ޝަހާއަށް، ފާތުންގެ ހަށިގަނޑުގައި އަޅަމުންދިޔަ ވޭން އިޙުސާސް ކުރެވުނު ކަހަލައެވެ. ވޭނުން ފުރިގެންވާ ގޮތަކަށް މަޑުމަޑުން ދެލޯ މަރާލެވުނެވެ.  ދެލޮލުން ހޯސްލާފައި ކަރުނަ އޮހެން ފެށިއެވެ. އެހެނަސް ލޮލުން އޮހެމުންދިޔަ ކަރުނަ ފޮހެލުމާއިއެކު، ހިތްވަރު ކޮށްލާފައި އަނެއްކާވެސް ޑައިރީ ކިޔަން ފެށިއެވެ.

”ޝަހާ، އަހަރެންގެ ދަރިފުޅު އަހަރެންގެ އަތުން ބީވެގެން ހިނގައްޖެ. އަހަރެންގެ ހުރިހާ އުންމީދުތަކެއް ކުޑަ ހިދުކޮޅެއްގެ ތެރޭގައި ފަނާވެގެން އެދިޔައީ ރަޙުމުކުޑަ ފިރިހެނެއްގެ އަނީޔާގެ ޝިކާރައަކަށް ވެގެން. އަހަރެންގެ ޙާލަތުގެ ޚަބަރު ޝަހާއަށް ދޭންވެގެން މި ޑައިރީގަ ލިޔުނު ދުވަހުގެ  ކުރީރޭ، ކަންތައް ވެގެން ދިޔަގޮތާ، އޭރުގެ ޙާލަތު ބަޔާންކުރަން އިން ވަޤުތު ބުނެދޭން ނޭންގޭ ކަހަލަ ގަދަ ވޭނީ ރިހުމެއް ދަށްބަނޑާ އުނަގަނޑުގަ އުފެދުނީ. އެވޭނަށް ކެތްނުވެގެން އަހަރެންނަށް ބާރަށް ރޮއެގަނެވުނީ. އޭރު ރަޝީދު ގޭގަ އުޅޭ. އަހަރެން އިން ޙާލު ފެނިފަ ދުވެފަ އައިސް އަހަރެން އަތްދަނޑި މައްޗަށް ލައިގެން ޞިއްޙީ މަރުކަޒާ ދިމާއަށް ދުއްވައިގަތީ. ނަޞީބަކުން އަހަރުމެންގެ ގެ ހުންނަނީ ޞިއްޙީ މަރުކަޒާ މާދުރުނޫން ހިސާބެއްގަ ކަމަށްވީމަ، ވަރަށް އަވަހަށް ދެވިއްޖެ. އޭރުގަ އަހަރެން އޮތީ ލެއިން ތަތްތެޅިފަ. އަހަރެންނަށް އެހިސާބަށް ދެވުނުކަން އެނގޭ. ދެން ވީގޮތެއް ނޭންގެ. ހަމަހޭވެރިކަން ވީއިރު އަހަރެން އޮތީ ޞިއްޙީ މަރުކަޒުގަ އެޑްމިޓް ކޮށްފަ. ވަރަށް ވަރުބަލި. ހަމައަށް ލޯހުޅުވާލާފަ ބަލައިލިއިރު ކައިރީގަ ރަޝީދު އިނީ އިސްދަށަށް ޖަހައިގެން. ވަރަށް ވަރުދެރަ ވެފަ އޮތީމަ، ރަޝީދުއަށް ގޮވާވެސް ލެވުނީ ވަރަށް ހިތްވަރު ކޮށްގެން. ރަޝީދު އިސްއުފުލާ އަހަރެންނާ ދިމާއަށް ބަލައިލިއިރު އިނީ ރޮވިފަ. ކިހިނެއްވީހޭ އަހާލީމަ ބުނީ އަހަރުމެންގެ ދަރިފުޅެއް ނެތޭ. އަހަރެންނަށް ޤަބޫލުކުރަން ދަތިވި. އެހެންނެއް ނުވާނޭ ބުނުމާއެކު، ބާރަށް ރޮއެގެވުނު. އަދި ބަނޑުގައި މަޑުމަޑުން އަތް އަޅާލެވުނު.  އެކަން އެހެންވީ ރަޝީދުގެ އިހުމާލުން ކަމަށް އަމިއްލައަށް އެއްބަސްވި. އެކަމަކު ހަމައެއާއެކު ބުނަނީ އަހަރެން އޭނަގެ ބަސްނާހާތީ، ތަންކޮޅެއް ހަރުކަށިވާން މަޖުބޫރުވަނީ ކަމަށް. ދެން ފަހަރަކުންވެސް އެހެން ނުހަދަން އަހަރެންނަށް އިލްތިމާސް ކުރަމުން ގެންދިޔައީ. އޭރުން ހުރިހާ ކަމެއްވެސް ދާނީ ރަނގަޅަށް ކަމަށްވެސް ބުނި. އޭރުވެސް އަހަރެންނަށް ރޮވޭ. ރަޝީދު މަޑުމަޑުން