އިންޑިއާއިން އުޒުބެކިސްތާނާއެކު ސޮއިކޮށްފައިވާ އެއްބަސްވުމުގެ ދަށުން ނޯތު ސައުތު ކޮރިޑޯ ބޭނުންކޮށްގެން އުޒުބެކިސްތާނުން މުދާ ފޮނުވަން ފަށާނެއެވެ.
އިންޓަރނޭޝަނަލް ނޯތު ސައުތު ކޮރިޑޯއަކީ، ރަޝިޔާއާއި ސެންޓްރަލް އޭޝިއާގެ ޤައުމުތަކުން އުފައްދާ މުދާ އެއްގަމު މަގުން އިންޑިއާގެ ބަނދަރުތަކާ ހަމައަށް ފޮނުވާ މަގެވެ. އީރާންގެ ޗާބާރު ބަނދަރާ ހަމައަށް މުދާ އުފުލާނީ ރޭލުގައެވެ. އެއަށްފަހު ކޮންޓެއިނާތައް ކަނޑު ބޯޓުން އިންޑިއާގެ ބަނދަރުތަކަށް ގެންދާނެއެވެ. މީގެ ކުރިން ކަނޑުމަގުން މުދާއުފުލަން ދެތިން މަސް ހޭދަވާ ދަތުރު މިގޮތަށް މުދާ އުފުލުމުން 15 ދުވަސް ތެރޭގައި ނިންމާލެވެއެވެ. އަދި ލޮޖިސްޓިކް ހޭދަވެސް ކުޑަވެގެން ދެއެވެ.
ޗާބާރު ބަނދަރަކީ އިންޑިއާއިން އީރާނުގައި ހަދާފައިވާ ބަނދަރެކެވެ.
