އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އެ ގައުމުގެ ނިއުކްލިއާ ސިޔާސަތަށް ބޮޑެތި ބަދަލުތަކެއް އަންނާނެ ކަމަށް ދުނިޔޭގެ މަސްރަހު ދިރާސާކުރާ ފަރާތްތަކުން މިހާރު ދަނީ ބުނަމުންނެވެ.
ޚާމަނާއީގެ ވަކިވުމާއެކު، އާ ރޫހާނީ ލީޑަރަކު އިންތިޚާބު ކުރެވުމުން، ނިއުކްލިއާ ހަތިޔާރު އުފެއްދުން މަނާކޮށް ޚާމަނާއީ ކުރިން ނެރުއްވާފައިވާ ފަތުވާ މިހާރު ވަނީ އުވިގެން ގޮސްފައެވެ. ގިނަ ބަޔަކު ލަފާކުރާ ގޮތުގައި، އީރާނުގެ އާ ލީޑަރާއެކު ދެން އެ ގައުމުން އިސްކަންދޭނީ ދިފާއީ ރައްކާތެރިކަން ވަރުގަދަކުރުމުގެ ގޮތުން ނިއުކްލިއާ ހަތިޔާރު އުފެއްދުމަށެވެ.
މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި:
އީރާނުގެ ’ނިއުކްލިއާ ޑޮކްޓްރިން‘ ނުވަތަ ނިއުކްލިއާ އަގީދާ ބަދަލުކުރުމަކީ މިހާރު ވަރަށް ގާތް ކަމެކެވެ.
ސަރަހައްދީ ހަމަނުޖެހުންތަކާއި ކުރިމަތިވަމުންދާ ނުރައްކާތަކުން ސަލާމަތްވުމަށް، އީރާނުން ދެން މިސްރާބު ޖަހާނީ ނިއުކްލިއާ ބޮމެއް އުފެއްދުމާ ދިމާލަށެވެ.
މިއީ މުޅި މެދުއިރުމަތީގެ ބާރުގެ މިޒާން ބަދަލުވެގެންދާނެ ނިންމުމަކަށް ވެދާނެއެވެ.
ދުނިޔޭގެ ސިޔާސީ މަސްރަހު މިހާރު އޮތް ނުތަނަވަސް ހާލަތަށް ބަލާއިރު، އީރާނުން ނިއުކްލިއާ ބާރަކަށް ވުމަށް ކުރާ މި ދަތުރަކީ ހަގީގަތަކަށް ވުން ވަރަށް ގާތެވެ.
