މި އަހަރަކީ ރާއްޖޭގެ ތަރައްގީގެ އަމަލީ މަސައްކަތާއި މާލީ ތަނަވަސްކަން ރައްޔިތުންނަށް އިހްސާސްކޮށްދިނުމުގެ އަމަލީ މަސައްކަތްތައް ވަރަށް ފުޅާ ދާއިރާއެއްގައި، އެހާމެ ބާރަށް ހިނގާނެ އަހަރެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ކ. ގުޅީއަށް ވަަޑައިގެން އެރަށުގެ ރައްޔިތުންނާ ވާހަަކަފުޅު ދައްކަވަމުން ރައީސް ވިދާޅުވީ ވާރުތަވި އިގްތިސާދަކާއެކު ނިމިދިޔަ އަހަރަކީ އެންމެ އެދިވަޑައިގެންނެވި ގޮތަށް ކަންކަން ހިނގި އަހަރަކަށް ނުވި ކަމަށެވެ. އެހެންނަމަވެސް ފާއިތުވި އަހަރުދުވަސްތެރޭގައި އިގްތިސާދީ ބިންގާވަނީ ހަރުދަނާ ކުރެއްވިފައި ކަމަށް އެމަަނިކުފާނު ވިދާޅުވިއެވެ. އެއާއެކު އެ ބިންގާ މަތީގައި ގައުމު ބިނާކުރައްވަމުން ގެންދަވާނެ ކަމުގެ ޔަޤީންކަން ރައީސް ދެއްވިއެވެ.
ސަރުކާރުގެ އެކި ވުޒާރާތަކާއި، ސަރުކާރު ހިއްސާވާ ކުންފުނިތަކާ، އެ ނޫންވެސް ގޮތްގޮތުން އެކި ފަރާތްތަކުން ހޯދާފައިވާ ޚިދުމަތްތަކަށް ދޭންޖެހޭ އުޖޫރަ ޚަލާސް ކުރުމުގެ މަސައްކަތްތައް މިދިޔަ އަހަރެކޭ އެއްފަދައިން މިއަަހަރުގެ ފުރަތަމަ ދެ މަސްދުވަހުގެ ތެރޭގައިވެސް ކުރައްވާނެ ކަމުގައި ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ވެރިކަން ވެގެންދާނީ އުމްރާނީ ތަރައްގީގެ އިތުރުން ފިކުރީ އަދި ރޫހާނީ ތަރައްގީ ހިމެނޭހެން ވަށާޖެހެނިވި ތަރައްޤީއެއް ގެނެސްދެއްވާނޭ ވެރިކަމަކަށް ކަމަށެވެ. މިއީ އެމަނިކުފާނުގެ އަޒުމް ކަމަށް ވެސް ވިދާޅުވިއެވެ.