އަހަރެން ގައިގަ އަދި ބޮލުގަ ފިރުމަމުން ގެންދިޔަ. އަދި ތަކުރާރުކޮށް ބުނަމުން ގެންދިޔައީ ދެންވެސް ބަސްއަހައިގެން އުޅުމަށް. ރަޝީދު ދައްކަމުން ގެންދިޔަ ވާހަކަ ހުއްޓާލީ، އެތަނަށް ނަރުހަކު އައިތަން ފެނުނީމަ. އަދި ވަޤުތުން ކޮޅަށް ތެދުވެ، އެކުއްޖާ އަހަރެންނާ ކައިރިވުމަށް ތަންދިން. އޭނަ އައިސް ވީކިހިނެއްތޯ އެހީމަވެސް އަހަރެންނަށް ބުނެވުނީ އަހަރެންގެ ދަރިފުޅުގެ ވާހަކަ. އޭނަ އަނބުރާ ގޮސް ޑޮކްޓަރ ގެނައީ. ޑޮކްޓަރ އަހަރެންނަށް ވަރަށް ނަސޭހަތްދެއްވާ ހިތްވަރު ދެއްވާ ހެއްދެވި. އަދި ވީހާވެސް އަވަހަކަށް ރަނގަޅު ފަރުވާއެއް ހޯދުމަށް މާލެއަށް ނުވަތަ އަތޮޅު ހޮސްޕިޓަލަށް ދިއުމަށް އިރުޝާދު ދެއްވި. ރަޝީދު ކައިރީގަ އެވާހަކަ ބުނެފި ކަމަށްވެސް ޑޮކްޓަރ ބުނުއްވި.  ޑޮކްޓަރ ދުރުވުމުން، ރަޝީދު އަހަރެންނަށް ނަސޭހަތް ދިނީ އިތުރު ތަނަކަށް ނުގޮސް އެތަނުގަ އޮވެގެންވެސް ފަރުވާ ލިބޭނެ ކަމަށް ބުނަމުން. އެކަމަކު އެކަން އެހެން ކުރެވޭނީ އަހަރެން ބަސްއެހީމަ ކަމަށް. ޑޮކްޓަރ އެދެއްވި ލަފަޔަށް އިންކާރު ކުރުމަށް އަހަރެންގެ ކައިރީގަ އެދެމުން ގެންދިޔަ. އަދި އަހަރެން އެތަނުގަ ބާއްވައިގެން ރަޝީދުއަށް ވީ އެންމެ ރަނގަޅަކަށް ބަލަހައްޓާނެ ކަމަށްވެސް ވަޢުދުވި. އަހަރެންވެސް އެގޮތަށް އެއްބަސްވިން. ކޮންމެ ގޮތެއްވިޔަސް އެއީ އަހަރެންގެ ފިރިމީހާ ކަމަށް ވީމަ. އަދި އޭނަ އަހަރެންނަށް ވަޢުދުވީ ގޮތަށް ހުރިހާ ކަމެއްވެސް ވަރަށް ރަނގަޅަށް ކޮށްދިންވެސްމެ.“

ކިޔަމުން ދިޔަ ޞަފްޙާއިން ސަމާލުކަން ދުރަށް ޖައްސާލާ، އިސްނެގުމާއިއެކު، ޝަހާ ކޮންމެވެސް ކަމަކާއިމެދު ވިސްނާލިއެވެ. ޝަހާ އެވިސްނަނީ ރަޝީދުއާއި މެދުގައެވެ. އަދި ފާތުންގެ ބޮޑުދައިތަ، ޙައްވަ ދެއްކި ވާހަކައިގެ އަސްލު ޙަޤީޤަތް މިހާރު އެނގިއްޖެ ކަހަލަ ގޮތަކަށް މަޑުމަޑުން ބޯޖަހާލިއެވެ. އެހެނީ އެފަދަ ޙާލަތެއްގައިވެސް ފާތުންއަށް އެކަށީގެންވާ ފަރުވާއެއް ލިބޭނެ ހިސާބަށް ނުގެންދިޔައީ ކީއްވެގެންކަން މިހާރު ޝަހާއަށް ވަރަށް ރަނގަޅަށް ސާފުވެއްޖެއެވެ. އެވަޤުތު ޝަހާގެ މަންމަ ކޮފީތަށި ހިފައިގެން އައިސް ކޮޓަރިއަށް ވަނެވެ. އަދި މެންދުރު އަނބުރަން ގާތްވެފައި ހުރުމާއިއެކު، ކޮންމެވެސް އެއްޗެއް ކާލަން ދިއުމަށް ބުންޏެވެ. ނަމަވެސް ކެއުމަށްވުރެ ބޮޑަށް މިވަޤުތު ޝަހާއަށް މުހިންމުވީ އެޑައިރީ ކިޔާލުމެވެ. އެހެންކަމުން ވަރަށް އޯގާތެރި އަދި އެހާމެ ލޯބިހިނިތުން ވުމަކާއިއެކު، މަންމައާއި ދިމާއަށް