އަވަށްޓެރި އިންޑިއާގެ މިލިޓަރީ ސިފައިން ދިވެހިރާއްޖޭގައި ތިބުމުގެ ނުރައްކާ ކުރީގެ ހޯމް މިނިސްޓަރު ޢުމަރު ނަސީރު ވިދާޅުވެދެއްވައިފިއެވެ. މެދުއިރުމަތީގައި މިހާރު ހިނގަމުންދާ ބިރުވެރި ހަނގުރާމައާ ގުޅުވައި ޢުމަރު ވިދާޅުވެފައިވަނީ މިއީ އިންޑިއާ ސިފައިން ރާއްޖޭގައި ތިބުމާމެދު ވިސްނާލަން ރަނގަޅު ވަގުތެއް ކަމަށެވެ.
އެކްސް މެދުވެރިކޮށް ހާމަކުރެއްވި ލިޔުމެއްގައި ޢުމަރު ވިދާޅުވެފައިވަނީ އެމެރިކާގެ އަސްކަރީ މަރުކަޒުތައް މެދުއިރުމަތީގައި ގާއިމްކޮށްފައިވާ ޤައުމުތަކަށް އީރާނުން މިހާރުވެސް ދަނީ ވަރުގަދަ ޙަމަލާ ދެމުން ކަމަށެވެ. އެހެންނަމަވެސް އެ ޤައުމުތަކަކީ ސީދާ މި ހަނގުރާމައިގައި ބައިވެރިވާ ޤައުމުތަކެއް ނޫން ކަމަށް އޭނާ ވިދާޅުވެފައިވެއެވެ. އެފަދަ ޤައުމުތަކަށް އިރާނުން ޙަމަލާ ދެމުން ގެންދަނީ އީރާނަން ޙަމަލާ ދިނުމަށް އެޤައުމުތަކުގައި ޤާއިމްކޮށްފައިވާ އެމެރިކާގެ އަސްކަރީ މަރުކަޒުތައް ބޭނުން ކުރުމުގެ ހުއްދަ އެމެރިކާއަށް އެ ޤައުމުތަކުން ދީފައިވާތީއެވެ. އެހެންކަމުން މިއީ ރާއްޖޭގައި ތިބި ބޭރުގެ ސިފައިންނާމެދު ފުންކޮށް ވިސްނާލަންވީ ވަގުތު ކަމަށް އޭނާ ވިދާޅުވެފައިވެއެވެ.
ޢުމަރު ވިދާޅުވެފައިވަނީ އިންޑިއާއި އެހެން ޤައުމަކާ ދެމެދު ބޮޑު ހަނގުރާމައެއް ފަށައިފިކަމަށްވާނަމަ ރާއްޖޭގެ ތިން ސަރަހައްދެއްގައި ގާއިމްވެތިބި އިންޑިއާ ސިފައިންނާއި އެމީހުންގެ އަސްކަރީ އާލާތްތައްހުރި ރަށްތަކަށް އިދިކޮޅު ޤައުމުން ޙަމަލާދޭނެ ކަމީ ކަށަވަރު ކަމެއް ކަމަށެވެ.
މިފަދަ ޙާލަތެއް މެދުވެރިވެއްޖެ ކަމަށްވާނަމަ (ރާއްޖެ ބައިވެރި ނުވިޔަސް) އެތައް ބައެއްގެ ފުރާނަ ގެއްލި ރަށްރަށް ހަލާކުވެގެންދާނޭ ކަމަށް އޭނާ ވިދާޅުވެފައިވެއެވެ. އަދި ފަތުވެރިކަން ”ފުނޑި“ އިޤްތިސާދީ ގޮތުން ބޮޑެތި ގެއްލުން ރާއްޖެއަށްވާނޭ ކަމަށް ވިދާޅުވިއެވެ. އޭގެ އިތުރުން އިޤްތިސާދީ އެހެނިހެން ސިނާޢަތްތައް ވެސް ހަލާކުވެ ރާއްޖެ ސުންނާފަތިވެދާނޭ ކަމަށް ޢުމަރު ވިދާޅުވެފައިވެއެވެ.
އަބަދުވެސް ޢުމަރު ވިދާޅުވަމުން ގެންދަވަނީ އިންޑިއާގެ އަސްކަރިއްޔާ ރާއްޖޭގައި އޮތުމަކީ ރާއްޖޭގެ މިނިވަންކަމާއި އަމާންކަމާއި އަމިއްލަވަންތަކަމަށް ނުރައްކާވާނޭ ކަމެއް ކަމަށެވެ. އެހެން ކަމުން އިންޑިއާގެ އަސްކަރިއްޔާގެ ސިފައިން ރާއްޖެއިން ފޮނުވާލަން ޖެހޭ ކަމަށް އޭނާ ވިދާޅުވެފައިވެއެވެ.
