ސްޓެލްކޯގެ މުވައްޒަފު، އަޙުމަދު ވިޝާނަށް މި ޝަރަފް އަރުވާފައިވަނީ 2025 ވަނައަހަރު ޖަނަވަރީ 14 ވީ އަންގާރަ ދުވަހުގެރޭ ހުޅުމާލޭ ދެވަނަ ފިޔަވަހީގައި ހުރި ޓްރާންފޯމަރަކުން ވައްކަން ކުރަން އުޅުނު ދެމީހަކު ހުއްޓުވައި އެމީހުން ކަމާބެހޭ ފަރާތްތަކާއި ހަވާލުކުރުމުގައި އިސްކޮށް ޙަރަކާތްތެރިވެ ކާމިޔާބު ހޯދައިފައިވާތީއެވެ. ވައްކަން ކުރަން އުޅުނު ދެމީހުން ހުއްޓުވަން ވިޝާން ކުރި މަސައްކަތުގައި އެމީހުން ވަނީ އޭނާއަށް ރެންޗަކުން ހަމަލާދީފައެވެ. އެހެންނަމަވެސް ވިޝާން ވަނީ މިކަމުގެ ހިތްވަރު ނެރެ ކާމިޔާބު ހޯދައިފައެވެ.

މީގެ އިތުރުން ވިޝާން އާ އެކު ޙާދިސާ ހިނގި ސަރަޙައްދުގައި ޙަރަކާތްތެރިވި ސްޓެލްކޯގެ އިތުރު މުވައްޒަފެއް ކަމަށްވާ ސަރުވާން މުޙައްމަދަށްވެސް ކުންފުނީގެ ފަރާތުން ވަނީ އަގުވަޒަންކުރުމުގެ ހަނދާނީ ލިޔުން އަރުވާފައެވެ.

މި ދެ މުވައްޒަފުންގެ އަގުވަޒަންކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ ސްޓެލްކޯއަކީ މުވައްޒަފުން ކުރާ މަސައްކަތުގެ އަގު އަބަދުވެސް އަދާކުރާ ކުންފުންޏެއް ކަމަށެވެ.

”މި ކުންފުންޏަކީ މުވައްޒަފުންގެ އަގުވަޒަންކޮށް، މުވައްޒަފުންނަށް ދިމާވާ ކަންކަމުގައި އަޅާލާ، އޯގާތެރި މެނޭޖްމަންޓެއް އޮންނަ ކުންފުންޏެއް އަބަދުވެސް. އަޅުގަނޑު ތިބޭފުޅުންނަށް ޔަޤީންކަން މި އަރުވަނީ މިއަދުވެސް ކުންފުނީގެ މެނޭޖްމަންޓް އޮތީ ހަމަ އެގޮތަށޭ. ތިބޭފުޅުންނަށް ދިމާވާ ކޮންމެ ކަމެއްގަ އަޅުގަނޑުމެން ފަހަތުގަ ތިބޭނަން. އެކަމަކީ އަނިޔާއެއް ލިބުންކަމުގައިވިޔަސް، އުފަލެއް ލިބުންކަމުގައިވިޔަސް އަދި ހިތާމައެއް ލިބުންކަމުގައިވިޔަސް ކުންފުނީގެ މެނޭޖްމަންޓް އެކަމުގައި (މުވައްޒަފުންގެ) ފަހަތުގަ ތިބޭނެ. އެކަމުގައި (މުވައްޒަފުން ބޭނުންވާ) އެއްބާރުލުން އަޅުގަނޑުމެން ތިބޭފުޅުންނަށް ދޭނަން. އަޅުގަނޑު ޔަޤީންކަން މި އަރުވަނީ، ތިބޭފުޅުން ރެއާ ދުވާލު ތި ކުރާ މަސައްކަތުގަ ލިބޭ ގެއްލުންތަކުގަ ކުންފުނީގެ މެނޭޖްމަންޓުން އެއްވެސްކަހަލަ އިހުމާލުވުމެއް ނޯންނާނެ. ތިބޭފުޅުންގެ ފަހަތުގައި އަޅުގަނޑުމެން ތިބޭފުޅުންނަށް ދެވެންހުރި ހުރިހާ އެހީތެރިކަމެއް ދޭނަން،“

މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ނާޡިރު ވިދާޅުވީ، ކުންފުންނަށް މިހާތަނަށް ލިބިފައިވާ ކޮންމެ ކާމިޔާބެއްގެ ފަހަތުގައިވަނީ މުވައްޒަފުންނަށް ވަޒީފާގެ މާހައުލުގައި ލިބެންޖެހޭ ސަލާމަތާއި ރައްކާތެރިކަމާއި އިތުބާރާއި ހިތްހަމަޖެހުން ހޯދައިދެވިފައި އޮތުން ކަމުގައެވެ.