ބަލައިލަމުން، އެއްޗެއް ކާނީ ތަންކޮޅެއް ފަހުން ކަމަށް ބުނެލިއެވެ. ނަމަވެސް ދަރިއެއްގެ އެއްވެސް ވޭނަކާއި އާހަކީ، މަޔަކަށް ފޮރުވޭނެ އެއްޗެއް ނޫންތާއެވެ. އެހެނީ، ޝަހާގެ މޫނުމަތިން ހިނިތުންވުން ފެނުނެއް ކަމަކު، އެހިނިތުންވުމުގެ ފަހަތުގައި ކޮންމެވެސް ވަރެއްގެ ހާސްކަމަކާއި ނުތަވަސްކަމެއް ވާކަން ޝަހާގެ މަންމަ ފާހަގަ ކުރިއެވެ. ”ދަރިފުޅު ތިއިނީ އެއްވެސް ކަމަކާ ކަންބޮޑުވެފަތަ؟“ ޝަހާގެ މޫނުމަތީގެ ކުލަވަރަށް ބަލައިލުމާއިއެކު، މަންމަ އަހާލިއެވެ. ޝަހާގެ ނުތަނަވަސްކަން މަންމަ ފާހަގަކޮށްފިކަން ޝަހާއަށް އެނގުނެވެ. އެހެންކަމުން، ނޫންކަމަށް ހަދާފައި މަޑުމަޑުން ޑައިރީ ލައްޕާލިއެވެ. އެހެނީ އެޑައިރީގެ ވާހަކަ މަންމަ ކައިރީގައި ބުނަން އަދި ތަންކޮޅެއް އަވަސްކަމަށް ޝަހާއަށް ވިސްނުނީތީއެވެ. ޝަހާއަށްވެސް އަދި މާބޮޑު އެއްޗެއް އޮޅުންފިލާވަރަށް ޑައިރީ ކިޔާނުލެވޭތީއާއިވެސް އެކުގައެވެ. ”މަންމަ ކީއްވެ ތިހެން ތިބުނީ؟ އަހަރެން މިއިނީ ނުލާހިކު ހަމަޖެހިފައެއްނު.“ ލުއިލުއި ހިނިތުން ވުމަކާއިއެކު ސުވާލު ތަކެއްގެ ސިފައިގާ، މަންމަގެ ސުވާލަށް ޝަހާ ޖަވާބު ދިނެވެ. ”ދަރިފުޅާ، ދަރިފުޅުގެ ތިކަހަލަ އެއްވެސް ކަމެއް މިހާތަނަށް މަންމައަށް ފޮރުވިފަ އެބައޮތްތަ؟“ ”މަންމާ“ މަންމަގެ އެސުވާލަށް ޝަހާ ރައްދު ދިނީ، ގޮތްހުސްވެފައިވާ ކަހަލަ ގޮތަކަށް ބޯއަރިކޮށްލަމުން، މަންމައާއި ދިމާއަށް ބަލައިލުމާއި އެކުގައެވެ. އެވަޤުތު ޝަހާގެ މަންމަވެސް ވަރަށް އޯގާތެރިކަމާއެކު، ޝަހާގެ ކޮނޑުމަތީގައި އަތް ބާއްވާލިއެވެ. އަދި މަންމަ ކުރި ސުވާލުގެ ޖަވާބު ދޭން ޝަހާއަށް ފެނުނު އިރަކުން ނުވަތަ ފެނުނު ދުވަހަކުން ޖަވާބު ދިނުމަށް ބުނެ މަންމަ ކޮޓަރިން ނިކުތެވެ. ޝަހާގެ މަންމަ ޝަހާއާއި އެސުވާލުކުރީ، ޝަހާ މިހާރު ފިކުރު ކުރަމުން އެގެންދަނީ، ކޮން ކަމަކާއި ގުޅޭގޮތުންކަން މަންމައަށް ނޭންގޭތީކީ ނޫނެވެ. އެހެނެއްކަމަކު، އެއިން އެއްވެސް ކަމެއްގައި މަންމަގެ ފަރާތުން އެއްވެސް ކަހަލަ އެހީތެރިކަމެއް ބޭނުންވާނަމަ، މަންމަ އެބަހުރިންކަން ޝަހާއަށް އިޙުސާސް ކޮށްދިނުމުގެ ގޮތުންނެވެ. އަދި އެކަން ޝަހާއަށްވެސް ވަރަށް ރަނގަޅަށް ވިސްނެއެވެ.

މަންމަ ކޮޓަރިން ނިކުންނަތަން ބަލަހައްޓައިގެން ކުޑައިރުކޮޅަކު ޝަހާއިނެވެ. އޯގާތެރިކަމުން ފުރިގެންވާ ހިނިތުން ވުމަކާއައެކުގައެވެ. އެއަށްފަހު އަނެއްކާވެސް ޑައިރީއާއި ދިމާއަށް އެނބުރިލިއެވެ. އަދި ލައްޕާލި ޞަފްޙާ ހުޅުވާލިއެވެ.

