މިވަގުތު ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑް (އެފްއެސްއެމް) ގެ އިންވެސްޓިގޭޝަން ސްޕެޝަލިސްޓްގެ ގާމަށް މީހަކު އައްޔަން ނުކުރަން ވަޒީފާއާބެހޭ ޓްރައިބިއުނަލުން އަމުރު ކޮށްފިއެވެ.

އެ ޓްރައިބިއުނަލުން މިގޮތަށް އަމުރުކުރީ އެ ޓްރައި ބިއުނަލަށް ހުށަހަޅާފައިވާ މައްސަލައަކާ ގުޅިގެންނެވެ.

އެއީ މީގެކުރިން އެ މަގާމުގައި ހުރި، ގދ. ފިޔޯރީ ކެކުރި އާޒިމް ހަބީބު މިދިޔަ އޯގަސްޓްމަހުގެ 23 ގައި ގާނޫނާ ހިލާފަށް ވަޒީފާއިން ވަކި ކޮށްފައިވާކަމަށްބުނެ މިދިޔަ ސެޕްޓެމްބަރު މަހުގެ 12 ގައި ހުށަހެޅި މައްސަލައަކާ ގުޅިގެންނެވެ.

އެ މައްސަލައިގައި ޓްރައި ބިއުނަލްގައި އާޒިމް އެދިފައިވަނީ، އޭނާ ވަޒީފާއިން ވަކިކޮސްފައިވަނީ ގާނޫނާއި ގަވާއިދާ ހިލާފަށް އަދި މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއްނެތި ކަމަށް ކަނޑައަޅައި ދިނުމަށެވެ. އޭގެ އިތުރުން އޭނާ އަދާކުރަމުންދިޔަ މަގާމު، ނުވަތަ އެ މަގާމާ އެއްވަރުގެ މަގާމެއް އެފްއެސްއެމް އިން ހަމަޖައްސައިދިނުމަށް އަމުރުކޮށްދިނުމަށާއި، އޭނާއަކީ ވަޒީފާއިން ވަކިވެފައިވާ ފަރާތެއް ކަމަށް ނުބެލުމާއި، ވަޒީފާއިން ވަކިކުރި ތާރީހުން ފެށިގެން ވަޒީފާ އިއާދަކުރާ ތާރީހާ ހަމައަށް އޭނާ އަށް މުސާރަ އާއި އިނާޔަތުގެ ގޮތުގައި ލިބެންޖެހޭ ފައިސާ އެކީ އެއްފަހަރާ ދިނުމަށް އެފްއެސްއެމް ގެ މައްޗަށް އަންގައި އަމުރުރުކޮށްދިނުމަށްވެސް ވަނީ އެދިފައެވެ. އަދި އޭނާގެ ވަޒީފާ އަނބުރާ އިއާދަކުރާނެ ހާލަތެއް ނެތްކަމަށް ކަނޑައަޅައިފި ހިނދެއްގައި، ގާނޫނާހިލާފަށް އޭނާ ވަޒީފާއިން ވަކި ކޮށްފައިވާތީ ބަދަލުގެ ގޮތުގައި، ވަޒީފާއާބެހޭ ގާނޫނާއި މަތީ މަރުހަލާގެ ކޯޓުތަކުން ނިންމާފައިވާ ނިންމުންތަކަށް ރިއާޔަތްކޮށް އެއް އަހަރު ދުވަހުގެ މުސާރަ އާއި އިނާޔަތްތައް ނަގައިދީ، އެ ފައިސާ އެކީ އެއްފަހަރާ ދެއްކުމަށް އަމުރުކޮށްދިނުމަށްވެސް ޓްރައިބިއުނަލްގައި އޭނާ ވަނީ އެދިފައެވެ.

މި މައްސަލައިގައި ޓްރައިބިއުނަލުން ގޮތެއް ކަނޑައަޅަންދެން އިންވެސްޓިގޭޝަން ސްޕެޝަލިސްޓްގެ ގާމަށް މީހަކު އައްޔަން ނުކުރުމަށް އަމުރުކޮށްދިނުމަށްވެސް އާޒިމް ވަނީ ޓްރައި ބިއުނަލްގައި އެދިފައެވެ.

ސަބަބެއް ކަމަށް އޭނާ ބުނެފައިވަނީ، މި މައްސަލަ ވަކި ގޮތަކަށް ނިމުމުގެކުރިން ވަޒީފާއާބެހޭ އާއްމު ގަވާއިދުގައި ބަޔާންކޮށްފައިވާ 12 މަސްދުވަހުގެ މުއްދަތު ހަމަވެއްޖެނަމަ، އެހާލަތުގައި ރިޑަންޑަންޓް ކުރެވޭ މަގާމަށް މީހުން އައްޔަން ކުރުމަށް ގާނޫނާއި ގަވާއިދުގައި ކަނޑައަޅާފައިވާ މުއްދަތު ހަމަވެއްޖެކަމަށް ނިންމުމުގެ ފުރުސަތު އެބައޮތް ކަމަށެވެ. އެފްއެސްއެމް އިން އެގޮތަށް ނިންމައިފިނަމަ، އެކަމުގެ ނަތީޖާއަކަށްވާނީ އޭނާ ވަޒީފާ އަދާލުރަމުންދިޔަ މަގާމަށް އެހެންމީހަކު އައްޔަން ކުރުމަށް އެފްއެސްއެމަށް ފުރުސަތު ފަހިވެގެންދިއުން ކަމަށް ވެސް ބުނެފައިވެއެވެ.

އެގޮތަށް ކަން ހިނގައިފިނަމަ މި މައްސަލައިގައި ޓްރައިބިއުނަލން ނިންމާ ނިންމުން ތަންފީޒު ކުރުމަށް ހުރަސްއެޅި އެ ނިނުމުގެ ބާރު ކެނޑި މުޅި މައްސަލަ، ފައިސަލާ ކުރުމުގެ ބޭނުން ކެނޑިގެން ހިނގައިދާނެ ކަމަށްވެސް ބުނެފައިވެއެވެ. އަދި އޭނައަށް ގާނޫނުން ކަށަވަރު ކޮށްދީފައިވާ އަދާލަތުގެ ހަމަތަކާ ގުޅިގެން އުފެދޭ ހައްގުތައް ލިބިދިނުމުގައި ހުރަސްތައް ކުރިމަތިވެގެންދާނެ ކަމަށާއި، އެފަދަ ހާލަތެއް މެދުވެރިވުމަކީ އޭނާއަށް އިއާދަ ނުކުރެވޭ ވަތުގެ ގެއްލުމެއް ލިބިގެންދާނެ ކަމެއް ކަމަށްވެސް ބުނެފައިވެއެވެ.

އެހެންކަމުން މި މައްސަލައިގެ މައުލޫއުގައި ފައިސަލާ ކުރަނިވި ނިންމުމެއް ނިންމުމާ ހަމައަށް، ނުވަތަ ވަޒީފާއާބެހޭ ޓްރައިބިއުނަލުން ވަކި ގޮތެއް އަންގަންދެން އިންވެސްޓިގޭޝަން ސްޕެޝަލިސްޓް ގެ މަގާމަށް އެހެން ފަރާތެއް އައްޔަން ކުރުމުގެ އެއްވެސް މަސައްކަތެއް ކުރިއަށް ނުގެންދިއުމަށް އެފްއެސްއެމް އަށާއި، ކަމާ ގުޅުންހުރި ފަރާތްތަކްށް އަމުރުކުރާ ކަމަށް ޓްރައިބިއުނަލުން ވަނީ ބުނެފައެވެ.