ހަލުވި ދުވެލީގެ ޒަމާނީ ރަމްޒެއް ކަމަށްވާ ޗައިނާގެ ހައިސްޕީޑް ރޭލް ނެޓްވޯކް ގައި ކޮންސްޓްރަކްޝަންގެ މަސައްކަތުގެ ފެންވަރު ދަށްކަމެއް ފާހަގަ ވުމާ ގުޅިގެން އިންސްޕެކްޝަން ވަރުގަދަ ކޮށްފިއެވެ.
ޗައިނާ ރޭލްވޭ ކޯޕަރޭޝަން (ސީއާރުސީ) އިން ކުރި ތަހުގީގެއްގައި ޝަންހާއީ-ކުންމިންގް ހައި ސްޕީޑް ރޭލް ލައިންގެ ބައެއް ހިސާބުތަކުގައި ޚަރަދު ކުޑަކުރުމަށް ކޮށްފައިވާ ކަންތައްތަކުން، ޑިޒައިންގެ ބައެއް އުނިކަންތައްތަކާއި، ސުޕަރވައިޒް ކުރުމުގައި ހުރި ދޯހަޅިކަންތައްތަކެއް ފާހަގަ ވެއްޖެއެވެ.
2023 ވަނަ އަހަރުގެ މެދުތެރޭގައި ހިނގި ބައެއް ސަލާމަތީ ހާދިސާތަކުގެ ސަބަބުން ނޯތު ޕަން ޖިއާން ބްރިޖުގައި ރޭލުތައް ގަޑިއަކު 70 ކިލޯމީޓަރަށް ދުއްވަން މަޖުބޫރުވެ ދުވެލި ލަސްކުރަން ޖެހުނެވެ. އާންމުކޮށް މި ރޭލުތަކަކީ، ގަޑިއަކު 300 ކިލޯމީޓަރަށް ދުއްވާ ރޭލުތަކެކެވެ.
ތަހުގީގުތަކުން ހާމަވި ގޮތުގައމި ތަންތާނގައި މަސައްކަތް ކޮށްފައިވާ ބައެއް ކުންފުނިތަކުން އޮޅުވާލުމުގެ އަމަލުތައް ހިންގާފައި ވެއެވެ. އަދި އެކަށީގެންވާ ފެންވަރަށް ފެން ހިއްކުމުގެ ނިޒާމުތައް ހަމަޖައްސާފައި ނެތުމާއި، މަސައްކަތްތެރިކަމުގެ ފެންވަރު ދަށްކަން ފާހަގަ ކޮށްފައި ވެއެވެ. މި މަސައްކަތް ސުޕަރވައިޒް ކޮށްފައި ވަނީ އެހެން ކުންފުނިތަކުންނެވެ. އެ ތަންތަނުންވެސް އެމީހުންގެ ވާޖިބު ރަނގަޅަށް އަދާކޮށްފައި ނުވާކަން ފާހަގަ ވެފައި ވެއެވެ.
އެކަމުގެ ރައްދުގައި ސީއާރުސީން ވަނީ ހަރުކަށި ޖޫރިމަނާތަކެއް ކޮށްފައެވެ. އަދި ބައެއް ކުންފުނިތަކަށް މަޝްރޫއުތަކަށް ބިޑްކުރުން އަހަރެއްހާ ދުވަސް ވަންދެން މަނާކޮށްފައި ވެއެވެ. އަދި އެތަންތަން އަލުން މަރާމާތު ކުރުމަށް ބޮޑެތި ހަރަދުތަކެއް ކުރުމަށް އެ ކުންފުނިތަކަށް ލާޒިމުކޮށްފައި ވެއެވެ.
ޗައިނާ އޮބްޒާވަރުން ބުނާ ގޮތުގައި މި އަމަލުތަކުގެ ސަބަބުން ބޮޑެތި އިންފްރާސްޓްރަކްޗަރ މަޝްރޫއުތަކުގައި ކުންފުނިތައް ޖަވާބުދާރީކުރުވުމާއި ރައްކާތެރިކަމުގެ މިންގަނޑުތަކަށް ތަބާވުމުގެ ބޭނުންތެރިކަން ހާމަވެގެން ދާކަމަށާއި އަދި ސުޕަރވިޝަން ވަރުގަދަ ކުރުމުގެ މުހިންމު ކަން ފެންނަ ކަމަށެވެ.
