މްޑީޕީން މީރޭ މަގުމައްޗަށް ނުކުތީ ދިވެހިރައްޔިތުންގެ އަޑު ސަރުކާރަށް އިއްވަން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމްޑީޕީން މިރޭ ބާއްވަމުންދާ ހިނގާލުމުގެ ތެރެއިން ވާހަކަ ދައްކަވަމުން ޝާހިދު ވިދާޅުވީ މިހާރު ރައްޔިތުންގެ އަޑު ސަރުކާރަށް އިވޭނެ ކަމަށެވެ. ރައްޔިތުން ބޭނުންވަނީ ރައީސް ޑރ. މުހައްމަދު މުއިއްޒު އިސްތިއުފާ ދެއްވުން ކަމަށް ޝާހިދު ވިދާޅުވިއެވެ. މިހާރު މިސަރުކާރުން ވަނީ ގާނޫނު އަސާސީ ފުނޑާލާފައި ކަމަށާއި ޒުވާނުންގެ އުންމީދު ތަކާއި ރައްޔިތުން ވެސް ފުނޑާލާފައި ކަމަށް ވިދާޅުވިއެވެ. މިހާރު ރައްޔިތުންނަށް ފުދިއްޖެ ކަމަށައި މިހާރު މިދަނީ ފުނޑެމުން ކަމަށް ވެސް ބުނެފައިވެއެވެ.
އެމްޑީޕީގެ ޗެއާޕާސަންގެ ނާއިބު އަހުމަދު އަބްދުﷲ ވިދާޅުވީ މިހަރަކާތް މާލޭގެ އިތުރުން ރަށަރަށުގައި ވެސް ކުރިއަށް ގެންދާނޭ ކަމަށެވެ. މިސަރުކާރުން ބިރުދައްކަމުންދަނިކޮށް ވެސް ރައްޔިތުން ވަނީ ބިރުފަހަނައަޅާ މަގުމައްޗަށް ނުކުމެ އެމީހުންގެ ޝުއޫރު ސަރުކާރަށް އިއްވަން ފަށައިފައި ކަމަށެވެ. މިއީ ސަރުކާރުން ވަރަށްބޮޑަށް ވިސްނައި ކަންކަން އިސްލާހު ކުރުމަށް ލިބޭ ފުރުސަތެއް ކަމަށްވެސް ވިދާޅުވިއެވެ.
މަޖިލިސް މެންބަރު ޑރ. ޝަމްހީދު ވިދާޅުވީ ރައްޔިތުން ނުކުމެ މިތިބީ އާސަންދަ ފަދަ ޚިދުމަތްތައް އޭގެ އެންމެ ފުރިހަމަ ގޮތުގައި ރައްޔިތުންނަށް ނުލިބޭތީ ކަމަށް ވެސް ވިދާޅުވިއެވެ. މީގެ އިތުރުން އެތައް ހައްގުތަކެއް ސަރުކާރުން ވަނީ ނިގުޅައިގެންފައި ކަމަށް ވެސް ވިދާޅުވެފައިވެއެވެ.
އެމްޑީޕީގެ ނާއިބު ރައީސް ހިސާން ހުސައިން ވިދާޅުވީ މިރޭ އެއްވެފައިވާ މީހުންގެ އަދަދަށް ބަލާއިރުވެސް ރައްޔިތުން ފުނޑިފައިވާ މިންވަރު އޭނގޭ ކަމަށެވެ. ރައްޔިތުން މަގުމައްޗަށް ނުކުތީ ސަރުކާރުގެ އަނިޔާވެރިކަން އިންތިހާއަށް ބޮޑުވުމުން ކަމަށް ވެސް އޭނާ ވިދާޅުވިއެވެ. އޭގެ ސަބަބުން ރައްޔިތުންވަނީ މާޔޫސްވެފައި ކަމަށްވެސް ވިދާޅުވިއެވެ.
