އެމްޑީޕީން މިހާރު ކުރިއަށްގެންދާ ”ފުދިއްޖެ-ފުނޑިއްޖެ“ ހިނގާލުމުގައި އެންމެ ގަދަ އެއްއަޑަކީ ހޯމް މިނިސްޓަރ އަލީ އިހްސާން ހައްޔަރު ކުރުމަށް ގޮވައިލާ އަޑެވެ. އޭނާ ހައްޔަރު ކުރުމަށް ގޮވާލަމުންދަނީ މިނިސްޓަރ އިސްވެ ހުންނަވައިގެން އެމްޑީޕީގެ މެންބަރުންގެ ނަމުގައި ވަގު ފޯމްތަކެއް ފުރައިގެން އީސީއަށް ހުށަހަޅައިގެން ޕީއެންސީއަށް ވައްދަމުންދާތީ ކަމަށް ބައިވެރިންދަނީ ބުނަމުންނެވެ.
މިނިސްޓަރ ވަނީ އެމްޑީޕީގެ މެންބަރުންގެ ޝަޚުސު އޮޅުވާލާފައި ކަމަށާއި އެއީ ފުލުހުން ނުކުމެ އޭނާ ހިފައި ހައްޔަރުކުރަން ޖެހޭ ސަބަބެއް ކަމަށް އެމްޑީޕީގެ ކުރީގެ ނާއިބު ރައީސް މުހައްމަދު ޝިފާޒު (ޝިއްޕެ) ވިދާޅުވިއެވެ. ޝިއްޕެ ވިދާޅުވީ މިނިސްޓަރ އިހުސާން ”ވައްކަންކޮށްފި“ ކަމަށާއި ވައްކަންކުރީ ރައްޔިތުންގެ އައިޑީކާޑު ބޭނުންކޮށްގެން އެމްޑީޕީގެ ދަފްތަރުން ކަމަށް އޭނާ ވިދާޅުވިއެވެ. އެހެންކަމުން މިވަގުތު ވެސް އޭނާ ހައްޔަރުކުރަންޖެހޭ ކަމަށް ޝިއްޕެ ވިދާޅުވިއެވެ.
މިނިސްޓަރ އިހްސާން ހައްޔަރު ނުކޮށްފި ކަމަށްވާނަމަ ދެން މުޒާހާރާގެ މިސްރާބު ބަދަލުކުރާނީ ރައީސް ޑރ. މުއިއްޒު އުޅުއްވާ ގެކޮޅު ކަމަށްވާ މުލީއާގެއާ ދިމާއަށް ކަމަށް ޝިއްޕެ ވިދާޅުވިއެވެ. އެމްޑީޕީއަށް މުޒާހަރާތަކާއި އެއްވުންތައް ބާއްވަން އެނގޭނޭ ކަމަށާއި ބިރެއް ސިހުމެއްނެތް ކަމަށްވެސް ޝިއްޕެ ވިދާޅުވިއެވެ.