”ޝަހާއަށް އެނގޭތަ؟ އަހަރެން ގެއަށް އައިފަހުންވެސް ރަޝީދު އަހަރެންނަށް ވަރަށް ރަނގަޅު. އަހަރެންގެ ހުރިހާ ކަމެއްވެސް ކޮށްދިނީ ބޮޑުދައިތަމެން އެއްވެސް މީހަކަށް ނުޖައްސާ އަމިއްލަ އަތުން. އަސްލުގަ އަހަރެންވެސް ހުރީ ވަރަށް ހިތްހަމަޖެހިފަ. ރަޝީދުގެ މަޤްޞަދަކަށްވީ ވެދިޔަކަންތަން ހަނދާން ނައްތާލަން މަސައްކަތް ކުރުވުން. އެކަމަކު އެއީކީ އެހާ ފަސޭހަކަމެއް ނޫންތާ ދޯ. އަދި ރަޝީދުގެ މަޤްޞަދު ޙާޞިލުވަމުން ދިޔަކަމަށްވެސް ރަޝީދުއަށް ހީވާންފެށި. އަހަރެން ރަޝީދުކައިރީގަ އެވާހަކަ ނުދައްކާތީ ކަންނޭންގެ. ތެދުތެދަށް ބުނަންޏާ އަހަރެން ހުންނަނީ ވަރަށް ބިރުން. އެއީ ކިތަންމެ ރަނގަޅަށް ހުރެފަވެސް، އަހަރެންގެ ފަރާތުން ރަޝީދު ނުރުހޭ ކަހަލަ ކަމެއް ފެނިއްޖިއްޔާ ދެން އެދުވަހުގެ ކަންތައް އެދިޔައީ. ދެން ކަންތައް ކުރާނީ ވަރަށް ވައިލެންޓްކޮން. ސީދާ ސީދާ އަހަރެން ގައިގަ ނުޖެހިޔަސް ގައިގަ އަތްލާނީވެސް ވަރަށް ތަދުވާ ގޮތްގޮތަށް. ދެން އެގޮތަށް އެތައް އިރެއްވަންދެން އަހަރެންނަށް އެކަންތައް ހަނދާން ކޮށްދެމުން އެއްޗެހި ގޮވަމުން ގެންދާނެ. އަދި ގައިގެ އެކި ތަންތަނުގަ ވަރަށް ތަދުވާ ގޮތްގޮތަށް ހިފާވެސް ހަދާނެ. އަހަރެންނަށް މާބޮޑަށް ރޮވޭހެން ހީވިމަ ދެން ބުނާނެ ކީއްވެހޭ ތިރޮނީ. ތިމަންނަ ބުނާގޮތަށް ހަދައިގެން އުޅޭނަމަ ތިހެން ރޯން ޖެހޭކަށް ނުޖެހުނީހެއް ނޫންހޭ. ދެން އަހަރެންނަކަށް ނޭންގެ އެއީ ކޮންކަހަލަ މީހެއްތޯ ބުނެދޭކަށް. ރަނގަޅުވިއްޔާ ވަރަށް ރަނގަޅުވާނެ. އެހެންވީމަ އަހަރެންވެސް ބަލަނީ ވީހާވެސް ބޮޑަކަށް ރަޝީދު ރުޅި ނާންނާނެ ގޮތަކަށް ކަންތައްތައް ކުރެވޭތޯ. ބޮޑުދައިތަ ނޫނީ އަޙްމަދުކޮއްކޮ އައިސް ހުންނަ ގަޑިއެއްގަ ވިއްޔާ ވަރަށް ރަނގަޅުވާނެ. އެހެންވީމަ ރަޝީދުގެ އަސްލު ސިފައެއް އެމީހުންނަކަށްވެސް ނުފެންނާނެތާ ދޯ.“

ޝަހާއަށް މިހާރު ކޮންމެވެސް ވަރަކަށް ރަޝީދުއަކީ ކޮންކަހަލަ މީހެއްކަން ވިސްނެން ފަށައިފިއެވެ. އެހެނީ ޝަހާގެ ދާއިރާގެ ގޮތުންވެސް ރަޝީދުގެ ގޮތް ދެނެގަންނާކަށް މާ އުނދަގުލެއް ނުވާނެތާއެވެ. ޝަހާ އަމިއްލަ ހިތާހިތުން ވިސްނާލުމާއިއެކު، ރަޝީދުގެ ކިބައިގާ ހުރި މައްސަލަ ވަޒަން ކޮށްލިއެވެ. ރަޝީދުގެ ނަފްސާނީ ދުޅަހެޔޮކަމުގައި މައްސަލައެއް އެބައުޅޭ ކަމަށް ޝަހާ ވަރަށް ބޮޑަށް ލަފާކުރިއެވެ. އަދި އެއީ ކުޑަކަމެއް ނޫންކަންވެސް ޝަހާ ދެނެގަތެވެ. އެކަމާއިމެދު ވިސްނާލަން އިނދެފައި ޝަހާގެ ދުލުން ބޭރުވީ އެންމެ ލަފްޒެކެވެ. ”ނާސިސިސްޓް“. އާނއެކެވެ. ރަޝީދުއަކީ، ނާސިސިސްޓިކް ޕާރސަނަލިޓީ ޑިސްއޯޑަރ ހުރި މީހެއް ކަމަށް ޝަހާ ވަރަށް ބޮޑަށް އަންދާޒާ ކުރިއެވެ. އެހެނީ، އެފަދަ މީހުންނަކަށް އެމީހުންނަށްވުރެ، މުހިންމު ބަޔަކު ނުހުންނާނެއެވެ. ތިމާ ވަރުގެ މީހެއް ނެތް ކަމަށް ދެކޭނެއެވެ. އެމީހަކަށް ނޭދެވޭ ކަމެއް ކުރެވުނަސް އެކަން އެހެންވީ އަނެކާގެ އިހުމާލުން ނުވަތަ އޭނައަށް އެހެން އެކަން ކުރަން މަޖުބޫރު ކުރުވީމަ ކޮންމެވެސް އެހެން މީހަކު ކަމަށް ބުނާނެއެވެ. އެމީހެއްގެ ނަޒަރުގައި އަބަދުވެސް ކުށްކުރާނީވެސް ކުށްވެރި ވާނީވެސް ދެން ހުންނަ މީހާއެވެ. އޭނާއަކީ މަޢުސޫމެކެވެ. ރަނގަޅަށް ހުންނައިރު ވަރަށް ރަނގަޅު ވާނެއެވެ. އެހެނަސް އަނެކާގެ ފަރާތުން ކިރިޔާވެސް ހިތްހަމަ ނުޖެހޭފަދަ ކަމެއް ފެނުނަސް އޭނާގެ މައްޗަށް އަނިޔާވެރި ވުމަށްވެސް ފަހަކަށް ނުޖެހޭނެއެވެ.

