ސައުދިއަރަބިޔާގެ މަގެއްގައި ހިނގާފައި ދިޔަ، ޢުމުރުން ދުވަސް ވެފައިވާ، އެ ޤައުމުގެ ރައްޔިތެކެވެ. އޭނާ ހިނގަމުން ދަނިކޮށް ކުއްލިއަކަށް މަގުމައްޗަށް ވެއްޓިއްޖެއެވެ. މި މަންޒަރު ފެނުނު ބަޔަކު، ކައިރީގައި ހުރި ހޮސްޕިޓަލަކަށް އޭނާ ގެންދިޔައެވެ. ވަގުތުން އިމަޖެންސީ އަށް ވައްދައި ޑޮކްޓަރުން ބެލި ބެލުމުން އެނގުނީ، އޭނާ ވެއްޓުނީ އޮކްސީޖަން ލެވެލް ދަށްވެގެން ކަމެވެ. އެހެންކަމުން ހޮސްޕިޓަލްގައި އޭނާ އެނދުމަތިކުރެވުނެވެ. ފަރުވާދީ އޮކްސީޖަން ލެވެލް ހަމައަކަށް އެޅުމުން އޭނާ ދޫކޮށްލެވުނެވެ. ޑިސްޗާރޖް ކުރުމަށްޓަކާ ބިލް އޭނާއާ ޙަވާލުކުރެވުމުން އޭނާގެ ލޮލުން ކަރުނަ ފޭދުނެވެ. ބިލު ދައްކާނެ ފައިސާ އަތުގައި ނެތިގެނެއް ނޫނެވެ. ރޮވުނު ސަބަބު ވަރަށް ސާފެވެ. އޭނާގެ ޢުމުރުން އެހާ ދުވަސް ވީއިރުވެސް ﷲ ތަޢާލާ އޭނާއަށް އޮކްސީޖަން ދެއްވަމުން ގެންދެވީ އެއްވެސް އަގަކާ ނުލައެވެ. ނަމަވެސް، މިއަދު އޭނާ މި ޖެހުނީ ބޮޑު އަގު ދީފައި އޮކްސީޖަން ގަންނާށެވެ! މީގެ ކުރީގައި އޭނާ ވަނީ، މި މަތިވެރި ނިޢުމަތާމެދު ޣާފިލުވެފައެވެ. އެކަން އޭނާއަށް ރޭކާލީ މިއަދުއެވެ.

އަޅުތަކުންގެ ތެރެއިން ގިނަ ބަޔަކު ވަނީ، ﷲ ތަޢާލާގެ މިފަދަ މަތިވެރި ނިޢުމަތްތަކާމެދު ޣާފިލުވެފައެވެ. މި ދެއްކުނީ އެންމެ ނިޢުމަތެއް ކުޑަ ހިނދުކޮޅަކަށް މެދުކެނޑިގެން ދިއުމުން ކަންތައް ވެގެން ދިޔަ ގޮތުގެ ވާހަކައެވެ. އިންސާނާގެ ހަށިގަނޑުގައި ލައްވާފައިވަނީ މިފަދަ ކިތައްކިތައް ނިޢުމަތް ހެއްޔެވެ؟ ނޭވާލުމުގެ ނިޒާމު، ލޮލަށް ފެނުމުގެ ނިޒާމު، އަޑުއިވުމުގެ ނިޒާމު، ކަންކަން އިޙުސާސްވުމުގެ ނިޒާމު، ބުއްދީގެ ނިޒާމު، ލޭ ދައުރުކުރުމުގެ ނިޒާމު، ކާ ތަކެތި ހަޖަމުކުރުމުގެ ނިޒާމު، ކުޑަކަމު ދިއުމާއި ބޮޑުކަމު ދިއުމުގެ ނިޒާމު ނިދުމާއި ހޭލުމުގެ ނިޒާމު، ބަލިތަކުން ދިފާއުވުމުގެ ނިޒާމު، މިހެން ގޮސް ކިތަންމެ ނިޒާމެއް ﷲ ތަޢާލާ ވަނީ، އިންސާނާގެ ހަށިގަނޑުގައި ލައްވާފައެވެ. މި ނިޒާމުތަކާމެދު ވިސްނައިލެވުނީ ކިތައް މީހުންނަށް ހެއްޔެވެ؟

