަށް ވިދާޅުވިއެވެ. މިކަންމިހެން އޮތުމީ، މެދުއިރުމަތީގައި މިހާރު ހިނގަމުންދާ ކަންކަމާ ގުޅިގެން ކުރާ އަސަރުތައް މެނޭޖުކުރުމަށް ލިބޭ ލުޔެއްކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
އިތުރު ފައިސާ ހޯދުމުގެ ކާމިޔާބު މަސައްކަތްތަކެއް، ކަމާބަހާ ފަރާތްތަކާއެކު މަޝްވަރާކުރެވިގެން ކުރިއަށްގެންދަވާ ކަމަށް ވެސް ރައީސް ވަނީ ވިދާޅުވެފައެވެ. ނިމުމަކާ ހިސާބަށް މި މަޝްވަރާތައް ގޮސްފައިވާކަމަށާއި، ބޭރުގެ ދަރަނި ދެއްކެވުމުގައި ދިވެހިރާއްޖެއަށް އެއްވެސް ވަރެއްގެ ކަންބޮޑުވުމެއް މިހާރުނެތްކަމަށް ރައީސް ވިދާޅުވިއެވެ.
ބޭރުގެ ފަރާތްތަަކަށް ދައްކަންޖެހޭ ފައިސާގެ އިތުރުން ރާއްޖޭގެ އެތެރޭގެ ފަރާތްތަކަށް ދޭން ހުރި ފައިސާއެއް ވެސް ދައްކަވަމުން ގެންދަވާ ކަމަށް ރައީސް ވިދާޅުވިއެވެ. އެގޮތުން، ކުރިއަށް އޮތް ހަފުތާއަކީވެސް ރާއްޖޭގައި މަސައްކަތްކުރާ ކުދި ވިޔަފާރިތައް މެދުވެރިކޮށް ސަރުކާރުން ކުރުވާފައިވާ މަސައްކަތްތަކަށް، މަދުވެގެން 200 މިލިއަނެއްހާ ރުފިޔާ ދެވޭނެ ހަފުތާއެއްކަމުގައި ވިދާޅުވިއެވެ.
