ގޯތި ބަހާފައިވާ ގޮތާމެދު އެޗުޑީސީގެ މައްޗަށް ކޮށްފައިވާ ތުހުމަތުތަކަށްފަހު އެތަނުގެ އެމްޑީއަކަށް ކުރިން ހުންނެވި އިބްރާހީމް ފަޒުލް ރަޝީދު އިސްތިއުފާ ދެއްވުމުން އަލަށް އެމްޑީ ކަމަށް އައްޔަން ކުރެއްވި މައުރޫފް ޖަމީލް އެތަނުގެ އެންމެހާ ކަންކަން އިސްލާހުކުރައްވާނޭ ކަމަށް އުންމީދު ކުރައްވާ ކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު ވިދާޅުވެފައި ވަނީ ނުހައްގުން ގޯތި ބަހާފައިވާ މައްސަލައާ ގުޅޭގޮތުން މިފަހަރުވެސް ދެންނެވެންއޮތީ ކުރިން ވިދާޅުވި ވާހަކަ ކަމަށެވެ. ”ކުރީގައިވެސް ލިސްޓް ހަދާފައިވަނީ ބޭއިންސާފުން އެތައް ބަޔަކަށް ގޯތި ލިބޭގޮތަށް. މިފަހަރު އަނެއްކާ ވެސް އެ ބޭއިންސާފަށް އިތުރުބޮޅެއް އެކުލަވާލެވުނީ،“ ނަޝީދު ވިދާޅުވެފައިވެއެވެ.
އެހެންނަމަވެސް މިފަހަރުގެ މައްސަލަ ބޭޒާރުވުމުން ތަހުގީގު ކުރަން ފެށުމަށްފަހު އެޗުޑީސީގެ ވެރިން ވަނީ ބަދަލުކޮށްފައި ކަމަށް އެމަނިކުފާނު ވިދާޅުވިއެވެ. ”އަޅުގަނޑު އުންމީދު ކުރަނީ ފުލުހުން ރަނގަޅު ތަހުގީގެއް ހިންގާނޭ ކަމަށް،“ ނަޝީދު ވިދާޅުވެފައިވެއެވެ.