މިފަދަ ވިސްނުމެއްގައި ޝަހާ އިނދެފައި ފުންނޭވާއެއް ލިއެވެ. އަދި ފާރުގައި ހުރި ގަޑި ބަލައިލިއިރު އަޞުރުވާން ކައިރިވެއްޖެއެވެ. ވަޤުތުން ޑައިރީ ލައްޕާލުމަށްފަހު، ފާޚާނާއަށް ވަދެ ވުޟޫއު ކޮށްލައިގެން ނިކުމެ، މެންދުރު ނަމާދު ކޮށްލިއެވެ. އަދި މަންމަ ކޮބައިތޯ ބަލައިލަން ނިކުތެވެ. ހަވީރު މަންމަ ގޮވައިގެން ހޮސްޕިޓަލަށް ދާނަމޭ ބުނެވިފަ އޮތީމައާއިވެސް އެކުގައެވެ. ވަރަށް ވަރުބަލި ވެފައިހުރި ކަހަލަ ގޮތަކަށް ހިނގާލާފައި ގޮސް ޝަހާ މަންމަގެ ކޮޓަރީގައި ޓަކި ޖަހާލާ، މަޑުމަޑުން މަންމައަށް ގޮވާލިއެވެ. ކުޑަ އިރުކޮޅެއްގެ ތެރޭގައި މަންމަ ދޮރު ހުޅުވާލިއެވެ. އަދި ފެންވަރައިގެން އަޞުރު ނަމާދު ކޮށްލައިގެން ތައްޔާރު ވާނަން ކަމަށް ބުންޏެވެ. އެހެންކަމުން ޝަހާވެސް އަނބުރާ ކޮޓަރިއަށް ދިޔައެވެ. ހޮސްޕިޓަލަށް ދިއުމުގެ ކުރިން ފެންވަރާ، ތައްޔާރު ވެލާށެވެ.

އަނެއްކޮޅުން ފާތުން އެއޮތީ ފުން ޚިޔާލެއްގެ ތެރެއަށް ގެއްލިފައެވެ. އެއްއަތުން ނިތްކުރި މަތީގައި އަތް ބާއްވާލައިގެން އަނެއް އަތުގައި ގުޅާފައި އޮތް އައިވީ ފުޅިއާއި ދިމާއަށް ބަލަހައްޓައިގެންނެވެ. ބަލަހައްޓައިގެން އޮތީ އައިވީ ފުޅިއަށް ކަމަށްވިޔަސް ފާތުންގެ ފިކުރާއި ޚިޔާލުގެ މިސްރާބު ހުރީ މުޅިން އެހެން ދިމާއަކަށެވެ. ފާތުންގެ ބަލާބޮޑުކުރި މައިބަފައިން ކުއްލިގޮތަކަށް އެއްފަހަރާ ދިޔައީވެ. ދުނިޔެއަށް ހަމަހޭވެރިކަންވެ ލޯ ހުޅުވާލެވުނުއިރު އުފަން މަންމައެއް ނެތެވެ. އުފަން ބައްޕަ ވަކިވެގެން ދިޔައީ ފާތުންއަށް ބައްޕައެއްގެ ލަފަޔާއި އިރުޝާދު އެންމެ ބޮޑަށް ބޭނުންވި ދުވަހުއެވެ. ބައްޕަގެ ބަހަށް އިތުބާރުކޮށް އެމީހަކާއިއެކު، ޒަވާޖީ ޙަޔާތެއް ފެށި މީހާވީ އަނިޔާވެރިޔަކަށެވެ. ފާތުންގެ އަމިއްލަ ހަށިގަނޑުގެ ތެރޭގައި ގަރުބަގަނެ، ލޮލަށް ފެނުމުގެ ނަޞީބު ނުލިބި، ދެކުދިން ބީވެގެން ދިޔައީއެވެ. މިހާރުވެސް ފާތުންގެ ހަށިގަނޑުގައި އަޅާ ވޭނުގެ ސަބަބުން ލިބެން އޮތް ކުއްޖާވެސް ސަލާމަތުން އަތްމައްޗަށް އަރާނެ ކަމުގެ ޔަޤީންކަމެއް ނެތެވެ. އާނއެކެވެ. މިއިން އެއްވެސް ކަމަކާމެދު އެއްވެސް މީހަކާ ޝަކުވާއެއް ނުކޮށް މުޅި އުމުރު އެހޭދަ ކުރަނީއެވެ. ޝަކުވާ ކުރާނީވެސް ވަކި ކާކު ކައިރީގަ ހެއްޔެވެ؟ އެއީ ޚުދު ފާތުންގެ ތަޤުދީރުކަން ފާތުން ޤަބޫލުކުރެއެވެ. އެއިން އެއްވެސް ކަމެއްގައި އިތުރު މީހަކު ކުށްވެރި ކުރާކަށް ފާތުން ބޭނުމެއްވެސް ނޫނެވެ. ﷲ އެކަނލާގެ އެއްވެސް އަޅަކަށް ދެރަގޮތެއް މެދުވެރި ނުކުރައްވާނެކަން ފާތުންއަށް އެނގެއެވެ. އަދި އެކަން ޤަބޫލުވެސް ކުރެއެވެ. އެހުރިހާ ކަމެއް ވެގެން ދިޔައިރުވެސް ހިތްވަރު ދެރަނުކޮށް އެހުރެވެނީ އެ ޔަޤީންކަން އަބަދުވެސް ފާތުންގެ ހިތުގައި އޮންނާތީއެވެ.

