ރ. އިންނަމާދޫގައި ޓެކްނިކަލް ވޮކޭޝަން އެޑިޔުކޭޝަން އެންޑް ޓްރެއިނިންގ(ޓިވެޓް) ސެންޓަރެއް ބިނާކުރުމަށް ނިންމައި އެމަސައްކަތުގެ އެއްބަސްވުމުގައި ސޮއިކޮށްފިއެވެ.

އިންނަމާދޫ ޓިވެޓް ސެންޓަރު ޚާއްޞަކުރެވިފައިވަނީ ރާއްޖޭގެ ސަގާފީ އަދި އިޤްތިޞާދީ ގޮތުން މުހިންމު ދާއިރާއެއް ކަމަށްވާ ބޯޓް-ބިލްޑިންގ ނުވަތަ ދޯނިފަހަރު ބަނުމުގެ ދާއިރާއިން މީހުން ތަމްރީނު ކުރުމަށް ކަމަށް މަތީތައުލީމާއި މަސައްކަތްތެރިކަމާއި ހުނަރުތައް ތަރައްގީ ކުރުމާބެހޭ ވުޒާރާއިން ވިދާޅުވިއެވެ. އެ ވުޒާރާއިން ވިދާޅުވެފައިވަނީ މަސައްކަތުގެ ދުވެލި އަވަސްކުރުމުގެ ގޮތުން އެ އިމާރާތް ތައްޔާރުކުރާނީ ޕްރީ-ފެބް އުސޫލުން ކަމަށެވެ. އެ އިންސްޓިޓިއުޓްގައި ކިޔަވައިދިނުމަށް ބޭނުންވާނެ އެންމެހާ ޒަމާނީ ވަޞީލަތްތައް ވެސް ޤާއިމުކުރެވޭނޭ ކަމަށް ވިދާޅުވެފައިވެއެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކުރެވިފައިވަނީ ސެންޓްރަލް ލައިން ޕްރައިވެޓު ލިމިޓެޑާއެވެ.

ހުޅުދުއްފާރު އެކަމަޑޭޝަން ފެސިލިޓީ އަކީ ދަރިވަރުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ތަރައްޤީކުރާ ތަނެއް ކަމަށް އެ ވުޒާރާއިން ވިދާޅުވެފައިވެއެވެ. މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަން ހިމެނެއެވެ. އެގޮތުން ދަރިވަރުންގެ އާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން ދިރިއުޅެވޭނެ ސްޓޫޑިއޯ އެޕާޓްމަންޓްތައް ހުންނާނޭ ކަމަށް ވެސް ވިދާޅުވެފައިވެއެވެ. ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އަސާސީ ހުރިހާ ޚިދުމަތްތަކެއް ލިބެން ހުންނާނެއެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކޮށްފައިވަނީ އެމް.ޓީ.ސީ.ސީ އާއެވެ.