އިންޑިއާއާއި ބަނގްލަދޭޝްގެ ގުޅުން ނާޒުކު ވެފައިވާ ދަނޑިވަޅެއްގައި، އިންޑިއާގެ އަގަރުތާލާގައި ހުންނަ ބަންގްލަދޭޝްގެ އެސިސްޓެންޓް ހައި ކޮމިޝަންގައި ހިންގާ ހުރިހާ ހަރަކާތްތަކެއް މެދުކަނޑާލައިފި އެވެ. އެފިޔަވަޅު އަޅާފައި ވަނީ ބަނގްލަދޭޝްގެ ހިންދޫންގެ ބަޔަކު ހައްޔަރު ކުރުމާ ގުޅިގެން އިންޑިއާ ބަޔަކު އަގަރުތާލާ ހައިކޮމިޝަން ކުރިމަތީގައި މުޒާހަރާ ކުރުމުންނެވެ. އެއަށްފަހު އިންޑިއާއިން ވަނީ ބަންގްލަދޭޝްގެ މިޝަންތަކުގެ ސެކިއުރިޓީ ވަރުގަދަކޮށްފައެވެ. ބަންގްލަދޭޝް އިން ވެސް ވަނީ ބަދަލުގައި، އިންޑިއާގެ މިޝަންތަކުގެ ސަލާމަތީ ފިޔަވަޅުތައް އިތުރަށް ވަރުގަދަ ކޮށްފައެވެ.
”ބަންގްލަދޭޝްގެ ވަގުތީ ސަރުކާރާ ގުޅިގެން މަސައްކަތް ކުރަން ތައްޔާރަށް މިތިބީ، ސުލްހައާއި ސަލާމަތާއި ތަރައްގީއަށް އަޅުގަނޑުމެން ހިއްސާކުރާ އުންމީދުތައް ފުރިހަމަ ކުރުމަށް ބަންގްލަދޭޝް ސަރުކާރާ ގުޅިގެން މަސައްކަތް ކުރުމުގެ ޝައުގުވެރިކަން އެބައޮތް،“ ބަންގްލަދޭޝްގައި ހުންނަ އިންޑިއާގެ ހައިކޮމިޝަނަރު ޕްރަނައި ވަރްމާ ނޫސްވެރިންގެ ބައްދަލު ވުމެއްގައި ވާހަކަ ދައްކަވަމުން ވިދާޅުވި އެވެ. އޭނާ ވަނީ ބަންގްލަދޭޝްގެ އެކްޓިން ފޮރިން ސެކްރެޓަރީ، ރިޔާޒް ހަމީދުالله އާ ބައްދަލު ކުރައްވާފައެވެ.
އިންޑިއާއާއި ބަނގްލަދޭޝްއާ ދެމެދު ބައިމަދު މީހުންގެ މައްސަލަގާއި ބަހުސް ހޫނުވަމުން ދިއުމާ ގުޅިގެން ބަންގްލަދޭޝްގެ ފޮރިން މިނިސްޓްރީން ވަނީ އިންޑިއާއަށް އިހުތިޖާޖުގެ ނޯޓެއްވެސް ހަވާލުކޮށްފައެވެ.
”ބައިމަދު މީހުންގެ މައްސަލާގައި އަޅުގަނޑުމެން ވާހަކަ ދައްކަމުން ގެންދަން. އަޅުގަނޑުމެންގެ މެދުގައި އޮންނަ މުހިންމު ގުޅުން އެއް މައްސަލައަކަށް ނުވަތަ އެއް އެޖެންޑާއަކަށް ކުޑައެއް ނުކުރެވޭނެ،“ ވަރްމާ ވިދާޅުވި އެވެ.
