ކުދި ޖަޒީރާ ޤައުމުތަކުގެ ޑިޖިޓަލް އިންގިލާބުގައި ދިވެހިރާއްޖެއަކީ ނަމޫނާ ޤައުމެއް ކަމަށް ރައްޔިތުންގެ މަޖިލީހުގެ ނާއިބު ރައީސް އަހުމަދު ނާޒިމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ދުނިޔޭގެ އެކި ކަންކޮޅުތަކުގައި ޑިޖިޓަލް ޓްރާންސްފޮމޭޝަންގެ ސަބަބުން ރައްޔިތުންނަށް ދެމުންދާ ޚިދުމަތްތައް އަލުން ބައްޓަން ކުރަމުންދާގޮތާއި، ކުދި ޖަޒީރާ ގައުމުތަކުގެ ޖިއޮގްރަފިކް އަދި އިޤްތިޞާދީ ހުރަސްތަކުން އަރައިގަތުމަށް އާ ގޮތްތަކެއް ހޯދުމަށް ކުރަމުންދާ މަސައްކަތްތަކާ ބެހޭގޮތުން، ކޮމަންވެލްތު ޕާލަމެންޓަރީ އެސޯސިއޭޝަން (ސީ.ޕީ.އޭ)ގެ ކުދި ގޮފިތަކުގެ ނެޓްވޯކް ޕްރޮގްރާމްގައި މަޝްވަރާ ކުރައްވަމުންނެވެ.

އޮސްޓްރޭލިއާގެ ސިޑްނީގައި، ސީ.ޕީ.އޭގެ ކުދި ގޮފިތަކުގެ ނެޓްވޯކް ޕްރޮގްރާމްގެ ބައެއްގެ ގޮތުގައި ކުރިއަށް ގެންދިޔަ މި ވޯކްޝޮޕްގައި ކޮމަންވެލްތުގެ ކުދި ޤައުމުތަކުގެ ޤާނޫނު ހަދާ މަޖިލީހުގެ މެންބަރުން މަޝްވަރާ ކުރެއްވީ އެ ޤައުމުތަކުން ޑިޖިޓަލް އިނޮވޭޝަންގައި ކުރިއަށްދާ ގޮތާ ބެހޭ ގޮތުންނެވެ.

”އަބަދުވެސް އާ ޓެކްނޮލޮޖީއަށް ފިރާލާ ޤައުމެއްގެ ގޮތުގައި ރާއްޖެއިން އަބަދުވެސް މަސައްކަތް ކުރޭ. ރާއްޖެއިންވަނީ، ރައްކާތެރި އަދި އިންޓައޮޕަރެބަލް ޑިޖިޓަލް ޚިދުމަތްތަކާއި ޕާސަނަލް ޑޭޓާގެ މުހިންމުކަން އިޙުސާސްކޮށް އެކަމަށް ހަރުދަނާ ފިޔަވަޅުތަކެއް އަޅާފައި،“ މޯލްޓާގެ ނާޒިމް ވިދާޅުވިއެވެ.

ނާޒިމް ވިދާޅުވީ ރާއްޖެއިން ގެންގުޅޭ ޑިޖިޓަލް ޓްރާންސްފޮމޭޝަން ސްޓްރެޓެޖީގެ އަސާސަކީ، ރާއްޖޭގެ ޤައުމީ ޑިޖިޓަލް އައިޑެންޓިޓީގެ ޚިދުމަތް ކަމަށްވާ އީފާސްއެވެ. އެމަނިކުފާނު ސިފަކުރެއްވި ގޮތުގައި، މި ނިޒާމުގެ ސަބަބުން ރައްޔިތުންނަށް ސަރުކާރުގެ ޚިދުމަތްތައް އިތުބާރުހުރި ގޮތެއްގައި ލިބޭނެ ގޮތް ހަދައިދެވި ފަސޭހަކޮށްދެވިފައިވެއެވެ. އޭގެ އިތުރުން، ސަރުކާރުން މުއާސަލާތުކުރުމަށް ބޭނުންކުރާ ޖެމްސްއަށްވެސް އަލިއަޅުއްވާލެއްވިއެވެ. އަދި، އަލަށް ތަރައްޤީ ކުރަމުންދާ ޖެމްސް ވޯކްސްޕޭސް ކޮމްޕޮނެންޓް ތަޢާރަފްވުމުން 24 ގަޑިއިރު ސަރުކާރުގެ ޚިދުމަތްތައް ފޯރުކޮށްދިނުމަށް މަގުފަހިކޮށްދީ ސަރުކާރުން ދެމުންދާ ޚިދުމަތްތަކަށް އިންގިލާބީ ބަދަލެއް އަންނާނެކަންވެސް ފާހަގަކުރެއްވިއެވެ.

