ވެރިކަން ލިބިއްޖެނަމަ އެންމެބޮޑު އިސްކަމެއްދެއްވާނޭ އެއްކަމަކީ އިންސާނާ ބިނާކުރުން ކަމަށް ކުރީގެ ހޯމް މިނިސްޓަރ އަދި 2028ގެ ރިޔާސީ އިންތިހާބުގައި ވާދަކުރައްވަން ނިންމަވާފައިވާ އުމަރު ނަސީރު ވިދާޅުވެއްޖެއެވެ.
”ހިރި“ އަށް މައުލޫމާތު ދެއްވަމުން އުމަރު ވިދާޅުވީ ކޮންމެ ބަޔަކުވެރިކަން ކުރިޔަސް ގައުމުގެ އިންފްރާސްޓްރަކްޗަރ ބިނާކޮށް ހަދަމުންދާނޭ ކަމަށެވެ. ”ބަނދަރާއި މަގުތައްވެސް ހަދާނެ. ގައުމަކަށް އެންމެ މުހިންމުވަނީ އެގައުމެއްގެ ރައްޔިތުން އަމިއްލަ ފައިމަތީގައި ހަމަޖެހިގެން އިގްތިސާދީ ގޮތުން ފުދުންތެރިކަމާއެކު ކޮޅަށްތިބުން. އެއީ ގައުމަކަށް އެންމެ މުހިންމު ކަމަކީ. އެހެންވީމާ އަޅުގަނޑުގެ ވައުދަކީ އިންސާނާ ބިނާކުރުން،“ އުމަރު ވިދާޅުވިއެވެ. އިންސާނާ ބިނާކުރުމަކީ އޭނާއަށް މަތީތައުލީމާއި ހުނަރާއި އަހުލާގު ދަސްކޮށްދިނުން ކަމަށް އުމަރު ވިދާޅުވިއެވެ. މި ތިން ކަންތަކުގެ މައްޗަށްނޫނީ ރައްޔިތުންނާއި ގައުމު ތަރައްގީއެއް ނުކުރެވޭނެއެވެ. މަތީތައުލީމާއި ހުނަރާއި ޑިސިޕްލީނާ މި ތިންކަންތައް ފޯރުކޮށްދިނުން އަޅުގަނޑުގެ މައިގަނޑުވައުދަކަށްވާނީ،“ އުމަރު ވިދާޅުވިއެވެ.
ރާއްޖެއަށް މިހާރު މަދުވެގެން އުޅޭ އެންމެ މުހިންމު އެއް ކޮންޕޯނަންޓަކީ ހުނަރު ލިބިފައިވާ އިންސާނާއެވެ. އުމަރު ވިދާޅުވީ އަތުން މަސައްކަތްކުރާ މީހުން ދިވެހި ރާއްޖޭގައި މިހާރުނެތް ކަމަށެވެ. ވަޑާންކުރާ މީހުންނާއި، ރާނާ ސިމެންތިޖެހާ މީހުންވެސް ނެތްކަމަށް ވިދާޅުވިއެވެ. އޭގެ އިތުރުން އިންޖީން ރޫޅާރާވާ މީހުންނާއި މަސްވެރިކަން ކުރުންފަދަ އެތައް މަސައްކަތެއް ހުއްޓަސް އެކަން އަތުންކުރަން ދަންނަ މީހުން މިހާރު ރާއްޖޭގައި ތިބިކަމަށް ގަބޫލު ނުކުރެވޭ ކަމަށް ވިދާޅުވިއެވެ. ”މިހާރުނެތޭ މިމަސައްކަތްކުރާ ދިވެހީން. މިހާރު މި މަސައްކަތްތައް ކުރަނީ ބިދޭސީންނޭ. އަޅުގަނޑުގެ ދިހަ އަހަރު ނިމޭއިރު ދިވެހިން ތިބޭނީ އަމިއްލަ ފައިމައްޗަށް ކޮޅަށްތެދުވެ. އެމީހުންގެ މަތީތައުލީމް ހުންނާނެ. އެމީހުންނަށް އަތުން މަސައްކަތްކުރަން އެނގޭނެ. އެމީހުންގެ ޑިސިޕްލީން ހުންނާނެ،“ އޭނާ ވިދާޅުވިއެވެ.
މިގޮތަށް ވަރުގަދަ މުޖުތައެއް ބިނާވެގެން އަންނައިރު އޭގެ ފަހަތުން އުމްރާނީ ތަރައްގީ ބިނާވެ ކުރިއަރަމުން އަންނަތަން ސާފުކޮށް ފެންނާނޭ ކަމަށް އުމަރު ވިދާޅުވިއެވެ. ކޮންމެ ސަރުކާރެއްގައިވެސް އުމްރާނީ ތަރައްގީ ލިބޭނޭ ކަމަށާއި ނުވެގެން އުޅޭ ކަމަކީ އިންސާނާ ބިލްޑް ކުރުން ކަމަށް އޭނާ ވިދާޅުވިއެވެ. ”އެކަމަކު އަޅުގަނޑު އިންސާނާ ބިލްޑްކުރާނަން އިރާދަކުރެއްވިއްޔާ. އެއަޒުމުގައި ވެރިކަމަށް އަންނަން ބޭނުންވަނީ،“