އެހުރިހާ ކަމަކާއިމެދު، އެއްފަހަރާ ވިސްނާލުމުން ފާތުންގެ ލޮލުން ކަރުނަ އޮހިގެން ދިޔައެވެ. ހިތްވަރު ދެރަކަމަކުން ނޫނެވެ. އެކަމަކު އެހުރިހާ ކަމަކަށްވެސް ކެތްތެރި ވުމުގެ ހެޔޮ ތަޢުފީޤު ﷲ ޞުބުޙާނަހޫ ވަތަޢާލާ ފާތުންއަށް ދެއްވީތީއެވެ.  އެހެނަސް ފާތުންއަކީވެސް އިންސާނެކެވެ. އަމިއްލަ އިޙުސާސްތަކަކާއި ޖަޒުބާތެއްވެސް އޮންނާނެތާއެވެ. ހަމަ އެހެންމެ އަސަރެއްވެސް ކުރާނެތާއެވެ. އެހެނީ ފާތުންގެ އަތުން ބީވެގެން ދިޔަ އެއްވެސް އެއްޗަކީ އަނބުރާ ލިބޭނެ އެއްޗެއް ނޫނެވެ. މިހުރިހާ ކަމަކާއި ފިކުރެއްގެ ތެރެއިންވެސް ފާތުން ހިތްހަމަ ޖެހޭ އެއްކަމެއް އެބައޮތެވެ. އެއީ އަނިޔާވެރި ވަކި ތަކެއްގެ އަތްދަށުން ސަލާމަތް ވީކަމުގެ ހިތްހަމަ ޖެހުމެވެ. އާނއެކެވެ. ރަޝީދު، ފާތުން ވަރިކުރީވެސް އައިސް ހުރި ރުޅި ކޮންޓްރޯލް ނުވެގެންނެވެ. ފާތުންގެ ކުށެއް އޮވެގެންނެއް ނޫނެވެ. ހަމަ ކުޑަކުޑަ ކަމެކެވެ. ފާތުންއާއިއެކު، ކޯޓުގައި މަސައްކަތްކުރާ ފިރިހެން މުވައްޒަފަކު، ފާތުންމެން ގޭދޮށުން ދަމުން ފާތުން ފެނިގެން ޙާލު އަހާލި މަންޒަރު ރަޝީދުއަށް ފެނިގެންނެވެ. އަދި އޭގެ ރައްދުގައި ފާތުން ހިނިތުން ވުމާއިއެކު ޖަވާބުދާރީ ވުމުންނެވެ. މާބަނޑު ޙާލަތުގައި އިންދާ ދަމާ ކޫއްތަމުން ގޭތެރެއަށް ވައްދާފައި އެތައް އަނިޔާތަކެއް ދީފައެވެ. ގޭދޮށު މީހުންނަށް ފާތުންގެ ވޭނުން ފުރިގެންވާ ރުއިމުގެ އަޑު އިވުނެވެ. ފާތުންގެ ބޮޑުދައިތަ އަދި އަޙްމަދުކޮއްކޮވެސް އައީ އެޚަބަރު ލިބިގެންނެވެ. ވަރިކޮށްފައި ދަމުންވެސް ދިޔައީ ބަނޑުގައި ކޮޅުފައިން ޖަހާފައެވެ. އޭގެ ފަހުން ފާތުންއަށް ހަމަހޭވެރިކަންވީ މިހާރު އެނދުމަތި ކޮށްފައި އެއޮތް އެނދުގައި އޮއްވައެވެ.

އެތައް އިރެއްވަންދެން އެފަދަ ޚިޔާލުތެކެއްގެ ތެރެއަށް ގެއްލިގެން އޮއްވާ އަޙްމަދުކޮއްކޮ ގޮވާލި އަޑަށް ސިއްސައިގެން ދިޔައެވެ. އަދި ސަލާމަތުން އޮތް އަތުން ދެލޮލުން އޮހެމުން ދިޔަ ކަރުނަ ފޮހެލިއެވެ. ފުން ނޭވާއެއް ލުމާއިއެކު، ކިހިނެއްވީތޯ ސުވާލު ކޮށްލިއެވެ. އެވަޤުތު އަޙްމަދު އަތުގައި ހުރި އާފަލުތަށި ދައްކާލުމާއިއެކު، އެއިން އާފަލު ފޮއްޗެއް ކާލުމަށް ބުންޏެވެ. ފާތުންގެ ޙާލަތު އަޙްމަދަށް ވަރަށް ރަނގަޅަށް އިޙުސާސް ކުރެވެއެވެ. އެހެނީ ފާތުންގެ ދިރިއުޅުން އެންމެ ގާތުން ދުށް އެކަކީ ޚުދު އަޙްމަދެވެ.  ފަހަކަށް އައިސް ހުރިހާ ވާހަކަތަކެއް އަޙްމަދު ކައިރީގައި ފާތުން ހިއްޞާ ނުކުރިއެއް ކަމަކު، އަޙްމަދަށް ނޭންގޭ އެކައްޗެއްވެސް ނެތެވެ. ފާތުންއަކީ އޭނާގެ ލޯބިވާ ދޮންތައެވެ. އެންމެ ތުއްތު އިރުއްސުރެވެސް އެންމެ ގާތުގައި ހުރި މީހާއެވެ. ވީމާ، ފާތުންގެ ކިބައިން ކިތަންމެ ކުޑަކަމެއް ފެނުނަސް އަޙްމަދަށް އެނގެއެވެ. އެހުރިހާ ކަމަކާއި ބެހޭގޮތުން ފާތުންއާއި ސީދާ ސިދާ ސުވާލު ނުކުރިޔަސް އަޙްމަދުވެސް ދިޔައީ އޭނަގެ ދޮންތަގެ ހާލު ދެކި އެކަމަށް ކަރުނަ އަޅަމުންނެވެ. އަދި އެކަމުގައި އަޙްމަދަށް ކޮށްދެވެން އޮތް ކޮންމެ ކަމެއްވެސް ސީދާކޮންނާއި ނުސީދާކޮން ކޮށްދެމުންނެވެ. މިހާރުވެސް ހުރިހާ ކަމެއް ދޫކޮށްލާފައި އައިސް އެހުރީ އޭނާގެ ދޮންތައަށް ޓަކައެވެ. ފާތުންއަށް ރަނގަޅު ދިރިއުޅުމެއް ލިބުމަށް އެންމެ ބޮޑަށް އެދޭ އެކަކީވެސް އަޙްމަދެވެ.

