ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ މަސައްކަތްތައް މިމަހު 14 ވަނަ ދުވަހު ފަށާގޮތަށް ފަސްކޮށްފިއެވެ.
އެކަން އަންގާފައި ވަނީ ރައްޔިތުންގެ މަޖިލީހުގެ ރައީސް އަބްރުއްރަހީމް އަބުދުﷲ ވިދާޅުވެގެން މަޖިލިސް އިދާރާއިން މަޖިލިސް މެންބަރުންނަށް ފޮނުއްވި މެސެޖެއްގައެވެ.
އެ މެސެޖުގައި ވިދާލުވެފައިވަނީ މަޖިލީހުގެ ޖަލްސާތައް ބްރޯޑްކާސްޓް ކުރުމުގައި ދަތިތަކެއް ހުރުމުން، ޖަލްސާތައް ބްރޯޑްކާސްޓް ކުރުމަށް އާ ވީޑިއޯ ރޫމެއް ގާއިމް ކުރުމުގެ މަސައްކަތްތައް ކުރިއަށް ދާކަމަށެވެ. އެހެންކަމުން މަޖިލީހުގެ މިދައުރުގެ ޖަލްސާތައް ފެށޭނީ މިމަހުގެ 14 ވާ ހޯމަ ދުވަހު ކަމަށްވެސް ވަނީ ވިދާޅުވެފައެވެ.
މީގެކުރިން މަޖިލިސް ޖަލްސާތައް ފަށަން މަޖިލީހުގެ ރައީސް ކަނޑައަޅުއްވާފައި އޮތީ މާދަމާގައެވެ.
ދެވަނަ ދައުރުގެ މަސައްކަތްތަކަށްފަހު މަޖިލިސް މިހާރު އޮތީ ޗުއްޓީގައެވެ. ނަމަވެސް ޗުއްޓީ ތެރޭގައި ދައުރުން ބޭރުން ތިން ޖަލްސާއެއް ވަނީ ބާއްވައިފައެވެ. އެއީ ޕްރޮސިކިއުޓާ ޖެނެރަލްގެ މަގާމަށް މީހަކު އައްޔަން ކުރުމަށްޓަކައެވެ.
އެގޮތުން މިދިޔަ ސެޕްޓެމްބަރުމަހުގެ 11 އާއި 16 އާއި 17 ދުވަހު ބޭއްވި ޖަލްސާގައި، ޕްރޮސިކިއުޓަރުގެ މަގާމަށް އައްބާސް ޝަރީފު އައްޔަންކުރުމަށް ފާސްކުރިއެވެ. އަދި ކުންފުނީގެ ގާނޫނަށް އިސްލާހު ގެންނަން ސަރުކާރުގެ ފަރާތުން ހުށަހެޅި ބިލު ވެސް ފާސްކުރިއެވެ.
އެއަށްފަހު މަޖިލިސް ރައީސް އޭރު ވިދާޅުވީ، އޮކްޓޯބަރު ހަތެއްވާ ހޯމަ ދުވަހު މަޖިލީހުގެ މި އަހަރުގެ ތިންވަނަ ދައުރު ފެށުމަށް ނިންމާފައިވާކަމަށެވެ.
