ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ކެބިނަޓަށް ބަދަލު ގެންނަވައިފިއެވެ. މިއީ އެމަނިކުފާނު ވެރިކަމާ ހަވާލުވެ ވަޑައިގެންނެވުމަށްފަހު ކެބިނެޓަށް ބަދަލު ގެންނެވި ދެވަނަފަހަރެވެ.
މި ގެންނެވި ބަދަލުގެ ތެރެއިން އެންމެ ބޮޑަށްފާހަގަ ކޮށްލެވެނީ ކޮންސްޓްރަކްޝަންސް މިނިސްޓްރީއާއި ހައުސިން މިނިސްޓްރީ އެއްކޮލުމެވެ. އެދެތަން އެއްކުލުމަށްފަހު ވަޒީރަކަށް ލައްވާފައިވަނީ ޑރ. އަބްދު މުއްތަލިބެވެ. އެ މިނިސްޓްރީގެ މިހާރުގެ ނަމަކީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އެވެ. ފިނޭންސް މިނިސްޓްރީއާއި ޕްލޭނިން މިނިސްޓްރީ އެއްކޮލުމަށްފަހު އެތަނުގެ ވަޒީރަކަށް އައްޔަން ކުރެއްވީ މޫސާ ޒަމީރެވެ. އެމިނިސްޓްރީގެ މިހާރުގެ ނަމަކީ މިނިސްޓަރ އޮފް ފިނޭންސް އެންޑް ޕްލޭނިން އެވެ.
މި ބަދަލާއެކު ކުރިން ހައުސިން މިނިސްޓަރަކަށް ހުންނެވި އަލީ ހައިދަރުވަނީ ހަޔަރ އެޑިޔުކޭޝަން މިނިސްޓަރަކަށް ބަދަލު ކުރައްވައިފައެވެ. ހަޔަރއެޑިޔުކޭޝަން މިނިސްޓަރަކަށް ހުންނެވި ޑރ. މަރިޔަމް މާރިޔާ ވަނީ މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއާގެ މަގާމަށް ބަދަލު ކުރައްވައިފައެވެ. އެ މިނިސްޓްރީގެ މިނިސްޓަރ ޑރ. އާއިޝަތު ރަމީލާ ވަނީ ސިއްހީ ހާލަތު ތަން ނުދެއްވާތީ ކުރިން އިސްތިއުފާ ދެއްވައިފައެވެ. އެ މިނިސްޓްރީ ވަގުތީ ގޮތުން ހިންގަވަމުން ގެންދެވީ ޑރ. މާރިޔާއެވެ.
މިދަލަށްފަހު ރައީސް ވަނީ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް އުވާލައްވައިފައެވެ. އެ މިނިސްޓްރީގެ މަސައްކަތްތައް ހަވާލުކުރެއްވީ މިނިސްޓްރީ އޮފް ފިނޭންސް އެންޑް ޕްލޭނިންގއަށާއި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށެވެ. މި ބަދަލާއެކު ސަރުކާރުގެ މިނިސްޓްރީ ތަކުގެ އަދަދަކީ 21 އެވެ.
މީގެ ކުރީން ރައިސް ޑރ. މުއިއްޒު ވަނީ އެމަނިކުފާނުގެ ފުރަތަމަ ހެލްތު މިނިސްޓަރު ޑރ. އަބްދުﷲ ޚަލީލް ފޮރިން މިނިސްޓަރަކަށް ބަދަލު ކުރައްވައިފައެވެ. އަދި ހެލްތަށް އައްޔަން ކުރެއްވީ ކުރިން ރައީސް އޮފީހުގައި ހުންނެވި އަބްދުﷲ ނާޒިމެވެ. އޭރު ފޮރިން މިނިސްޓަރަކަށް ހުންނެވި ޒަމީރު ބަދަލު ކުރެއްވީ ފިނޭންސް މިނިސްޓްރީއަށެވެ. އެއީ އޭރުގެ މިނިސްޓަރ ޑރ. މުހައްމަދި ޝަފީގު އިސްދެއްވުމުންނެވެ.