ނިޢުމަތާމެދު ޣާފިލުވި މީހުންގެ ނިމުން އައިގޮތް ކީރިތި ޤުރްއާނުގައި އައިސްފައިވެއެވެ. ކަހުފު ސޫރަތުގައިވާ، ﷲ ތަޢާލާ ދެ ބަގީޗާ ދެއްވި މީހާގެ ވާކައަކީ ވަރަށް ޢިބްރަތްތެރި ވާހަކައެކެވެ. ﷲ ތަޢާލާ އޭނާއަށް ދެ ބަގީޗާ ދެއްވައި އެ ދެތަނުގެ ގަސްތަކުގައި މޭވާ އަޅައި ފައްކާވުމުން އޭނާއަށް އޭނާގެ އަމިއްލަ ނަފްސު އޮޅުނު ކަހަލައެވެ. އޭނާ ހީކުރީ، އެއީ އޭނާ އަމިއްލައަށް ލިބިގަތް ތަކެތި ކަމަށެވެ. އެހިނދު އެ ނިޢުމަތް ދެއްވި ފަރާތަށް އޭނާ ފުރަގަސްދިނެވެ. އޭނާ ބުނަންފެށިއެވެ. [އަހުރެން ޤަބޫލުކުރާ ގޮތުގައި ދުވަހަކުވެސް މިތަކެތި ހަލާކުވެ ފަނާވެގެނެއް ނުދާނެއެވެ. އަދި ޤިޔާމަތް ވެދާނެ ކަމަކަށްވެސް އަހުރެން ނުދެކެމެވެ.] ކޮންމެއަކަސް އެ ދެ ބަގީޗާއަކީ އޭނާގެ ސުވަރުގެ ކަމުގައި ދެކިގެން ހުއްޓާ، ކުއްލި ހިއްޕެވުމަކުން ހިއްޕަވައި، އޭނާގެ ދެ ބަގީޗާއަށް ހޮނު އަޅުއްވައި އެކީއެކަށް ހަލާކުކޮށްލެއްވިއެވެ. ނިޢުމަތްތަކަށް ފުރަގަސްދޭ މީހުންގެ ނިމުން އަންނަނީ މިފަދަ ގޮތްގޮތަށެވެ. ސޫރަތުލް އަންޢާމުގެ 44 ވަނަ އާޔަތުގެ މާނައަށް ވިސްނާލަމާހެއްޔެވެ؟ [ދެން އެއުރެންނަށް ހަނދާންކޮށްދެއްވި ކަންތައް، އެއުރެން ހަނދާންނައްތައިފި ހިނދު (އިމްތިޙާނެއްގެ ގޮތުން) ހުރިހާކަމެއްގެ ދޮރުތައް ތިމަންރަސްކަލާނގެ އެއުރެންނަށް ހުޅުއްވައިދެއްވީމެވެ. (އެބަހީ: ހުރިހާ ގޮތަކުން ތަނަވަސްކަމާއި ތިޔާގިކަން ދެއްވީމެވެ.) ދެން އެއުރެންނަށް ދެއްވި ކަންތަކާމެދު އެއުރެން އުފަލުގައި ތިއްބާ ކުއްލިއަކަށް ތިމަންރަސްކަލާނގެ އެއުރެން ހިއްޕެވީމެވެ. އެހިނދު އުއްމީދު ކެނޑިފައިތިބި ބަޔަކު ކަމުގައި އެއުރެންވިއެވެ.] މި ހުރިހާކަމެއް މިހެން ހުރި އިރުވެސް އަޅުތަކުންގެ ތެރެއިން ގިނަ ބަޔަކު ވަނީ މިފަދަ ނިޢުމަތްތަކާމެދު ޣާފިލުވެފައެވެ. ނިޢުމަތްތަކަށް ޝުކުރުކޮށްހަދަނީ ވަރަށް މަދު ބައެކެވެ. ސަބާ ސޫރަތުގެ 13 ވަނަ އާޔަތުގައި ﷲ ތަޢާލާ ވަޙީކުރައްވާފައިވާ ބަސްފުޅުގެ މާނާގައި ވެއެވެ. [އަދި ތިމަންރަސްކަލާނގެ އަޅުތަކުންގެ ތެރެއިން ގިނައިން ޝުކުރުވެރިވާ މީހުން ވަރަށްމަދެވެ.]

ލިޔުނީ: އައްޝައިޚު ޙަސަން ލަޠީފު މޫސާ.

7.1.2025