ކައުންސިލްތަކަށް ދޭން ޖެހޭ ބްލޮކް ގްރާންޓު ބަޖެޓް ފާސްވާއިރު ހިމަނާފައި އޮންނާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ލާމަރުކަޒީ ޤާނޫނުގައި ބަޔާން ކޮށްފައި ވަނީ، ދައުލަތުގެ ބަޖެޓުގެ ޖުމްލަ އާމްދަނީގެ 5 ޕަސެންޓް ކައުންސިލްތަކަށް ދޭންވާނެކަމަށެވެ.
އިދިކޮޅު ފަރާތްތަކުން މި މައްސަލާގައި އޮޅުވާލަމުން ގެންދާތީ، ރައީސުލްޖުމްހުރިއްޔާ ވަނީ މިއަދު އެކަން ސާފުކޮށް ދެއްވާފައެވެ.
”ބްލޮކް ގަރާންޓުގެ އެ 5 ޕަސެންޓް އެ ޤާނޫނުގައި އޮތްގޮތަށް މިފަހަރު ބަޖެޓު ފާސްވާއިރު ވެސް ލިބޭނެ.“ ރައީސް ވިދާޅުވި އެވެ.
މިއަދު ޕެޓް ޝެލްޓަރ ހުޅުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނުގެ ސަރުކާރުން ގެންދަނީ ކައުންސިލްތައް ބާރުވެރި ކުރުމަށް ކައުންސިލްތަކަށް އާމްދަނީ ހޯދޭނެ ގޮތްތައްވެސް ފަހިކޮށް ދެމުން ކަމަށެވެ.
”ލޯކަލް ޓޫރިޒަމްގެ ތެރެއިން ވަކި އިންސައްތައެއް ޙަވާލުކުރަން އަޅުގަނޑުމެން ގާނޫނު އިސްލާހުކުރަން ފޮނުވާނަން،“ ރައީސް ވިދާޅުވިއެވެ.
ރައީސް ވިދާޅުވީ ކައުންސިލްތަކަށް ކޮށްދޭންވާ ކަންކަން އެމަނިކުފާނަށް ރަނގަޅަށް އެނގިވަޑައި ގަންނަވާކަމަށާއި 160 ކައުންސިލާ ބައްދަލު ކުރެއްވިއިރު، އެބޭފުޅުންގެ ކަންބޮޑުވުންތައް އެމަނިކުފާނާ ޙިއްސާކޮށްފައިވާ ކަމަށާއި އެހެންވެ، ކައުންސިލްތަކުގެ ޝުޢޫރުތައް އެމަނިކުފާނަށް ސާފުވެ ވަޑައިގަންނަވާ ކަމަށް ވިދާޅުވިއެވެ.
މީގެ ކުރީ ސަރުކާރުތަކުން، ކައުންސިލްތަކާ އަޅާނުލައި ދޫކޮށްލާފައިވާ ކަމަށް ވިދާޅުވަމުން ރައީސުލްޖުމްހޫރިއްޔާ ވަނީ އެމަނިކުފާނުގެ ސަރުކާރުން ކައުންސިލް އިމާރާތްތައް އަޅުއްވައި ދެއްވާނެ ކަމުގެ ޔަޤީންކަންވެސް ދެއްވާފައެވެ. އެގޮތުން އަތޮޅުތަކުގައި 40 އަހަރަށް ވުރެން ގިނަ ދުވަސްވެފައިވާ ޢިމާރާތްތައް ހުރި ކަމަށާއި ކައުންސިލްތައް ޢިމާރާތްކޮށް ދެއްވުމުގެ މަޝްރޫޢުތަކުގެ ދަށުން މިއަހަރު، 50 ރަށެއްގެ ކައުންސިލަށް އައު އިމާރާތްތައް އަޅައިދިނުމާއި އަދި ދައުރުގެ ބާކީ އޮތް ދުވަސްތަކުގައި އިތުރު 120 ކައުންސިލް އިދާރާ އަޅުއްވާނެ ކަމުގައި ރައީސް ވިދާޅުވިއެވެ.
