އެއްވެސް ސިޔާސީ ޕާޓީއަކާ އިދިކޮޅުވެ ވަޑައިނުގަންނަވާނޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. އެކްސްގައި މިއަދު ކުރެއްވި ޕޯސްޓެއްގައި ރައީސް ނަޝީދު ވިދާޅުވީ ޒަމާންތަކެއް ވަންދެން އެމަނިކުފާނު އުޅުއްވީ ޕާޓީ އެމްޑީޕީއަކީ އެމަނިކުފާނުގެ ދަރިއެއްފަދަ ޕާޓީއެއް ކަމަށެވެ. އެހެން ކަމުން އަބަދުވެސް އެޕާޓީ ވަރުގަދަވެ އޮތުމަކީ އެމަނިކުފާނު އެދިވަޑައިގަންނަވާ ކަމެއް ކަމަށެވެ.

”އެމްޑީޕީއަކީ އަޅުގަނޑުގެ ދަރިއެއްފަދަ ޕާޓީއެއް. އެޕާޓީ ވަރުގަދަވެ އޮތުން އެއީ އަބަދުވެސް އަޅުގަނޑު އެދޭނޭކަމެއް. އަދި ފަހުން އަޅުގަނޑުބައިވެރިވި ޑިމޮކްރެޓްސް އަކީ ޚާއްސަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ލިބުނު ފުރުސަތެއް،“ ރައީސް ނަޝީދު ވިދާޅުވެފައިވެއެވެ.

އެހެންނަމަވެސް މިއިން އެއްވެސް ޕާޓީއެއްގައި އަމަލީ ގޮތުން މިވަގުތު މަސައްކަތް ކުރައްވަން ބޭނުންފުޅު ނުވާކަމަށް ވިދާޅުވެފައިވެއެވެ.  ”މީގެ އެއްވެސް ޕާޓީއެއްގައި އަމަލީ މަސައްކަތް ކުރާކަށް މިވަގުތު އަޅުގަނޑުނެތިން. އެހެންނަމަވެސް ރާއްޖޭގެ ސިޔާސީ ހަރަކާތުން މުޅިން ދުރުވާކަމަށް ވެސް ނެތިން،“ އެމަނިކުފާނު ވިދާޅުވެފައިވެއެވެ.

އެމަނިކުފާނު ވިދާޅުވެފައިވަނީ ހަޔާތުގެ ބޮޑު ބައެއް ހޭދަކުރައްވާފައިވަނީ  ދިވެހި ރާއްޖޭގައި ގިނަ ޕާޓީ އެކުލެވޭ ނިޒާމެއް ގާއިމް ކުރުމުގެ މަސައްކަތުގައި ކަމަށެވެ. އެއީ ގައުމެއްގެ ތަރައްގީއަށް ރައްޔިތުންގެ ތަނަވަސްކަމަށް އެންމެ ބޭނުން އެއް ވަސީލަތަކީ ވާދަވެރި ސިޔާސީ ހަރަކާތް ކަމަށް އެމަނިކުފާނު ގަބޫލުފުޅު ކުރައްވާތީ ކަމަށް ވެސް ވިދާޅުވެފައިވެއެވެ.

އެގޮން 2008 ގެ އިންތިޚާބަސްފަހުގައި ސަރުކާރުގެ އާމްދަނީ އިތުރުވެގެންދިޔަ ކަމަށާއި އެ އާމްދަނީން ކުރެވުނު އުމްރާނީ މަސައްކަތްތަކާއި ރައްޔިތުންނަށް ހޯދައިދެވުނު އިޖުތިމާއީ ރައްކާތެރިކަމުގެ ސަބަބުން ގިނަ ޕާޓީ އެކުލެވޭ ނިޒާމުގެ ފައިދާ ފެނިގެން ގޮސްފައިވާ ކަމަށް ވިދާޅުވެފައިވެއެވެ.

ދެހާސް އަށްވަނަ އަހަރުގެ ރިޔާސީ އިންތިޚާބު ކާމިޔާބު ކުރެއްވުމަށްފަހު ރައީސް ނަޝީދު ވަނީ ހިލޭ ބޭސްފަރުވާ ކުރެވޭ ނިޒާމު އާސަންދަ ތައާރަފް ކުރައްވައިފައެވެ. އަދި އެކަނިވެރި މައިންނާއި، ދުވަސްމީ މީހުންނަށް އެލަވަންސް ހަމަޖައްސަވައި ދެއްވީ ވެސް އެމަނިކުފާނެވެ. އޭގެ އިތުރަށް ރާއްޖެއަށް ޓެކްސްގެ ނިޒާމް ތައާރަފް ކުރައްވައި އިޖުތިމާއީ ގޮތުންނާއި އުމްރާނީ ގޮތުން ރާއްޖެއަށް ކުރިއެރުންތަކެއް ހޯއްދަވައި ދެއްވިއެވެ.

ރައީސް ނަޝީދު އެމްޑީޕީ ދޫކުރައްވައި ވަޑައިގެންނެވީ 2023 ވަނަ އަހަރުގެ ރިޔާސީ އިންތިޚާބުގެ ގާތްވެފައިވަނިކޮށް ދިމާވި ”ކަންތައްތަކެއް“ ގެ ސަބަބުންނެވެ. އެ ވަޑައިގެންނެވިގޮތަށް ވަޑައިގެން އެމަނިކުފާނު ވަނީ ދަ ޑިމޮކްރެޓްސް އުފައްދަވައިފައެވެ. އެހެންނަމަވެސް އެޕާޓީގައި ތިއްބެވި އިސްބޭޅުން ކޮޅެއް މިހާރުވަނީ އަލުން އެމްޑީޕީއާ ގުޅިވަޑައިގެންފައެވެ.