ހޯނޑެއްދޫއަށް ދިމާވެފައިވާ ރަށްގިރުމުގެ މައްސަލައަށާއި، އުދައެރުމުގެ މައްސަލައަށް މި އަހަރުގެ ބަޖެޓުގެ ތެރެއިން ދާއިމީ ހައްލެއް ހޯއްދަވައިދެއްވާނޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. މިއަދު އެރަށަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ވިދާޅުވީ އެރަށުގެ ތައުލީމާއި ސިއްހީ ދާއިރާ ކުރިއެރުވުމަށާއި، ކުޅިވަރުގެ އެކި ވަސީލަތްތައް ގާއިމުކުރުމުގެ މަސައްކަތް ވެސް ކުރައްވާނޭ ކަމަށެވެ.
ރައީސް ވިދާޅުވީ ކައުންސިލްތަކަށް އާމްދަނީ ހޯދައިދިނުމަށް ރަށާ ކައިރި ފަޅުރަށްތަކުގައި އިންޓަރ ގްރޭޓެޑް ޓޫރިޒަމް ހިންގޭނެ ގޮތަށް ހަމަޖެއްސެވުމުގެ މަސައްކަތް ވެސް ކޮށްދެއްވާނެކަމަށެވެ.
މި ބައްދަލުކުރެއްވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ ހޯނޑެއްދޫގެ އެކި ކަންކަމަށް ހައްލު ގެނެސްދެއްވޭނެ ގޮތަށް، ފުރިހަމަ ސަމާލުކަން ދެއްވައިގެން އެކަންކަން ކޮންދެއްވުމަށް މަސައްކަތްޕުޅު ކުރައްވާނެކަމުގެ ޔަގީންކަން ވެސް ދެއްވާފައެވެ. އެގޮތުން މިއަހަރު ޕީ.އެސް.އައި.ޕީ މަޝްރޫއުތަކުގެ ތެރެއިން ގެދޮރުވެރިކަން، އަދި ތައުލީމަށްފަހު މަގުހެދުމަށް އިސްކަންދެއްވާނެކަމުގައި ފާހަގަކުރައްވައި،ހޯނޑެއްދޫ މަގުހެދުމަށް ވެވަޑައިގެންނެވި ވައުދު، މިއަހަރާ މިއަންނަ އަހަރު ފުއްދަވާނެކަމުގައި ވިދާޅުވިއެވެ.
މިއަހަރުގެ ބަޖެޓަކީ ގެދޮރުވެރިކަމާ ހައުސިންގ މަޝްރޫއުތައް ފެށުމުގެ ބަޖެޓެއް ކަމަށާއި، ރަށްރަށުގައި ވެވަޑައިގެންފައިވާ ގެދޮރުވެރިކަމުގެ މަޝްރޫއުތައްވެސް މިއަހަރު ކުރިއަށް ގެންދަވާނެކަމުގައި ރައީސް ވިދާޅުވިއެވެ. އެގޮތުން ހޯނޑެއްދޫގެ ހައުސިންގ މަޝްރޫޢޫވެސް ކުރިއަށް ގެންދަވާނެކަމުގައި އެމަނިކުފާނު ވިދާޅުވިއެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނު ވެވަޑައިގެންނެވި ހުރިހާ ވައުދަކީވެސް ފުއްދެވުމަށް ވެވަޑައިގެންފައިވާ ވައުދެއްކަމުގައެވެ. ރައީސް ވިދާޅުވީ މިއަހަރު ވެގެންދާނީ ރަށްރަށަށް ވެވަޑައިގެންފައިވާ ވައުދުތަކާއި، މެނިފެސްޓޯގައި ހިމަނުއްވާފައިހުރި ވައުދުތައް، ތަރުތީބު ކުރެވިގެން ފުއްދެވުމުގެ އަމަލީ މަސައްކަތް ކުރައްވާނެ އަހަރެއް ކަމަށެވެ.
މިއަދު ހޯނޑެއްދޫ ރައްޔިތުންނާ ބައްދަލުކޮށްލެއްވުމުގެ ތެރެއިން އެރަށުގެ ފެނާ ނަރުދަމާ ނިޒާމުގެ މަޝްރޫއު، ރައީސުލްޖުމްހޫރިއްޔާ ވަނީ ރަސްމީކޮށް އިފުތިތާހުކޮށްދެއްވާފައެވެ. އަދި ބޭންކް އޮފް މޯލްޑިވްސް އިން ހޯނޑެއްދޫގައި އޭ.ޓީ.އެމް އެއް ބެހެއްޓުމުގެ މަސައްކަތް ފެށުމަށްޓަކައި، އެއްބަސްވުމުގައި ސޮއިކުރެއްވުންވެސް މިއަދު ކުރިއަށް ދިޔައެވެ.
