އިޒްރޭލު ޕާސްޕޯޓު މަނާކުރަން މަޖިލީހަށް ހުށަހަޅާފައިވާ ބިލް ފާސް ކުރިޔަސް ނުކުރިޔަސް ސަރުކާރުގެ މުނާފިގުކަން މުޅި ދުނިޔެއަށް ހާމަވެއްޖެ ކަމަށް އެމްޑީޕީ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ އޮކްޓޮބަރު 16 ގައި މަޖިލީހަށް ހުށަހަޅައިގެން 20 ދުވަސް ތެރޭގައި މިސަރުކާރުން ޓެކްސް ބޮޑުކޮށްފި ކަމަށެވެ. ސަރުކާރުގެ އިސްރާފުތަކަށް ހަރަދުކުރަން ދުންފަތް އަގުބޮޑުކޮށް 21 ދުވަހުގެ ތެރޭގައި ތަންފީޒު ކުރަންވެސް މިވަނީ ފަށާފައި ކަމަށްވެސް ވިދާޅުވެފައިވެއެވެ. އޭގެ އިތުރުން ސަރުކާރުން ވޭޕް މަނާކުރަން ބޭނުންވުމުން މަޖިލިސް ތެރެއިން ނިންމައި އެކަން ތަންފީޒު ކުރަން ހޭދަވީ އެންމެ 30 ދުވަސް ކަމަށްވެސް ވިދާޅުވިއެވެ.
އެހެންމަވެސް ޖޫން ދޭއްގައި ސަރުކާރުން އިއުލާނުކުރި ގޮތަށް އިޒްރޭލު ޕާސްޕޯޓު މަނާ ނުކުރެވުނު ކަމަށެވެ. ”ސަރުކާރުގެ ނިންމުމަށް ފަހު 166 ދުވަސް ހޭދަވެއްޖެ. ޖޫން 10 ގައި މަޖިލީހަށް ބިލު ބަލައިގަނެ 241 ކޮމިޓީގައި ތަޅު އަޅުވާފައި އޮންނަތާ 158 ދުވަސް ހޭދަވެއްޖެ. ސަރުކާރަށް އަހަރެއް ފުރުން ފާހަގަކުރާއިރު ބިލަށް ގޮތެއް ނުނިންމައި ބާއްވާފައި އޮންނަތާ ފަސް މަސް ފާއިތުވެއްޖެ،“
ފައްޔާޒު ވިދާޅުވީ ފެންނަމުންދަނީ ސަރުކާރު އަދި މަޖިލީހުގެ ސުޕަމެޖޯރިޓީ އޮވެމެ، އެކަމަށް ގޮތެއް ނުނިންމައި ތިބިތަން ކަމަށެވެ. އޭގެ ބަދަލުގައި އެކަން އަވަސް ކުރަން ގޮވާލައި ބަޔާން ނެރެ، ޕީއެންސީން ގެންދަނީ ރައްޔިތުންނަށް އޮޅުވާލަމުން ކަމަށް ވެސް ވިދާޅުވެފައިވެއެވެ.
”ދިވެހި ދިދަޔަށް ނޫނީ ބޯނުލަބާން ވިދާޅުވެ އެމެރިކާގެ ދިދަޔަށް ބޯލަބަންޖެހުނީތޯ ސުވާލު އުފެދޭ. ބިލު ފާސްކުރިޔަސް ނުކުރިޔަސް ސަރުކާރުގެ މުނާފިގުކަން މުޅި ދުނިޔެއަށް ހާމަވެއްޖެ،“ އޭނާ ވިދާޅުވިއެވެ.
ފައްޔާޒު ވިދާޅުވީ ސަރުކާރަށް އަހަރެއް ފުރުވާލީ ދޮގާއި އޮޅުވާލުމުގައި ކަމަށެވެ. އެކަން ހުއްޓާލައި އިޒްރޭލް ޕާސްޕޯޓު މަނާކުރުމުގެ ބިލާ މެދު ގޮތެއް ނިންމަން އޭނާ ވަނީ ސަރުކާރަށް ގޮވާލައްވާފައެވެ.
