އެމެރިކާގެ ރައްޔިތެއް ކަމަށްވާ އޮނިޖާ އެންޑްރޫ ރޮބިންސަން ކިޔާ އުމުރުން 33 އަހަރުގެ އަންހެނަކު ކަރާޗީގައި ތާށިވެފައި ވަނީ ޕާކިސްތާންގެ އޮންލައިން ލޯބިވެރިއަކާ ބައްދަލު ކުރަން ކުރި ރޮމޭންޓިކް ދަތުރެއް ނުއަތު ބުރަކަށް ބަދަލު ވުމުންނެވެ.

އުމުރުން 19 އަހަރުގެ ނިޟާލް އަހުމަދު މެމަންއާ ކައިވެނި ކުރަން އޮކްޓޯބަރު މަހު އައި ރޮބިންސަންއާ ކައިވެނި ކުރެވެން ނެތީ އާއިލާއިން ދެކޮޅު ހަދާތީ ކަމަށް ފިރިހެން ސޮރު ބުންޏެވެ.

ރޮބިންސަން މަގުމަތިވެ ވަންނާނެ ތަނެއް ނެތުމުން ގާތްގަނޑަކަށް 30 ގަޑިއިރު ވަންދެން މެމޮންގެ އެޕާޓްމަންޓުން ބޭރުގައި ހޭދަކުރި ކަމަށް ރިޕޯޓުތައް ބުނެއެވެ. ރިޕޯޓްތައް ބުނާ ގޮތުގައި އޭނާ އެނބުރި އެމެރިކާއަށް ދިއުމަށްވެސް ވަނީ ދެކޮޅުހަދާފައެވެ.

އޭނާގެ ނިކަމެތި ހާލަތަށް ސަމާލުކަން ލިބުނީ ޕާކިސްތާން ތަރައްގީ ކުރުމަށް އެހީތެރިވުމަށް 100،000 ޑޮލަރު ބޭނުންވާ ކަމަށް ބުނެ ނޫސްކޮންފަރެންސެއް ބޭއްވުމާ ގުޅިގެންނެވެ.

އެ އިވެންޓުން ވައިރަލް ވީޑިއޯއެއްގައި ރޮބިންސަން ވަނީ ޕާކިސްތާނުގެ މަގުތަކާއި އިމާރާތްތައް މަރާމާތު ކުރަން ރާވާފައިވާ ކަމަށް ބުނެ އަވަސް އަވަހަށް 20،000 ޑޮލަރަށް އެދިފަ އެވެ.

ރޮބިންސަންގެ ނަފްސާނީ ސިއްހަތާ ގުޅޭ ކަންބޮޑުވުންތަކާ ގުޅިގެން ކަރާޗީގެ ކަމާބެހޭ ފަރާތްތަކުން ވަނީ އެކަމުގެ ތެރެއަށް ވަދެފަ އެވެ. ފުލުހުން ވަނީ ޖިނާހު ޕޯސްޓްގްރެޖުއޭޓް މެޑިކަލް ސެންޓަރު (ޖޭޕީއެމްސީ) ގެ ނަފްސާނީ ވޯޑުގައި ރޮބިންސަން އެޑްމިޓްކޮށްފައެވެ.

އޭނާގެ މެޑިކަލް ފަރުވާއާ ގުޅިގެން ޑީޕޯޓް ކުރުމުގެ މަރުހަލާއާ ގުޅޭ ގޮތުން ލަފާ ހޯދުމަށް ފުލުހުން ވަނީ ސަރުކާރުގައި އެފިފައެވެ.

މަސްއޫލުވެރިން ގަބޫލުކުރާ ގޮތުގައި ރޮބިންސަންގެ ނަފްސާނީ ސިއްހަތު ގޯސްވީ މަގުމަތި ވުމުންނެވެ. އެމެރިކާއަށް އެނބުރި އޭނާ ފޮނުވާލުމުގެ އިންތިޒާމު ހަމަޖެއްސުމަށް ޕާކިސްތާން އޮފިޝަލުން ހުށަހެޅި ނަމަވެސް ރޮބިންސަން ވަނީ އެކަމަށް އެއްބާރުލުން ދިނުމަށް ދެކޮޅު ހަދާފައެވެ.