ކުދިންގެ ހަސަބާއި ނަސަބަށް ބެލުމެއްނެތި، ހުރިހާކުދިން ޝާމިލުވާގޮތަށް ކޮންމެ ކުއްޖަކާ ހިސާބަށް ތައުލީމުގެ ފުރުސަތު ވާސިލުވާން ބޭނުންފުޅުވާކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.

މިއަދު ހެނދުނު ސެންޓަރ ފޮރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ) ގައި ބޭއްވި 7 ވަނަ ”އިންޓަރނޭޝަނަލް ޓީޗަރސް ކޮންފަރެންސް“ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން އެކަމަނާ ވިދާޅުވީ މުހިންމު މި ފުރުސަތު ފަހިކޮށްދީ، ކޮންމެ ކުއްޖަކުމެ ތައުލީމުގައި ޝާމިލުވާކަން ޔަގީންކުރުމަކީ ދިވެހިރާއްޖޭގެ ތައުލީމު ކުރިއެރުވުމުގައި އަބަދުވެސް އިސްކަންދެމުންއައި ގޮތް ކަމަށެވެ.

‎ތައިލީމީ ދާއިރާ ކުރިއެރުވުމަށް މުދައްރިސުންގެ ދުޅަހެޔޮކަން ވަރަށް މުހިންމު ކަމަށް ވެސް މެޑަމްވިދާޅުވިއެވެ. އެކަން އެގޮތަށް ކުރުމަށްޓަކައި މުދައްރިސުން ސްކޫލްގައި ހޭދަކުރަންޖެހޭ ވަގުތު ވަކިވަރެއްގައި ހިފެހެއްޓުމާއި ކިޔަވައިދިނުމުގައި ހަރަކާތްތެރިވާ ފަންނީ ބޭފުޅުންގެ އިދާރީ މަސައްކަތްތައް މަދުކޮށް، އުނގަންނައިދިނުމުގެ ކަންކަމަށް އިތުރަށް ސަމާލުކަން ދިނުމަށް ވަގުތު ހުސްކޮށްދިނުމަކީ މުހިންމު ކަމެއްކަމަށް ވެސް ވިދާޅުވިއެވެ.

މުދައްރިސުންނަށް ފަންނީ ތަރައްގީގެ ފުރުސަތުތައް ފަހިކޮށްދީ، މަސައްކަތު ބައްދަލުވުންތައް ކުރިޔަށްގެންގޮސް، ތާޒާކުރުމުގެ ޕްރޮގްރާމުތައް ރާވައި ހިންގުމާއި ނަފްސާނީ ދުޅަހެޔޮކަމަށް އެހީތެރިކަން ފޯރުކޮށްދިނުމަކީ ވެސް މުހިންމު ކަންކަން ކަމަށް މެޑަމް ވިދާޅުވިއެވެ.

‎އެކަމަނާ ވިދާޅުވީ ރާއްޖޭގެ ރަށްތައް ވަކިވަކިން ހުރުމުގެ ސަބަބުން ތައުލީމީ ނިޒާމް ހަރުދަނާ ކުރުމަށް ގޮންޖެހުންތަކެއް އެބަހުރި ކަމަށެވެ. ޚާއްސަކޮށް ރަށްފުށުގެ ތައުލީމީ ނިޒާމު ހަރުދަނާކުރުމަށް ވެސް ގޮންޖެހުންތައް އެބަހުރި ކަމަށް ވިދާޅުވިއެވެ. އެހެން ކަމުން އެފަދަ ގޮންޖެހުންތައް ނައްތާލުމަށް، އެކުގައި މަސައްކަތްކޮށް، ބިނާކުރަނިވި ހައްލުތައް ހޯދައި، ތައުލީމީ ވަސީލަތްތަކާއި، ގޮތްތަކާއި، ފުރުސަތު އިތުރުކުރުމަށްޓަކައި ޓެކްނޮލޮޖީގެ ދައުރު މުހިންމު ރޯލެއް އަދާކުރާނޭ ކަމަށް މެޑަމް ވިދާޅުވިއެވެ.

މި ކޮންފަރެންސަކީ މުޅި ރާއްޖޭގެ އެކި ސަރަހައްދުތަކުން އުނގަންނައިދޭ ފަރާތްތަކާއި ސިޔާސަތު ކަނޑައަޅާ ފަރާތްތަކުގެ އިތުރުން ކަމާ ގުޅުންހުރި ބޭފުޅުން އެއްތަނަކުން ބައްދަލުވެ ފުޅާދާއިރާއެއްގައި މަޝްވަރާކުރެވޭނެ ބައްދަލުވުމެއް ކަމަށް ރައީސް އޮފީހުން ވިދާޅުވެފައިވެއެވެ.

މި ކޮންފަރެންސްގައި އެޑިއުކޭޝަން މިނިސްޓަރ ޑޮކްޓަރ އިސްމާއީލް ޝަފީޢު ވަނީ ރައީސުލްޖުމްހޫރިއްޔާގެ އަނބިކަނބަލުންނަށް ހަނދާނީ ފިލައެއް އަރުވާފައެވެ.