ރާއްޖޭގެ ހީވާގި މަސްވެރިން ކުރާ ބުރަ މަސައްކަތުގެ އަގު އިހްތިރާމާއެކު ވަޒަންކުރުމަކީ، ގައުމީ ވާޖިބެއްކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ މަސްވެރިންގެ ދުވަހާގުޅިގެން، އެމަނިކުފާނުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައެވެ.

”އަތްވާއި ވާރޭގައި، ދުވާލާއި ރޭގަނޑު، ބިޔަ ކަނޑުތަކުގައި، ދިވެހި މަސްވެރީންކުރާ ހިންމަތުގެ އަގު އިހްތިރާމާއެކު ވަޒަން ކުރުމަކީ، ގައުމީ ވާޖިބެކެވެ.“

މަސްވެރީންނަށް ދުވަހެއް ޚާއްސަކޮށްގެން އެދުވަސް މިއަދު ފާހަހަކުރަމުންދާއިރު މަސްވެރިންގެ އެންމެ ބޮޑު ޝަކުވާއަކީ ކިރުވާ މަހަށް ފައިސާ ލިބުން ލަސްވުމެވެ. މަސްވެރީންނާ ގުޅުންހުރި މިފަދަ ކަންކަމަށް ހައްލުހޯދުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުން ކަމަށް ރައީސް އޮފީހުން ވަނީ ވިދާޅުވެފައެވެ. އެގޮތުން ބޭންކް އޮފް މޯލްޑިވްސް ގައި އެކައުންޓް ހުޅުވާފައިވާ މަސްދޯނިފަހަރަށް، މިއަދުން ފެށިގެން، މަސް ކިރުވާތާ 48 ގަޑިއިރުގެ ތެރޭގައި ފައިސާ ޖަމާވާނޭ އިންތިޒާމު ސަރުކާރުން މިހާރުވަނީ ހަމަޖައްސަވައިފައެވެ. އަދި މަސްވެރިންގެ އެންމެ ބޮޑު ކަންބޮޑުވުމެއް ކަމަށްވާ ތެޔޮ ލިބުމުގައި ހުރި ދަތިކަމަށް ޙައްލު ހޯދައި ދިނުމުގެ ގޮތުން މިއަދުން ފެށިގެން 4 ރަށެއްގައި ހުންނަ އެސް.ޓީ.އޯގެ ނުވަތަ އެފް.އެސް.އެމްގެ ސައިޓުތަކުން ”އެސްޓީއޯ ރޭޓް“ގައި އަގު ހެޔޮކޮށް މަސްވެރިންނަށް ތެޔޮ ލިބޭނެކަމުގެ ޔަޤީންކަން، ރައީސުލްޖުމްހޫރިއްޔާ އިއްޔެ ވަނީ ދެއްވައިފައެވެ. ތެޔޮ ލިބޭނޭ ރަށްރަށަކީ، ކ. ހިންމަފުށި، ގއ. ކޫއްޑޫ، ޅ.ފެލިވަރު އަދި ސ. ހުޅުމީދޫއެވެ. ގއ. ކޫއްޑޫ އާއި ޅ.ފެލިވަރު ސަރަހައްދުގައި ހަރަކާތްތެރިވާ މިފްކޯގެ ބޯޓުފަހަރުންވެސް ”އެސްޓީއޯ ރޭޓް“ ގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސެވުމަށް އެސް.ޓީ.އޯއިން މަސައްކަތް ކުރައްވަމުން ގެންދަވާކަންވެސް އެމަނިކުފާނު ވަނީ އިއްޔެ އިއުލާން ކުރައްވާފައެވެ.

މީގެ އިތުރުން، އެހެނިހެން ދާއިރާތަކުގައި މަސައްކަތްކުރާ މުވައްޒަފުންނަށް އޮންނަ އިނާޔަތްތައް މަސްވެރިންނަށްވެސް ފަހިވުމަކީ މަސްވެރިން އެދި ތިބި ކަމެއްކަން ފާހަގަކުރައްވައި، މި ސަރުކާރުން އެކުލަވާލެއްވި މަސްވެރިންގެ ދަފުތަރަށް ޤާނޫނީ ހައިސިއްޔަތު ދެއްވުމަށް ނިންމެވިކަންވެސް ރައީސުލްޖުމްހޫރިއްޔާ އިއްޔެ ވަނީ ހާމަކުރައްވައިފައެވެ.

މަސްވެރިކަމުގެ ދާއިރާ އިތުރަށް ހަރުދަނާކުރުމަށާއި، މިހާރަށްވުރެ ފުޅާކުރުމަށް މަސްވެރިންނާ ބައްދަލުކުރައްވައި، މަސްވެރީން ބޭނުންވާގޮތަށް ކަންކަން ނިންމެވުމަށް ރައީސުލްޖުމްހުރިއްޔާ ދަނީ މަސައްކަތްޕުޅު ކުރައްވަމުން ކަމަށް ރައީސް އޮފީހުން ވަނީ ވިދާޅުވެފައެވެ. މިގޮތުން މިދިޔަ ހަފުތާވެސް އެމަނިކުފާނު ވަނީ ކެޔޮޅުންނާ ބައްދަލުކުރައްވާފައި ކަމަށް ރައީސް އޮފީހުން ވިދާޅުވިއެވެ. މީގެ ކުރިންވެސް އެމަނިކުފާނު ވަނީ މަސްވެރިންނާ، އަދި މަސްވެރީންގެ ބައެއް ޖަމްޢިއްޔާތަކާވެސް ބައްދަލު ކުރައްވާ އެބޭފުޅުން ބޭނުންވާ ކަންކަން ބައްލަވައި އެކަންކަމާގުޅޭގޮތުން މަޝްވަރާ ކުރައްވާފައެވެ.

މަސްވެރިކަމުން ހޯދޭ އާމުދަނީ އިތުރުކުރުމަށްޓަކައި ރާއްޖޭގައި ބާނާ މަސް ވިއްކާނޭ ބޭރުގެ ބޮޑެތި މާރުކޭޓުތައް އިތުރަށް ހޯއްދެވުމަށާއި، ރާއްޖޭގައި މަހުގެ އުފެއްދުންތަކުގެ ކާރުޚާނާތައް އިތުރު ކުރައްވައި، މަސް ރައްކާކުރެވޭ ވަރު އިތުރުކުރެއްވުމަށް މި ސަރުކާރުގެ ފުރަތަމަ އަހަރު ވަނީ މަސައްކަތް ފަށްޓަވައިފައި ކަމަށް ރައީސް އޮފީހުން ވަނީ ވިދާޅުވެފައެވެ.