ޗައިނާގެ އަގު ހެޔޮ އެކްސްޕޯޓް ސްޓްރެޓެޖީތަކުގެ ސަބަބުން ދުނިޔޭގެ ބާޒާރަށް ބުރޫ އަރާ ކަމަށް ބުނެއެވެ. ޚާއްސަކޮށް އިލެކްޓްރިކް ވެހިކަލް (އީވީ)ގެ ދާއިރާއިން ދުނިޔޭގެ އޮޓޯމޯބައިލް މާކެޓަށް ބޮޑެތި އަސަރުތަކެއް ކޮށްފައި ވެއެވެ.

ޗައިނާ ވަނީ 2023 ވަނަ އަހަރު ޖަޕާނު ފަހަނައަޅައި ގޮސް ކާރު އެކްސްޕޯޓްކުރާ ލީޑިން ގައުމަކަށް ވެފައެވެ. ޗައިނާގެ ބީއައިޑީ އާއި އެންއައިއޯ ފަދަ ބްރޭންޑްތައް ދުނިޔޭގެ މަޝްހޫރުކަން ހޯދާފައި ވެއެވެ. އަދި އެމެރިކާ، ޖަރުމަނު، ޖަޕާން، އަދި ދެކުނު ކޮރެއާގެ ބޮޑެތި އޮޓޯމޯޓިވް ކުޅުންތެރިންގެ މާކެޓްގެ ހިއްސާ ވަރަށް ބޮޑަށް ދަށްކޮށްލުމަށް މި ކުންފުނިތަކުން ރޯލެއް ކުޅެފައި ވެއެވެ. މިއީ ޗައިނާއިން އަގު ހެޔޮކޮށް އުޅަނދުތައް އެހެން ގައުމުތަކަށް އެކްސްޕޯޓު ކުރުމުން ދިމާވާ މައްސަލައެއް ކަމަށް ބަލާފައި ވެއެވެ.

ޗައިނާގެ އުފެއްދުމާ އެއްވަރަށް ގައުމުގެ އެތެރޭގައި ވިޔަފާރި ނުލިބުމާ ކުރިމަތިލާން ޖެހުމުން ޗައިނާއިން އަންނަނީ ކުޑަ އަގެއްގައި އިތުރު އުޅަނދުތައް ބޭރަށް އެކްސްޕޯޓު ކުރަމުންނެވެ.

މިދިޔަ 10-15 އަހަރު ތެރޭގައި ޗައިނާއިން ވަނީ އީވީ ދާއިރާއަށް އެހީތެރިވުމަށް ސަބްސިޑީއާއި ޓެކްސް ކުޑަ ކުރުންފަދަ އިންފްރާސްޓްރަކްޗަރ އިންވެސްޓްމަންޓްތަކަށް ގާތްގަނޑަކަށް 230.8 ބިލިއަން ޑޮލަރު ޚަރަދުކޮށްފައެވެ.

ޗައިނާގެ މާކެޓް ހިއްސާގެ ކުރި ހޯދުމުން ފެންނަނީ، އިންސާފުވެރި ވިޔަފާރީގެ އުސޫލުތަކަށް ބުރޫއަރާ ސްޓްރެޓެޖީއެކެވެ.

ފާއިތުވި ހަ އަހަރު ތެރޭގައި ޓޮޔޯޓާ، ވޮކްސްވޭގަން، ވޮލްވޯ، ޓެސްލާ، ކިއާ، އަދި ހިއުންޑައި ފަދަ ދުނިޔޭގެ ކާރު އުފައްދާ ބިޔަ ކުންފުނިތަކުން ވަނީ ޗައިނާގެ އުފެއްދުންތެރިންގެ ވާދަވެރި ފިއްތުންތަކުގެ ސަބަބުން 1،000 އަށް ވުރެ ގިނަ މަސައްކަތްތެރިން ވަޒީފާއިން ވަކިކޮށްފައެވެ. އަދި ބައެއް ހާލަތްތަކުގައި ޕްލާންޓްތައް ބަންދުކުރަން މަޖުބޫރުވާފަދަ ހާލަތަކަށް ވިޔަފާރި ދަށްކޮށްލާފަ އެވެ.