އަޙްމަދުގެ އަތުގައި ހުރި އާފަލު ތައްޓާއި ދިމާއަށް ބަލައިލުމާއިއެކު، އެތަނުން އާފަލު ފޮއްޗެއް ދިނުމަށްބުނެ، ފާތުން އަތް ދިއްކޮށްލިއެވެ. އާފަލުފޮތި ދިއްކޮށްލަމުން އެނދުކައިރީގައި ހުރި ގޮނޑީގައި އަޙްމަދު އިށީނދެލިއެވެ. އަދި ވަރަށް ނުކެރިފައި އިން ގޮތަކަށް ފާތުންއަށް ގޮވާލިއެވެ. ”ދޮންތާ“. އަޙްމަދާއި ދިމާއަށް ފާތުން ބަލައިލިއެވެ. އަދި ކީކޭތޯ އަހާލިއެވެ. ”އަސްލުގަ އަހަރެން ކުޑައިރު ދޮންތަގެ ލައިފްގެ ވާހަކަތައް އަހަރެންނަށް ކިޔައިދެމުން ދިޔަގޮތަށް މިހާރު ކިޔައި ނުދޭތީ ވަރަށް ދެރަވޭ. ދޮންތައަށް ތިވަރުގެ ކަމެއް ދިމާވިއިރު ދޮންތަގެ އަޙްމަދުކޮއްކޮވެސް އެބަހުރިކަން ހަނދާންކޮށް ނުލީ ކީއްވެ؟ އަހަރެން އަނެއްކާ މިހުރިހާ ވާހަކައެއް މި ދައްކަނީ ދޮންތަގެ ސްޓްރެސް ބޮޑުކުރާކަށް ނޫން އިނގޭ. އަހަރެންނަށް ދޮންތަގެ ޙާލަތު ވަރަށް ރަނގަޅަށް އެގޭތާ ދުވަސްކޮޅެއް ވެއްޖެ. އެއްދުވަހު އަހަރެން ދޮންތަ ހޯދަންވެގެން ދިޔައިރު ރަޝީދުބެ ދޮންތައާއި ދިމާއަށް އެއްޗިހި ގޮވާއަޑު އަހަރެންނަށް އިވުނީ. ވަރަށް ގިނައިރު ވަންދެން އަޑުއަހަން ހުރިން. އަދި ދޮންތައަށް ވަރަށް ބޮޑަށް އަނިޔާކުރިކަންވެސް އަހަރެންނަށް އެނގޭ. ދޮންތަ ކައިރިއަށް ދާންވެސް ބޭނުންވި. ދޮންތަ ސަލާމަތްކުރަން. އެކަމަކު ދެން ދޮންތަ ރޯން ފެށީމަ، ވަރަށް ރަނގަޅަށް ދޮންތައާ ވާހަކަ ދައްކާ އަޑުވެސް އިވުނު. ދެން އަހަރެން ހީކުރީ ރަޝީދުބެ ތަންކޮޅެއް ރުޅިގަދަވެފަ ހުރީމަ އެދުވަހު އެހެން ވީކަމަށް. އެކަމަކު ފަހުން އެނގުނު އެއީ ރަޝީދުބެ އަބަދުވެސް ދޮންތަޔާމެދު ކަންތައް ކުރާ ގޮތްކަން. ވަރަށް ބޮޑަށް ހީކޮށްގެން ހުރީ އަހަރެން ކައިރީގައި ފަހުން ބުނާނެ ކަމަށް. އެކަމަކު މިހާ ހިސާބަށް ކަންތައް ދާނެކަން އެނގުން ނަމަ މިހެން މަޑަކުން ނުހުރީމުސް. ދޮންތަ ވަރިކޮށްފަ ދިޔަ ދުވަހުވެސް އަހަރެންނަށް ދެވުނުލެއް ތަންކޮޅެއް ލަސްވީ. އެހެންނޫންނަމަ..“ އަޙްމަދުގެ ވާހަކަ މިހާ ހިސާބަށް ދިއުމުން ފާތުން އަޙްމަދު ދައްކަމުން ދިޔަ ވާހަކަ ހުއްޓުވިއެވެ. ”އެއީ މިހާރު ފާއިތުވެ ގޮސްފައިވާ ދުވަހެއް. އަހަރެން ޝުކުރުކުރަން އެކަމުން އަހަރެން ސަލާމަތްވީތީ. އަހަރެންނަށް އެނގޭ އަޙްމަދު ކޮއްކޮ ތިބުނާ ދުވަހު ގެއަށް އައިކަން. ކޮއްކޮ އެތާ ހުއްޓާ އަހަރެން ދުށިން. އެހެންވެ ވަރަށް ކަންބޮޑުވި. އެކަމަކު ކޮއްކޮ ގެއަށް ގޮސް ބޮޑުދައިތަ ކައިރީގަ ނުބުނާނެ ކަމުގެ ޔަޤީންކަން އޮތް. އެހެންވީމަ ކޮންމެވެސް ވަރެއްގެ ހިތްހަމަ ޖެހުމެއްވެސް ލިބުނު.“ އެދުވަހު ކަންތައް ވީގޮތުގެ ވާހަކަ ފާތުންވެސް އޭނާގެ ހަނދާނަށް ގެނައެވެ. ”މިހާރު ހިތަށް އަރާ މަންމަ ކައިރީގަ ބުނެވުނު ނަމައޭ.“ ވަރަށް ރުޅިއައިސް އިނދެފަ އަޙްމަދު ބުނެލިއެވެ.

