އިންޑިއާއިން ކަނޑުގެ ފުނަށް ފީނާ ކެޕްސުލް ”މަޓްސިއާ 6000“ ގެ ޓެސްޓްތައް ކުރިން ނިންމާފައި އޮތީ ޑިސެމްބަރުގެ މެދު ތެރޭގައި ޗެންނާއި ބަނދަރުގައެވެ. ނަމަވެސް ޗެންނާއީއަށް ތޫފާން ފެންގަލް އެރުމުގެ ސަބަބުން އެ ޓެސްޓްތައް ލަސް ކުރީއެވެ.

މިހާރު، އިންޑިއާ މީޓިއޮރޮލޮޖިކަލް ޑިޕާޓްމަންޓުން ފީނުމަށް ހުއްދަ ދިނުމާ ގުޅިގެން ސައިންސްވެރިން ކެޕްސުލް ޓެސްޓް ކުރުމަށް ބާއްވާ ފުރަތަމަ ކަނޑު އަޑީގެ ޓެސްޓްތައް އޮންނާނީ، ބޭ އޮފް ބެންގޯލްގެ 15 މީޓަރު ފުނުގައެވެ.

އަދި އެންމެ ފުރަތަމަ ޓެސްޓްތައް ކުރަން ނިންމާފައި ވަނީ ކްރޫއަކާ ނުލައެވެ. އެ ޓެސްޓްތައް ކާމިޔާބު ވުމުން، އިންސާނުން ލައިގެން އިތުރު ފީނުމުގެ ޓެސްޓްތައް ކުރިއަށް ގެންދާނެ އެވެ.

މުޅި 2025 ވަނަ އަހަރު ކުރުމަށް ހަމަޖެހިފައިވާ ޑައިވްތަކުގެ ތެރޭގައި  100 މީޓަރު އަދި އެއަށްފަހު، 200 މީތަރު ދެން 500 މީޓަރު ފުނަށް ދިއުން ހިމެނެއެވެ.

މަޓްސިއާ 6000 އިންޑިއާ ކަނޑަށް ފީނުމަށް ދާ މައިދަތުރު އޮންނާނީ 2026 ވަނަ އަހަރުގެ ފަހުކޮޅު ގައެވެ. އެ ދަތުރަކީ މަޓްސިއާ މެދުތެރޭ އިންޑިއާ ކަނޑުގައި ފީނާނެ ދަތުރެވެ.

މި ދަތުރުގައި ކައްޕިއަކަށް ހުންނާނީ، ރިމޯޓުން ދުއްވާ އުޅަނދުފަހަރުގެ ތަޖުރިބާކާރު އޮޕަރޭޓަރެއް ކަމަށްވާ އިލެކްޓްރޯނިކްސް އަދި ނޭވިގޭޝަންގެ މާހިރު ރަމޭޝް ރާޖޫ އެވެ. އޭނާ މިހާރު ދަނީ ތަމްރީނައް ހަދަމުން އަދި އެކިއެކީގައި މެޑިކަލް ޓެސްޓްތައްވެސް ހަދަމުންނެވެ.

އޭނާގެ ޓީމުން ވަނީ ލައިފް ސަޕޯޓް މެކޭނިޒަމްތަކުގެ ނިޒާމުތައް ޓެސްޓްކޮށް، އުޅަނދު ފީނުމަށް އެކަށީގެންވާ ކަމަށް ޔަގީންކޮށްދީފަ އެވެ. މަޓްސްޔާ 6000ގެ މަގްސަދަކީ އިންޑިއާގެ ކަނޑުގެ މެދުން ނާދިރު މައުދަންތައް ނެގުމަށް ކުރާ ދަތުރެކެވެ. އަދި މިއީ ކަނޑުގެ އެންމެ ފުން ހިސާބުން އެފަދަ މައުދަންތައް ނެގުމަށް އިންޑިއާއިން ފަށާ ދަތުރުތަކުގެ ފެށުމެކެވެ.