ޖުޑީޝަލް ސަވިސް ކޮމިޝަން (ޖޭއެސްސީ) އިން އއ. އުކުޅަހު މެޖިސްޓްރޭޓް ކޯޓުގެ އިސް މެޖިސްޓްރޭޓް އަހުމަދު މުއާވިޔަތު ގާސިމް މަގާމުން ވަގުތީ ގޮތުން ދުރުކޮށްފިއެވެ.
ޖޭއެސްސީން މިއަދު ނެރުނު ބަޔާނެއްގައި ބުނީ މެޖިސްޓްރޭޓް ސަސްޕެންޑް ކޮށްފައިވަނީ ހުސްވި މަހު 28 ވަނަ ދުވަހު ކަމަށެވެ. އަދި އެ މައްސަލައިގެ ތަހުގީގު ނިމެންދެން އޭނާ ވަޒީފާއިން ދުރުކޮށްފައި ބެހެއްޓުމަށް ނިންމީ، ތަހުގީގަށް ހުށަހަޅާފައިވާ ހެކިތަކަށް ބެލުމަށްފަހު ކަމަށެވެ.
ޖޭއެސްސީން އިތުރަށް ބުނީ މެޖިސްޓްރޭޓް ސަސްޕެންޑް ނުކޮށް މައްސަލަ ތަހުގީގު ކުރަން އުނދަގޫތަކެއް ކުރިމަތިވެދާނެ ކަމަށް ފެންނާތީ، އެކަމަށް ރިއާޔަތްކޮށް މި ނިންމުން ނިންމީ ކަމަށެވެ. ނަމަވެސް ސަސްޕެންޑް ކުރީ މުސާރަ ލިބޭ ގޮތަށް ކަމެއް ނުވަތަ ނޫންކަން އަދި އެނގިފައެއް ނުވެއެވެ.
ޖޭއެސްސީގެ މިހާރުގެ އުސޫލަކީ ފަނޑިޔާރެއްގެ މައްޗަށް ތުހުމަތު ކުރެވޭ މައްސަލައެއްގެ ތަފުސީލު، އެ މައްސަލައެއް ސާބިތުވުމުގެ ކުރިން ހާމަ ނުކުރުމެވެ. އެހެންކަމުން މި މައްސަލައިގެ އިތުރު ތަފުސީލެއް ހާމަކޮށްފައެއް ނުވެ އެވެ.