ފާތުންގެ އޭރުގެ ޙާލަތާއިމެދު ދެބެން ވާހަކަ ދައްކަން ތިއްބާ ދޮރުގައި ޓަކި ޖަހާލިއަޑަށް އަޙްމަދު ގޮސް ދޮރު ހުޅުވާލިއެވެ. ދޮރުމަތީގައި ހުރީ ޝަހާ އަދި އޭނާގެ މަންމައެވެ. ”ފާތުން ބަލާބަލަ ކާކުތޯ މިހުރީ ފާތުން ދެކިލަން އައިސް“ ޝަހާ މަންމަ ގޮވައިގެން ކޮޓަރިއަށް ވަންނަމުން ފާތުންއަށް ގޮވާލިއެވެ. ޝަހާ މަންމައަށް ފާތުން ފެނުމާއިއެކު ރޮވިއްޖެއެވެ. އަދި ދުވެފައި ކަހަލަ ގޮތަކަށް ގޮސް ފާތުންގެ ގައިގާ ވަރަށް އޯގާތެރިކަމާއިއެކު، ބައްދާލިއެވެ. ފާތުންއަށްވެސް ހަމަ ރަނގަޅަށް ރޮވިއްޖެއެވެ. ”ފާތުމަތު، ދަރިފުޅާ ހާދަ ދުވަހެއް ކޮށްލާފައޭދޯ މިފެނުނީ. ހިއެއްވެސް ނުކުރަން ދެން ދުވަހަކުވެސް ބައްދަލު ވާނެކަމަކަށް“ ފާތުންވެސް ރޮމުން ރޮމުން ވާހަކަ ދެއްކިއެވެ. ”ޝަހާ މަންމާ. ކިހިނެއްތަ؟ ވަރަށް ބޮޑަށް ދެކިލާ ހިތްވެފަ އޮއްވަ ތިއައީ. ވަރަށް އުފާވެއްޖެ.“ ޝަހާ މަންމަ ފާތުން ކައިރިން ކޮޅަށް ތެދުވަލާފައި ފާތުންއަށް ގެނައި ހަދީޔާތައް ދައްކާލިއެވެ. ”ދެން ތި ޙާލަތުގަ އޮވެގެން ރޯން ނޫޅޭ. މިހުރިހާ ސާމާނު ކައި ހުސްކުރަން ތެދުވޭ.“ ފާތުން ކައިރިއަށް ހިނިއައެވެ. އަދި އެތަކެތީގައި އަތް ޖައްސާލުމާއިއެކު، ޝަހާ މަންމައަށް ޝުކުރު އަދާކުރިއެވެ. ”ފާތުމަތު، އަސްލު ކިހިނެއްތަ ވެގެން ތިއުޅެނީ؟ ޝަހާވެސް އަހަރެން އެހީމަވެސް އެއްވެސް އެއްޗެކޭ ނުބުނި. ހަމަ އެކަނި ފާތުން ބަނޑުބޮޑު ވާހަކަ ބުނެލީ. ކޮބާ ފިރިމީހާ؟“ ޝަހާ މަންމަގެ އެތައް ސުވާލެއް އެއްފަހަރާ ފާތުންއަށް ކުރިމަތި ކުރުވިއެވެ. އެވަޤުތު ފާތުން ހަދާނެގޮތް ހުސްވި ކަހަލައެވެ. އަދި ވަށްކަޅިން ކަހަލަ ގޮތަކަށް ޝަހާއާއި ދިމާއަށް ބަލައިލިއެވެ. ފާތުންގެ އެބަލައިލުމުގެ ރައްދުގައި، ޝަހާ ނަގާ ދައްކާލީ އޭނާގެ ދަބަސް ތެރޭގައި އޮތް ފާތުންގެ ޑައިރީއެވެ. އަދި އިހަށް އެއްވެސް ޖަވާބެއް ނުދިނުމަށް އެދި ޝަހާގެ ތުންފަތުގައި މަޑުމަޑުން ޝަހާދަތް އިނގިލި ބާއްވާލިއެވެ. އެވަޤުތު ޑައިރީއަށް ބަލައިލުމާއިއެކު، ޝަހާގެ މޫނުމައްޗަށް ބަލައިލުމުން ޝަހާގެ އިޝާރާތް ވަރަށް ރަނގަޅަށް ފާތުންއަށް އެނގުނެވެ. އަދި ފާތުންގެ މާޒީގެ ވަރަށް ބޮޑު އެއްޗެއް ޝަހާއަށް އެނގިއްޖެކަން ފާތުންއަށް އެނގުނެވެ. އެވަޤުތު ހިތްހަމަ ޖެހުމުގެ ފުން ނޭވާއެއް ފާތުންއަށް ލެވުނެވެ.

• ނުނިމޭ –