”ރާއްޖޭގެ މި އިސްނެގުމަކީ މޮޑެލް، ސްމާޓް ނޭޝަނެއްގެ ގޮތުގައި ސާބިތުވުމަށް ރާއްޖެއިން އެޅި މުހިންމު ފިޔަވަޅުތަކެއް،“ ނާޒިމް ވިދާޅުވި އެވެ.

ރާއްޖޭގައި މަސައްކަތް ކުރާ ބިދޭސީންގެ ޑޮކިއުމަންޓޭޝަން ޕްރޮސެސްތައް ސްޓްރީމްލައިންކޮށް، ޓެކްނޮލޮޖީ ބޭނުންކޮށްގެން އުދަނގޫ އިދާރީ މަސައްކަތްތައް ހަރުދަނާކޮށް މެނޭޖްކުރެވޭނެ ގޮތް ދައްކުވައިދޭ ޑިޖިޓަލް ޕްލެޓްފޯމެއް ކަމަށްވާ އެކްސްޕެޓް ސިސްޓަމްގެ ތަފުސީލުވެސް މި ބައްދަލުވުމުގައި އެމަނިކުފާނު ދެއްވިއެވެ.

ކޮމަންވެލްތުގެ ކުދި ޤައުމުތަކަށް ކުރިމަތިވާ ތަފާތު ގޮންޖެހުންތަކުގެ ތެރޭގައި ވަސީލަތްތައް މަދުވުމާއި، މާކެޓަށް ވަދެވޭނެ ގޮތް ހަނިވުމާއި، އިޤްތިޞާދީ ލޮޅުންތަކުގެ ނާޒުކުކަމަށްވެސް މި ވޯކްޝޮޕްގައި ވާހަކަ ދައްކައި ޚިޔާލު ބަދަލު ކުރެވިފައިވާ ކަމަށް ރައްޔިތުންގެ މަޖިލީހުން ވިދާޅުވެފައިވެއެވެ. ޑިޖިޓަލް ލިޓެރެސީ ޕްރޮގްރާމްތަކަށް އިންވެސްޓްކުރުމާއި ޑިޖިޓަލް ބަދަލުތައް ތައާރަފުކޮށް ޚިދުމަތްތައް އަވަސްކުރުމަށް އަމަލީ ސްޓްރެޓެޖީތައް ހޯދުމާ މެދުވެސް މަޝްވަރާ ކުރެވުނެވެ.

”އާބާދީގެ ސައިޒުގެ ކުޑަކަމާއި، އިމްޕޯޓަށް ބަރޯސާވުމާއި، މޫސުމަށް އަންނަ ބަދަލުތަކުގެ އަސަރުތަކުން އިޤްތިޞާދީ ލޮޅުންތަކުގެ ނޭދެވޭ އަސަރުތައް ބޮޑުވަމުން ދިއުމާ ގުޅިގެން، ކުދި ޤައުމުތައް އިތުރަށް ސާބިތުވެ ތިބުން މުހިންމު،“ ނާޒިމް ވިދާޅުވިއެވެ. އެމަނިކުފާނުގެ ވާހަކަފުޅުގައި، ވަނީ ކުދި ޤައުމުތަކަށް ޑިޖިޓަލް އިނޮވޭޝަން މުހިންމު ވެގެން ގޮސްފައިވާ ސަބަބު ވިދާޅުވެދެއްވައިފައެވެ.

ސަރަހައްދީ ނުވަ ގްރޫޕަކަށް ބަހާލައިގެން ކޮމަންވެލްތުގެ 52 މެންބަރު ގައުމުތަކުގެ މަންދޫބުން ހިމެނޭ ސީ.ޕީ.އޭ ސްމޯލް ބްރާންޗްސް ނެޓްވޯކަކީ އާ އުފެއްދުންތައް ހިއްސާކުރުމަށް މުހިންމު ފޯރަމެއް ކަމަށް މަޖިލީހުގެ އިދާރާއިން ވިދާޅުވެފައިވެއެވެ.

މި ގްރޫޕުގެ އެޖެންޑާ އިތުރަށް ކުރިއަށް ގެންދިއުމަށްޓަކައި، އެ ނެޓްވޯކްގެ އޭޝިއާ ސަރަޙައްދުގެ ރިއާސަތު ބެލެހެއްޓެވުމަށް ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމްގެ ނަންފުޅު ވަނީ ހުށަހެޅިފައެވެ. އަދި އެމަނިކުފާނު މި އެޖެންޑާ ލީޑް ކުރެއްވުމުގައި މުހިންމު ދައުރެއް އަދާކޮށްދެއްވުމަށް ހުށަހެޅިފައިވެއެވެ.

މި ސެޝަންގައި ކުދި ގައުމުތަކުގެ ޑިޖިޓަލް ޓްރާންސްފޯމަޝަންގެ މަސައްކަތުގައި އެހީތެރިވުމަށް ކޮމަންވެލްތުން ކުރާ މަސައްކަތަށްވެސް ނާޒިމް ވާހަކަފުޅުދެއްކެވިއެވެ.