ބޭރުފައިސާއާ ބެހޭ ގަވާއިދާއި މަނީޗޭންޖިންގ ވިޔަފާރިއާ ބެހޭ ގަވާއިދަށް ސަރުކާރުން ގެނައި ބަދަލުތަކުގެ ސަބަބުން ރާއްޖޭގެ އިގްތިސާދުގެ އެންމެ ބޮޑު ސިނާއަތަށް އަސަރުކޮށް މުޅި އިގްތިސާދަށް ގެއްލުންވާނޭ ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބުދުﷲ ޝާހިރު ވިދާޅުވެއްޖެއެވެ.

މާލީ އިދާރާތަކުން ދައްކަންޖެހޭ ފީތައް ބޮޑުކޮށް، ބޭރު ފައިސާ މާރުކުރާ ތަންތަނުގައި ބިދޭސީންނަށް މަސައްކަތް ނުކުރެވޭ ގޮތަށް ސަރުކާރުން އިއްޔެ ވަނީ އެގަވާއިދު އިސްލާހުކޮށްފައެވެ.

އެކަމާ ގުޅިގެން ޝާހިދު މިއަދު ކުރެއްވި ޓްވީޓެއްގައި ވިދާޅުވީ، ގަވާއިދަށް އެ ބަދަލު ގެނެސްފައިވަނީ ކަމާގުޅުންހުރި ފަރާތްތަކާއި މަޝްވަރާކޮށްގެން ނޫންކަމަށްވާތީ ކަންބޮޑުވާ ކަމަށެވެ.

”މިކަމުގެ ސީދާ އަސަރު ކުރާނެ އެއްބަޔަކީ ރާއްޖޭގެ އެންމެބޮޑު ސިނާއަތު ކަމުގައިވާ ފަތުރުވެރިކަމަށް ވާއިރު، ރިސޯޓުތަކާއި ގެސްޓްހައުސްތަކާއި އަދި ލިވަބޯޑުގެ މަޝްވަރާ ހޯދާ އަދި އެފަރާތްތަކުގެ ކަންބޮޑުވުން ތަކަށް ސަރުކާރުން ރިއާޔަތް ކުރުމަކީ މުހިންމުކަމެކެވެ،“

ދިމާވެފައިވާ މައްސަލައަށް ހައްލު ހޯދުމަށް އަޅާ ފިޔަވަޅެއްގެ ސަބަބުން އެންމެ ބޮޑު ސިނާއަތަށް ގެއްލުމެއްލިބުމަކީ މައްސަލަ ހައްލުވުމުގެ ބަދަލުގައި މުޅި އިގްތިސާދަށް އިތުރު ގެއްލުން ލިބިދާނެކަމެއް ކަމަށްވެސް ޝާހިދު ވިދާޅުވިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރޭ ވަނީ އާ ގަވާއިދެއްގެ ގޮތުގައި ”މަނީ ޗޭންޖިން ވިޔަފާރިއާ ބެހޭ ގަވާއިދު“ އާންމުކޮށްފައެވެ.

އެ ގަވާއިދުގައި ބަޔާންކޮށްފައިވާ ގޮތުން އެމްއެމްއޭ އިން ދެން ދޫކުރާނީ ޓިއަ 1 މަނީ ޗޭންޖިން ލައިސަންސް (ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސް) އަދި ޓިއަ 2 މަނީ ޗޭންޖިން ލައިސަންސް (ބޭރު ފައިސާ ވިއްކުމުގެ ވިޔަފާރިކުރުމުގެ ލައިސަންސް) އެވެ.

ގަވާއިދުގައިވާ ގޮތުން ޓިއަ 1 ގެ ދަށުން ލައިސެންސް ދޭނީ ކުންފުނީގެ ގާނޫނުގެ ދަށުން ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމަށް އުފައްދާފައިވާ ކުންފުނިތަކަށެވެ. އެ ކުންފުނީގެ ވެރިމީހާއަކީ ދިވެއްސަކަށް ވާން ޖެހޭނެ ކަމަށް ގަވާއިދުގައިވެއެވެ. ޓިއަ 1 ގެ ދަށުން ލައިސަންސް ދެނީ ފަސް އަހަރުގެ މުއްދަތަކަށް ކަމަށާއި އެ ވިޔަފާރީގައި ހަރަކާތްތެރިވާ ހުރިހާ މުވައްޒަފުން ވެސް ވާން ޖެހެނީ ދިވެހިންނަށް ކަމަށް ގަވާއިދުގައިވެއެވެ.

ޓިއަ 1 ގެ ދަށުން އެޕްލިކޭޝަން ފީގެ ގޮތުގައި 20،000 ރުފިޔާ، ލައިސަންސް އަހަރީ ފީގެ ގޮތުގައި 24،000 ރުފިޔާ ދައްކަން ޖެހޭނެ ކަމަށް ގަވާއިދުގައިވެއެވެ. އަދި ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތް ކުރެވޭނީ 50،000 ރުފިޔާ ނުވަތަ އެއަށް ޖެހޭ ބޭރު ފައިސާގެ އަދަދަކަށް ކަމަށް ގަވާއިދުގައި ވަނީ ބަޔާންކޮށްފައެވެ.

ޓިއަ 2 ގައި ހިމެނެނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ނުވަތަ ލައިސެންސް ލިބިފައިވާ ކުންފުނިތަކަށް ކަމަށް ގަވާއިދުގައިވެއެވެ. ޓިއަ 2 ގެ ދަށުން ލައިސެންސް އެޕްލިކޭޝަން ފީގެ ގޮތުގައި ދައްކަން ޖެހޭނީ 1،300 ޑޮލަރު އަދި ލައިސެންސް އަހަރީ ފީގެ ގޮތުގައި 1،800 ޑޮލަރު ކަމަށް ގަވާއިދުގައިވެއެވެ. ޓިއަ 2 ގައި ހިމެނޭ ފަރާތްތަކުން ބޭރު ފައިސާ ވިއްކުމުގެ މުއާމަލާތް ކުރަންވާނީ ބޭންކެއް މެދުވެރިކޮށް ނުވަތަ ޓިއަ 1 ގައި ހިމެނޭ ފަރާތަކާއެކު ކަމަށް ވެސް ގަވާއިދުގައިވެއެވެ. ލައިސެންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ބަހައްޓަން ޖެހޭނެ ކަމަށް ގަވާއިދުގައި ވަނީ ބަޔާންކޮށްފައެވެ.

ނަމަވެސް ރާއްޖޭގައި ހިންގާ ބޭންކުތަކުގެ މައްޗަށް ”މަނީ ޗޭންޖިން ވިޔަފާރިއާ ބެހޭ ގަވާއިދު“ ނުހިނގާނެ ކަމަށް އެ ގަވާއިދުގައި ވަނީ ބަޔާންކޮށްފައެވެ.