ޗައިނާގެ ބަލްކް ކެރިއަރެއް ކަމަށްވާ ޔީ ޕެންގް 3 އިން ބޯލްޓިކް ކަނޑުގައި ކަނޑުއަޑީގެ ދެ އިންޓަނެޓް ކޭބަލަކަށް ގެއްލުން ދިނުމަށް އެ ބޯޓުން ދައުރެއް އަދާކުރި ކަމަށް ޝައްކު ކުރެވޭ މައްސަލަ ތަހުގީގު ކުރަމުން އަންނަ ކަމަށް ރިޕޯޓްތައް ބުނެ އެވެ. ލިތުއޭނިއާ އާއި ސްވިޑެން އަދި ފިންލޭންޑާއި ޖަރުމަނު ގުޅުވައިދޭ ކޭބަލްތައް ކަނޑާލާފައިވަނީ ނޮވެމްބަރު މަހުގެ 17 ވަނަ ދުވަހު އެވެ.

މެރިންޓްރެފިކްގެ ޑޭޓާއިން ދައްކާ ގޮތުގައި ކޭބަލް ހަލާކުވެފައިވާ ސަރަހައްދާ ކައިރީގައި އެ އުޅަނދު ނަގިލި އަޅާފައިވާތީ ޖަރުމަނުގެ ޑިފެންސް މިނިސްޓަރު ބޮރިސް ޕިސްޓޯރިއަސް ވަނީ އެއީ ކޭބަލަށް ގެއްލުން ދިނުމަށް ކަމަށް ލަފާ ކުރައްވާފަ އެވެ. ޗައިނާއިން ވަނީ އެފަދަ އަމަލެއްގައި ޗައިނާ ބައިވެރިވެފައި ނުވާނެ ކަމަށް ބުނެ ފައެވެ. އަދި ޗައިނާއާ ދެކޮޅަށް ކުރެވޭ ތުހުމތު ތަކަކީ ސަރާސަރު ބުހުތާން ދޮގުތަކެއް ކަމަށް ބުނެފައެވެ.

ޑިސެމްބަރު މަހުގެ 19 ވަނަ ދުވަހު ސްވިޑެންގެ ކަމާބެހޭ ފަރާތްތަކުން ޗައިނާގެ އާގު ބޯޓަށް އެރި ނަމަވެސް ޗައިނާގެ އޮފިޝަލުން ވަނީ އަމިއްލައަށް އިސްނަގައިގެން މައްސަލަ ތަހުގީގު ކޮށްފައެވެ. ނަމަވެސް ކަނޑި އަޑިން ފެންނަ އައު މަންޒަރު ތަކުން ކަންބޮޑުވުންތައް އިތުރުވެ، މައްސަލަ ހައްލު ނުވެ، ސަރަހައްދީ ސަލާމަތީ ކަންކަމުގެ ނުތަނަވަސްކަމުގެ ބިރުވެރިކަމެއް ވަނީ ވެރިވެފައެވެ.