”އަޅުގަނޑުމެން ކުންފުނީގެ އެންމެ ބޮޑު ރައުސުލްމާލަކީ މުވައްޒަފުން. މިއާމެދު ސުވާލެއް ނެތް. ޝައްކެއް ނެތް. ހަމައެގޮތަށް މަސައްކަތުގެ މާހައުލަކީ، ވަޒީފާގެ މާހައުލަކީ، މުވައްޒަފުންނަށް ސަލާމަތާ ރައްކަތެރިކަމާ ހިތްހަމަޖެހުން ލިބިފަ އޮންނާނެ ތަނަކަށް ވާނެޖެހޭނެކަމީ އެއީ އަޅުގަނޑުމެން އެންމެން ޤަބޫލުކުރާ ކަމެއް. އަދި އަޅުގަނޑުމެންނަށް މިއަދާހަމައަށް ލިބިފަ އޮތް ކާމިޔާބެގެ ފަހަތުގަވެސް އޮތީ، ކޮންމެ ކުރިއެރުމެއްގެ ފަހަތުގަވެސް އޮތީ، އަޅުގަނޑުމެންގެ މުވައްޒަފުންނަށް ވަޒީފާގެ މާހައުލުގަ ލިބެންޖެހޭ ސަލާމަތާ ރައްކާތެރިކަމާ، އިތުބާރާ ހިތްހަމަޖެހުން ހޯދައިދެވިފަ އޮތީމަ. އެއީ އަޅުގަނޑުމެންގެ މާޒީގަ އަޅުގަނޑުމެންގެ ވެރިންނާ އަޅުގަނޑުމެންގެ މުވައްޒަފުން ކުރި ބުރަ މަސައްކަތްތަކުގެ ނަތީޖާ،“

މި ރަސްމިއްޔާތުގައި ވާހަކަފުޅުދައްކަވަމުން ސްޓެލްކޯގެ ޓްރާންސްމިޝަން އެންޑް ޑިސްޓްރިބިއުޝަން ޑިޕާޓްމަންޓްގެ ޖެނެރަލް މެނޭޖަރ އިބްރާހިމް ނާޝިދު ވިދާޅުވީ، މުވައްޒަފުންގެ ޚިދުމަތުގެ އަގު މިފަދައިން އަދާކުރަން ފެށުމަކީ ވަރަށް ރަނގަޅު ކަމެއް ކަމަށެވެ.

”އަޅުގަނޑުމެންގެ މުވައްޒަފުން އެތަންތަނަށް އެޓެންޑް އެވަނީ މި ހުރިހާ ކަމެއްވެސް، މިކަންކަން މިހެން ހިނގާފާނެ ކަންވެސް ދެނެގެން ތިބެ އަސްލުގަ. އެއީ މިއީ އަލަށް ހިނގާ ކަންތައްތަކެއް ނޫން. މިކަންކަން މީގެ ކުރީގަވެސް ކޮންމެސްވަރަކަށް ހިނގާފަ އެބަހުރި. އަޅުގަނޑު ފާހަގަކޮށްލަން ބޭނުންވަނީ އެމްޑީ ފާހަގަކުރެއްވިހެން އަޅުގަނޑުމެންގެ މުވައްޒަފުން މިގޮތަށް މި ކުރާ ކަންތައްތައް ކުންފުނީގެ އެންމެ އިސް ލެވެލްއިން ބަލައިގަންނަ ސަޤާފަތެއް މިތަނުގަ ފެށުމަކީ މީ ވަރަށް އުފާވެރިކަމެއް،“

ޓްރާންސްފޯމަރުން ވައްކަން ކުރަން އުޅުނު މީހުން އަތުލައިގަނެވިފައިވަނީ 14 ޖަނަވަރީ 2025 ވީ އަންގާރަ ދުވަހުގެރޭ ހުޅުމާލޭގެ ދެވަނަ ފިޔަވަހީގެ ބައެއް ހިސާބުތަކުން ކަރަންޓުގެ ޚިދުމަތް ކެނޑުމާ ގުޅިގެން، ޓްރާންސްފޯމަރުތައް ޗެކުކުރުމުގެ މަސައްކަތް ކުރަމުންދަނިކޮށެވެ. މި ހާދިސާގައި ވަގުން މަސައްކަތްކޮށްފައިވަނީ ޓްރާންސްފޯމަރުތަކުގެ އެތެރޭގައި ލޮއިން ހަދާފައިވާ ބައިތައް ވަގަށްނެގުމަށެވެ.

ވަގުން ސްޓެލްކޯގެ މުވައްޒަފު އަޙުމަދު ވިޝާންއަށް ޙަމަލާދީފައިވަނީ އެމީހުން ބޭނުންކުރަމުންދިޔަ ރެންޗަކުންނެވެ. މި ހަމަލާގައި ވިޝާންގެ މޫނުމަތިން ދެތަނެއް ފަޅައިގެންގޮސްފައިވެއެވެ. ހަމަލާ ދިން މީހާ ފިލާފައިވީނަމަވެސް ވައްކަންކުރުމުގައި ޙަރަކާތްތެރިވި ދެވަނަ މީހާ ހިފަހައްޓައި އޭނާ ވަނީ ފުލުހުންނާ ހަވާލުކޮށްފައެވެ.

މި ޙާދިސާއާއި ގުޅިގެން ސްޓެލްކޯގެ މެނޭޖްމަންޓުން ވަނީ ސްޓެލްކޯގެ ލާޒިމް ވަސީލަތްތައް (ކްރިޓިކަލް ފެސިލިޓީސް) ރައްކާތެރިކޮށް ބެލެހެއްޓުމަށް މިހާރު ކުރަމުންދާ މަސައްކަތްތައް އިތުރަށް ފުޅާކޮށް، އަދި ކަމާއިބެހޭ ފަރާތްތަކާއި ގުޅިގެން މިކަމަށް އިތުރު މަސައްކަތް ކުރުމަށް ނިންމާފައެވެ.